سەنانى سەرگىتكەن سۋرەتتەر

جاقىندا لۋۆر مۇراجايىنىڭ الاڭىندا, اتاقتى پيراميدانىڭ استىندا «Carrousel du Louvre» ساۋدا-كورمە گالەرەياسىندا بۇرىن-سوڭدى بولىپ كورمەگەن «Les Merveilles du Kazakhstan» (قازاقستان عاجايىپتارى) فوتوكورمەسى سالتاناتتى تۇردە اشىلدى. تابيعات سىيلاعان عاجايىپتاردى دا, ادام قولىمەن جاسالعان اسەمدىكتى دە باعالاي بىلەتىن فرانتسۋز استاناسىنىڭ تۇرعىندارى مامىردىڭ مامىراجاي كۇندەرىندە قازاقتىڭ ۇشى-قيىرى جوق شەكسىز جازيراسىن, ايبىندى تاۋ-شىڭ­­دارىن, توستاعانعا قۇيعانداي ءمول­دىرەگەن تاپ-تازا كولدەرىن, قىزدىڭ بۇ­راڭ بەلىن­دەي كوز تارتقان اسەم وزەن­دەرىن تاماشالاپ, قازاقتىڭ تاريحى مەن قازىرگى زامانعى وزىق ساۋلەتىنەن سىر شەرتەتىن جانە حالقىمىزدىڭ باي مادەنيەتى مەن داستۇرلەرىن كوز الدىڭا اكەلەر كەڭ ءپىشىمدى 26 (3 ح 2,4 م) فوتوسۋرەتتەر ارقىلى بۇگىنگى قازاقستان كەلبەتىمەن تانىستى. «استانا ەكسپو-2017» ۇك» اق-تىڭ قولداۋىمەن ۇيىمداستىرىلعان كورمەنىڭ اشىلۋىنا فرانتسيا, يسپا­نيا, اقش, قىتاي جانە باسقا دا ەلدەردىڭ 30-دان اسا باق وكىلدەرى, سون­داي-اق, فرانتسۋز تۋروپەراتورلارى قاتىسىپ, جۋرناليستەر ەكسپو ءۇشىن تاڭدالعان «بولاشاقتىڭ ەنەرگياسى» تاقىرىبىنىڭ وزەكتىلىگىن اتاپ ءوتتى. اشىلۋ سالتاناتىندا قازاقستاننىڭ فرانتسياداعى ەلشىسى نۇرلان دانەنوۆ, «Carrousel du Louvre» ديرەكتورى كارو­لين يوپ جانە ءپاريجدىڭ 1-وكرۋگ مەرياسى قالالىق مادەنيەت كوميتەتىنىڭ توراعاسى كارلا اريگوني قۇتتىقتاۋ ءسوز سويلەدى. جاقىن ارادا قازاقستانعا بارۋعا ءۇمىت بىلدىرگەننىڭ ءبىرى ءپاريجدىڭ 1-وكرۋگ مەرياسى قالالىق مادەنيەت كوميتەتىنىڭ توراعاسى كارلا اريگوني: «بۇل پەيزاجدار شىن مانىندە قىزىقتى. مەن تەزىرەك ول جەرگە بارعىم كەلەدى», – دەدى. ستاتيستيكا بويىنشا الەمگە ءاي­گىلى مۇراجايدىڭ كىرەبەرىستەرىنىڭ ءبىرى بولىپ تابىلاتىن «Carrousel du Louvre» گالەرەياسى ارقىلى اي سايى­ن جارتى ميلليوننان استام ادام وتەدى ەكەن. وسىلايشا, قىسقا مەرزىم ىشىندە قازاقستانعا, استاناعا جانە ەكسپو-2017 كورمەسىنە كوپتەگەن الەۋەتتى تۋريستەر نازار اۋداراتىن بولادى. 9 ماۋسىمعا دەيىن جالعاساتىن كور­مەگە كەلۋشىلەر #WelcomeToKZ ۆيكتوريناسىنا بەلسەندى تۇردە قاتى­سۋدا. جەڭىمپازعا استانادا وتەتىن ەكسپو-2017 حالىق­ارالىق مامان­داندىرىلعان كورمەسىنە قاتىسۋمەن بىرگە, قازاقستانعا بارۋ مۇمكىندىگى بەرىلەدى. انار تولەۋحانقىزى, «ەگەمەن قازاقستان»