حات قورجىن

وقىرمان ...باتاسىن بەرەدى وتادان كەيىن جاعدايىم جاقساردى مەن وبلىستىق ونكولوگيالىق ديسپانسەرگە ءتۇسىپ, سويلەي الماي, ءتىپتى,  اياعىمنان جۇرە الماي قاتتى قينالدىم. التىن قولدى وتاشى, مەديتسينا عىلىمدارىنىڭ كانديداتى تايمان امانوۆتىڭ جاساعان وتاسىنان كەيىن جاعدايىم تۇزەلىپ, قازىر ءتاۋىرمىن. ەكى اپتادان اسا ۋاقىت ديسپانسەردە جاتقاندا بايقاعانىم – مۇنداعى دارىگەرلەر سەنبى, جەكسەنبى كۇندەرى دە تىنىمسىز ەڭبەك ەتىپ, شۇعىل وتالار جاسالىپ جاتادى. اۋرۋحانانىڭ باس دارىگەرى ەسەنگەلدى راباەۆ تا وتە ەلگەزەك ازامات ەكەن. ەكى اپتانىڭ ىشىندە كوپتەگەن ادامدار امان-ەسەن ۇيلەرىنە قۋانىپ كەتىپ جاتقانىنا كۋا بولدىم.  وسىنداي كاسىبي دەڭگەيى جوعارى, اق ادال جۇرەگىمەن جانە شىن نيەتىمەن دىمكاس جاندارعا ەكىنشى ءومىر سىيلاپ, اجالدان اراشالاپ جۇرگەن اق جەلەڭدى ابزال جاندارعا ريزاشىلىعىمىز شەكسىز. مەن ولاردىڭ بارىنە اكەلىك جانە اتالىق اق باتامدى بەرەمىن. مارات تاسيموۆ, ەڭبەك ارداگەرى باتىس قازاقستان وبلىسى, ءبورلى اۋدانى ...ماقتان تۇتادى اقساقالدار اۋىل قازىناسى ءبىزدىڭ ەلىمىز – ەجەلدەن ەركىندىك اڭساپ, ەلى مەن جەرى ءۇشىن سانسىز شايقاسقا تۇسكەن ەرلەردىڭ مەكەنى. سولاردىڭ ءبىرى رايىمبەك اۋدانىنا قاراستى سارىجاز اۋىلى. سونداعى جولدىباي تاۋىنىڭ بوكتەرىندەگى كومىرشى اۋىلىندا مەن دە تۋىپ ءوستىم. ايتايىن دەگەنىم, ءومىر كورگەن, تاجىريبەسى مول, كەيىنگى ۇرپاققا ايتارى بار, اقىلى داريا اۋىلىمنىڭ قاريالارىنا ارنايى بارىپ, قولدارىن الىپ سالەمدەسىپ, ولارمەن ارقا-جارقا شۇيىركەلەسىپ,  اتا-انامنىڭ كوزىن كورگەندەر سولار جايىندا ەستەلىكتەر ايتقاندا ءبىر تەبىرەنىپ, توبەم كوككە جەتىپ جادىراپ قالامىن. قازىرگى تاڭدا ەل اعالارى, اۋىل جاستارى مەن اۋىلدىڭ ۇيىتقىسى بولعان اتالارىمىز بەن اجەلەرىمىز قۇلشىلىق جاساۋ ءۇشىن ۇيدە وقىلعان نامازعا قاراعاندا, مەشىتتە وقىعان نامازدىڭ ساۋابى مول دەپ, جۇما نامازدارىن قازا ەتپەي مەشىتكە قاراي اسىعىپ كەلىپ وقىعانىن دۇرىس سانايدى. كارىسى بار ما, جاسى بار ما سولاردىڭ ارقايسىسىنا قاراپ وي سارالاعانمىن, ەلىكتەگەنمىن, جاقسىلىعىن ۇيرەنىپ, جاماندىعىنان جيرەنگەنىم ارقىلى مەن ولارعا قارىزدارمىن. ەربول سپاتاەۆ الماتى وبلىسى ...قىنجىلىسىن جەتكىزەدى قارتتارعا قامقورلىق قاجەت بۇكىل عۇمىرىم مەديتسينا سالاسىندا وتكەندىكتەن بۇگىندەگى دەنساۋلىق ساقتاۋ سالاسىنداعى كەيبىر كەلەڭسىزدىكتەردى كورىپ, كوڭىلىم ورتايىپ قالادى. ماسەلەن, اۋەلى دوللار باعامى ءوستى دەگەن جەلەۋمەن ءدارى-دارمەك قىمباتتاپ كەتتى. كوپتەگەن ادامدار سوزىلمالى اۋرۋ تۇرلەرىمەن اۋىرادى. ولار دارىگەر بەلگىلەگەن دارىلەردى ۇنەمى ءىشىپ ءجۇرۋى كەرەك, مۇنداي دارىلەردىڭ باعاسى قىمبات. ال اۋرۋحانالاردا ناۋقاستارعا قولجەتىمدى باعاداعى دارىلەر عانا تەگىن بوساتىلادى. قىمبات دارىلەردى زەينەتاقىسى 30-40 مىڭ تەڭگەدەن اسپايتىن قارتتار قالاي ساتىپ الادى؟ سوزىلمالى ناۋقاسى بارلار جىلىنا ەكى-ءۇش رەت اۋرۋحانادا ەمدەلىپ شىعۋى ءتيىس. اۋرۋحاناعا جاتقان سوڭ دارىگەر ەكى-ءۇش ءدارى بەلگىلەپ, سونىمەن شەكتەلەدى. اۋرۋىڭدى باسۋ ءۇشىن ەڭ قاجەت دارىلەردى ءوزىڭ ساتىپ الاسىڭ. دامىعان 30 ەلدىڭ قاتارىنا قوسىلامىز دەيمىز. وعان مۇمكىندىك تە بار. وسىنداي مول مۇمكىندىك يەسى رەتىندە ەڭ ءبىرىنشى كەزەكتە باستى بايلىعىمىزدى ساقتاۋعا كەڭىرەك كوڭىل بولىنسە ەكەن دەيمىن. زەينەتكەرلەر زارىقپاسا, قارتتار قاجىماسا دەگەن تىلەك بار.  كامال كاراەۆ, زەينەتكەر-دارىگەر شىمكەنت ...ۇلگى ەتەدى سەرپىندىكتەر سەرپىلتەدى مەن ارقالىق مەملەكەتتىك پەداگوگيكالىق ينستيتۋتىنا «ماڭگىلىك ەل يندۋسترياعا! «سەرپىن-2050» الەۋمەتتىك جوباسى اياسىندا پەداگوگيكا جانە پسيحولوگيا ماماندىعى بويىنشا وقۋعا قابىلدانىپ, بەلسەندى جاستار «جاس سەرپىن ەرىكتىلەر» جاڭا ۇيىم جۇمىسىن باستاپ كەتتىك. جاستاردىڭ قۇقىعىن قورعاۋ, بوس ۋاقىتىن ءتيىمدى وتكىزۋدى ۇيىمداستىرۋ, مۇقتاج جاندارعا جانە ارداگەرلەرگە  كومەك بەرۋدى باستى ماقسات ەتىپ ۇستاندىق.  ءبىز بولاشاق ۇستاز ەكەنىمىزدى ماقتان تۇتىپ, جاس ۇرپاق بويىنا ءبىلىم ءنارىن ءسىڭىرۋ ءۇشىن اركەز ىزدەنىپ ءجۇرۋ كەرەكتىگىن ۇمىتپاۋدى, ءبىلىم الۋمەن قاتار  بەلسەندى بولۋدى ۇيىمنىڭ ۇرانىنداي سەزىنەمىز. ەلىمىزدەگى داعدارىسقا قاراماستان, بىزگە وسىنداي جاعداي جاساعان مەملەكەتكە العىس ايتامىز. ءبىزدىڭ قاتارىمىزدان كورىنۋ ءار جاستىڭ ارمانىنا اينالماق. وسى جوباعا قاتىسقان جاستاردىڭ بىلىمگە دەگەن قۇشتارلىعى دە ەرەكشە. ال ءبىز ەل سەنىم ارتار جالىندى جاستارمىز. جانسەرىك بايدەنوۆ, ى.التىنسارين اتىنداعى ارقالىق مەملەكەتتىك پەداگوگيكالىق ينستيتۋتىنىڭ ستۋدەنتى   قوستاناي وبلىسى  ...كومەك سۇرايدى قىزىمنىڭ قوس كوزى كورمەي قالدى اعدىردىڭ سالعان ىسىنە كونبەسكە شارا جوق. ءتورت جاسار قىزىم كاۋسار قايىربەكوۆانىڭ قوس كوزى بىردەي ءتورت ايلىعىندا العان ەكپەنىڭ سالدارىنان مۇلدەم كورمەي قالدى. پەرزەنتىمنىڭ بەلى بەسىكتەن شىقپاي جاتىپ قوس جانارىنان بىردەي ايىرىلعانىن بىلگەندە جانىمدى قويارعا جەر تاپپادىم... كورشىلەس ورىنبور قالاسىندا اكادەميك س.فەدوروۆ اتىنداعى كوز اۋرۋلارىن ەمدەيتىن كلينيكا بار. مۇندا ماماندانعان بىلىكتى وفتالمولوگتار جۇمىس جاسايدى. تاياۋدا مەن وسى كلينيكاعا ارنايى بارىپ, حيرۋرگ-دارىگەرلەرمەن جولىعىپ قايتقان ەدىم. وبالدارى نە كەرەك, ولار قىزىمنىڭ كوزىنە وتا جاساۋعا كەلىسىم بەردى. تەگىن ەمەس, ارينە. وتا اقىلى تۇردە جاسالماق. ونىڭ قۇنى شامامەن 60 مىڭ رەسەي ءرۋبلى توڭىرەگىندە ەكەن.  مۇنداي مولشەردەگى قاراجات ءوز قولىمدا بولسا, سول كۇنى-اق ورىنبورداعى كلينيكاعا جەتكىزبەيمىن بە,  قاراشىعىمدى. بۇل ءۇشىن جاناشىرلىق تانىتا بىلۋگە نيەتتى جاندار مەن ازاماتتاردىڭ كومەك قولدارىن سوزۋلارىن وتىنەمىن.  گۇلنار دوسمۇحامبەتوۆا ورال