شەشىمى تابىلمايتىن ماسەلە بولمايدى

قازاقستان پارلامەنتى سەناتىنىڭ توراعاسى قاسىم-جومارت توقاەۆ پەن رەسەي فەدەراتسيا كەڭەسىنىڭ ءتورايىمى ۆالەنتينا ماتۆيەنكو باتىس قازاقستان وبلىسىنا كەلدى. ساپار رەسەي پارلامەنتشىلەرىنىڭ قازاقستانعا رەسمي ساپارى اياسىندا ىسكە استى. وبلىس ورتالىعى – ورال قالاسىنداعى كۇن تارتىبىندە شەكارا ماڭىنداعى جانە ايماقارالىق ىنتىماقتاستىقتى دامىتۋ, سونداي-اق, ساۋدا-ەكونوميكالىق جانە مادەني-گۋمانيتارلىق بايلانىستاردى نىعايتۋ ماسەلەلەرى قارالدى. كەزدەسۋلەردى پارلامەنت سەناتىنىڭ توراعاسى قاسىم-جومارت توقاەۆ اشىپ جۇرگىزىپ وتىردى. ول قازاقستان مەن رەسەي سەناتورلارىنىڭ ايماقتارداعى كەزدەسۋى ءۇشىن ورال قالاسى تەكتەن-تەك تاڭدالىپ الىنباعانىن, بۇل ءوڭىر گەوساياسي تۇرعىدان دا, جاعرافيالىق تۇرعىدان دا وتە ۇتىمدى تۇردە ورنالاسقانىن اتاپ كورسەتتى. بۇدان ءارى سەنات توراعاسى قازاقستان مەن رەسەي اراسىنداعى جەتى مىڭ شاقىرىمنان اساتىن ورتاق شەكارانىڭ نەگىزگى اۋقىمى باتىس قازاقستان سەكىلدى شەكارالىق ايماقتارعا تيەسىلى ەكەنىن اتاپ كورسەتتى. تاۋار اينالىمى مەن قاراپايىم ادامدار اراسىنداعى بايلانىستاردىڭ سۇبەلى ۇلەسى دە وسى وڭىرلەردىڭ ەنشىسىنە تيەدى دەدى ول. وسىنداي تۇجىرىمعا ناقتى دالەلدەر كەلتىرگەن باتىس قازاقستان وبلىسىنىڭ اكىمى التاي كولگىنوۆ ەۋرازيالىق ەندىكتە ورنالاسقان ءوڭىردىڭ باي تاريحى مەن داستۇرىنە جانە زور ەكونوميكالىق الەۋەتىنە ەكپىن ءتۇسىردى. سودان سوڭ ەۋرازيالىق ەكونوميكالىق وداقتىڭ ماڭىزدى رولىنە توقتالعان ايماق باسشىسى وسى شەڭبەردە وتكەن جىلى رەسەي فەدەراتسياسىمەن اراداعى سىرتقى ساۋدا اينالىمى 433 ميلليون اقش دوللارىن قۇراعانىن مىسالعا كەلتىردى. ونىڭ ايتۋىنشا, بۇگىندە وبلىستا ەكى ەل اراسىنداعى ورتاق كاسىپكەرلىك ءىستىڭ 200-دەن استام سۋبەكتىسى تىركەلگەن. شەكارالىق ايماقتا قازاقستان-رەسەي بىرلەسكەن كاسىپورىندارى تابىستى ءارى ناتيجەلى قىزمەت اتقارىپ كەلەدى. بيىلعى جىلدىڭ باسىندا پايدالانۋعا بەرىلگەن ورال قالاسىنداعى دوستىق ۇيىندە وبلىستاعى ەتنومادەني بىرلەستىك وكىلدەرىمەن كەزدەسۋ كەزىندە ۆ.ي.