«رەال» كلۋبىنىڭ جانكۇيەرلەرى سودىرلار قولىنان قازا تاپتى

استانا. 14 مامىر. يراكتىڭ بالاد قالاسىندا لاڭكەستەردىڭ شابۋىلىنان يسپانيانىڭ «رەال» كومانداسىنىڭ جانكۇيەرلەرى قازا تاپتى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. اتالعان كوماندانىڭ فان-كلۋبىنىڭ ءدامحاناسىنا باسا-كوكتەپ كىرگەن قارۋلانعان توپ بەي-بەرەكەت وق جاۋدىرعان. سالدارىنان 16 ادام قازا تاۋىپ, تاعى بىرنەشەۋى ءتۇرلى دەڭگەيدە جاراقات الدى. قازىر ولار اۋرۋحانالارعا جەتكىزىلدى. ەكسترەميستەر وقيعا ورنىنان جاسىرىنىپ ۇلگەرگەن. الايدا, كوپ ۋاقىت وتپەي ءتارتىپ ساقشىلارى ولاردىڭ ءبىرىنىڭ ىزىنە ءتۇسىپ, جەرگىلىكتى ساۋدا ورىندارىنىڭ بىرىندە تۇتقىنعا الماق بولعان. ءدال وسى كەزدە ول بەلدىگىندەگى جارىلعىش زاتىن ىسكە قوسىپ, ءوزىن-ءوزى جارىپ جىبەردى. سونىمەن قاتار, «يراك جانە لەۆانت لاڭكەستىك ۇيىمى» بۇل ءىستى ءوز مويىندارىنا العانى بەلگىلى بولدى. «رەال» كومانداسىنىڭ جانكۇيەرلەرىنە شابۋىل جاساعانى ءبىزدى ەسەڭگىرەتىپ تاستادى. تەرروريزم ەندى فۋتبولعا دا زيانىن تيگىزە باستادى. قازا تاپقانداردىڭ جاقىندارى مەن وتباسىنا كوڭىل ايتامىز», – دەپ يسپانيا كاسىبي فۋتبول ليگاسىنىڭ پرەزيدەنتى (LFP) حاۆەر تەباس Twitter جەلىسىندەگى پاراقشاسىندا جازبا قالدىردى. ايان ءابدۋالي. دەرەك, فوتو: ريا «نوۆوستي».