پەتروپاۆل. 13 مامىر. سولتۇستىك قازاقستان وبلىسىندا اۋىل شارۋاشىلىعى تەحنيكالارىن شىعارۋعا ارنالعان كاسىپورىن مەن پەتەربور ماشينا جاساۋ زاۋىتىنىڭ بىرلەسكەن جوباسى بويىنشا بيىل «ك-704» تراكتورى «باتىر» دەگەن اتپەن قۇراستىرىلاتىن بولادى. بۇل تۋرالى وبلىستىق اكىمدىكتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
ءوندىرىس ورنىندا ايماق باسشىسى ەرىك سۇلتانوۆ بولىپ, جۇمىس جاعدايىمەن تانىستى. جەرگىلىكتى كاسىپورىندا جوندەۋ جۇمىستارى جۇرگىزىلىپ, جابدىقتار اكەلىنۋدە. ونىڭ جوبالىق قۋاتى جىلىنا 120 تراكتور شىعارۋعا لايىقتالعان. كاسىپورىننىڭ باس ديرەكتورى سەرگەي شينكارەنكونىڭ ايتۋىنشا, ءبىرىنشى كەزەڭدە كولىككە ارنالعان بولشەكتەردىڭ 35 پايىزى وسى جەردە قۇراستىرىلىپ, 50 جاڭا جۇمىس ورنى اشىلادى. ينۆەستيتسيالىق سالىم ازىرگە 300 ميلليون تەڭگەنى قۇرايدى. الداعى ۋاقىتتا ونىڭ مولشەرى 1,2 ميلليارد تەڭگەگە جەتكىزىلەدى.
ەرىك حامزا ۇلى اۋىل شارۋاشىلىعى ماشينالارىن ساتىپ الۋدى سۋبسيديالاۋ ماسەلەلەرىن شەشۋ قاجەتتىگىن اتاپ كورسەتتى.
«قازىر ءبىز قازاقستاندا شىعارىلعان اۋىل شارۋاشىلىعى ماشينالارىن سۋبسيديالاۋ يمپورتتالاتىنعا قاراعاندا جوعارى بولۋى ءۇشىن اۋىل شارۋاشىلىعى مينيسترلىگىمەن كەلىسسوز جۇرگىزۋدەمىز», – دەدى وبلىس اكىمى.
ءومىر ەسقالي.
دەرەك, فوتو: سولتۇستىك قازاقستان وبلىسى اكىمدىگىنىڭ ءباسپاسوز قىزمەتى.
