بالمۇزداق, تورت, شوكولاد, ىرىمشىك, يوگۋرت

قازىر مۇنىڭ ءبارى بيە سۇتىنەن جاسالادى الماتى وبلىسىندا كاسىپكەر وتەمىس ماحانوۆتىڭ شارۋاشىلىعىن بىلمەيتىن ادام كەمدە-كەم. ول بىرنەشە جىلدان بەرى بيە سۇتىنەن جاسالاتىن تاعامدار دايىنداۋمەن اينالىسىپ كەلەدى. جاقىندا كاسىپكەر بيە سۇتىنەن بالمۇزداق, تورت, شوكولاد, ىرىمشىك, يوگۋرت جاساۋدى دا قولعا الدى. كاسىپكەر بالا كەزىنەن جىل­قى بايلاپ, بيە ساۋعا قىزىعىپ ءوس­كەن ەكەن. كەيىن جىگىت شاعىندا جىلقى شارۋا­شىلىعىمەن اينالىسا باستاعان. ال ەل اعاسى جا­سىنا جەتكەن كەزدە جىل سايى­ن مەملەكەتتەن سۋبسيديا الىپ, قىمىز بەن شۇبات ءوندىرۋ­دى كا­سىپكە اينالدىرعان. قازىر ءىس ادامى سونىڭ جەمىسىن كورىپ وتىر. ءوزىنىڭ ايتۋىنشا, جۇرت ارا­سىندا ءوزى وندىرەتىن تاعامدارعا قى­زىعۋشىلار كوبەيىپ كەلەدى. – مەنىڭ جىل سايىن جاز باستالىسىمەن قىمىز بەن شۇ­باتتى ساتۋ ءۇشىن بازارلار مەن قىمىزحانالاردىڭ ەسىگىن توزدىرعان كەزدەرىم بولدى. قازىر دە حالىقتى قىمىزعا ءۇي­رەتۋدى توقتاتقىم كەلمەيدى. ءجۇر­گەن جەرىمدە قىمىزدىڭ, شۇ­بات پەن ساۋمالدىڭ قاسيەتىن ايتىپ كەلەمىن, – دەيدى ول. – قىمىز قاسيەتتى سۋسىن بولعاندىقتان, تازالىقتى, اشىتۋ تەحنولوگياسىن ءجىتى ساق­تاۋدى جانە ىدىستىڭ ساپالى بولۋىن قاجەت ەتەدى. قىمىزدىڭ ءبىر ءوزى ادام دەنە­سىنىڭ كۇش-قۋاتىن ارتتىرادى, بۇيرەك پەن باۋىردى قا­نىق­تىرادى, قان تامىرلارىن تازالايدى. ال ساۋمالدى, ياعني جاڭا ساۋىلعان بيەنىڭ ءسۇتىن ادامدار كوبىنە ەمدىك قاسيەتى ءۇشىن ىشەدى, – دەيدى تاعى كاسىپكەر. بۇگىندە وتەمىس ماحا­نوۆ­تىڭ شارۋاشىلىعىنان شىققان ونىمدەردى زەرتتەۋ ءۇشىن شەتەل ماماندارى كەلەدى ەكەن. جاقىندا جاپوندار دا ات ءىزىن سالا باستاپتى. ولار دۇكەن سورەلەرىنەن بيە ءسۇتىنىڭ نەگىزىندە جاسالعان تاعام تۇرلەرىن كورىپ تاڭعالىسىپتى. ولاردىڭ اراسىندا قانتسىز, كونسەرۆانتسىز تابيعي بالمۇز­داقتىڭ ءدامىن تاتىپ كورگەن. داستان كەنجالين, «ەگەمەن قازاقستان»