ماتۆيەنكونىڭ كەڭىنەن ويلاپ, تەرەڭنەن تولعاي بىلەتىن ۇلكەن پاراسات يەسى ەكەنى ايقىن كورىندى. ونىڭ قازاقستاندىقتارعا دەگەن شىنايى, ىزگىلىكتى ءىلتيپاتى مەن قۇرمەت سەزىمى ونىڭ ءاربىر ءسوزىنىڭ استارىنان ايقىن اڭعارىلىپ تۇردى. قازاقستاندا تۇراتىن ءاربىر ازامات پەن ءاربىر ەتنوس وكىلى قازاقستاننىڭ باستى بايلىعى دەپ تۇسىنەتىن قازاقستان پرەزيدەنتى نۇرسۇلتان نازارباەۆتىڭ تۇپكى­لىكتى بايلامى مەن تۇجىرىمى تەرەڭ سۇيىسپەنشىلىك سەزىمىن تۋعىز­­باي قويمايدى, دەپ ساباق­تادى ءوز ويىن دوستىق ۇيىندەگى كەزدەسۋدە ۆالەنتينا ماتۆيەنكو. فەدەراتسيا كەڭەسىنىڭ ءتورايى­مى, سونىمەن بىرگە, كورشىلەس ەكى ەل اراسىنداعى ورتاق شەجىرە مەن ورتاق ەرلىك داستۇرلەرى ۇرپاقتار ساباقتاستىعىنىڭ ارقاسىندا الداعى كەزدە كەلەشەك ۇرپاق ساناسىندا جاڭعىرا بەرەتىنىنە سەنىم ءبىلدىردى. سونىڭ ءبىرى – ۇلى وتان سوعىسى كەزىندەگى قازاقستان مەن رەسەي حالىقتارىنىڭ نەمىس ءفاشيزمىن تىزە بۇكتىرۋدەگى ورتاق جەڭىسى. جەڭىس سەزىمى – قۇدىرەتتى دە قاستەرلى سەزىم. قاي كەزدە دە بۇل سەزىمدى جوعالتپاي, بويىمىزدا ۇستاي الساق, ءبىزدىڭ ورتاق تاريحىمىز جادىمىزدان ەش ۋاقىتتا وشپەيدى, دەدى ول. رەسەيدىڭ مەملەكەت قايرات­كەرى­مەن كەزدەسۋ كەزىندە باتىس قازاقستان وبلىستىق قازاقستان حالقى اسسامبلەياسى اقساقالدار كەڭەسىنىڭ توراعاسى راحمەتوللا سۇيەرباەۆ حالقىمىزدىڭ سالتى بويىنشا «قوش كەلدىڭىز!» – دەپ قازاق تىلىندە مارتەبەلى مەيمانعا قوشەمەت كورسەتتى. «دوس» قوعامدىق بىرلەستىگىنىڭ ءتورايىمى ۆەرا شوحينا شەكارالاس وڭىرلەردەگى وتكىزۋ بەكەتتەرىنىڭ مۇمكىندىگىن كەڭەيتۋ, ونى ءوزارا ساۋدا-ەكونوميكالىق قارىم-قاتىناستار ءۇشىن وڭتايلى دەڭگەيگە جەتكىزۋ  جانە ەكى ەل اراسىندا ءوزارا ىڭعايلى تۋريستىك كلاستەردى دامىتۋ قاجەتتىلىگىنە توقتالدى. بۇعان جاۋاپ رەتىندە ءۇن قاتقان ۆ.ماتۆيەنكو بۇل ماسەلەلەر وبلىستا ەكى ەل پارلامەنتشىلەرى وكىلدەرىنىڭ قاتىسۋىمەن تالقىلانعانىن, بۇگىنگى كۇنى بۇل ماسەلە ءوز شەشىمىن تابۋى ۇستىندە ەكەنىن ايتتى. ءسوزىنىڭ سوڭىندا ۆ.ماتۆيەنكو شەشىمىن تابا المايتىن بىردە-ءبىر پروبلەمالىق ماسەلەلەر بولمايتىنىن, قانداي كۇردەلى ءىستى دە ءوزارا اقىلداسىپ, كەڭەسە وتىرىپ ءبىر ىڭعايعا كەل­تى­رۋگە بولاتىنىن جەتكىزدى. سونىڭ ىشىندە قازاقستان مەن رەسەي پار­لامەنتشىلەرى وسىنداي باعىتتا ءوزارا ىقپالداسا وتىرىپ جۇمىس جاساي الاتىنىن العا تارتتى. قاسىم-جومارت توقاەۆ پەن ۆالەنتينا ماتۆيەنكو باستاعان ەكى ەلدىڭ پارلامەنتشىلەرى قازاقستان مەن رەسەي اراسىنداعى ءوزارا ءتيىمدى مادەني بايلانىستار مەن باعدارلامالار اياسىندا وبلىس ورتالىعىنداعى كافەدرالىق شىركەۋدە, ا.س پۋشكين جانە ولكەتانۋ مۇراجايلارىندا بولىپ, مۇنداعى قۇندى جادىگەرلەرمەن تانىستى. تەمىر قۇسايىن, «ەگەمەن قازاقستان» باتىس قازاقتان وبلىسى