تاراز. 12 مامىر. جامبىل وبلىسىنىڭ اكىمى كارىم كوكىرەكباەۆ قازاقستان رەسپۋبليكاسىنداعى فرانتسيانىڭ توتەنشە جانە وكىلەتتى ەلشىسى فرانسيس ەتەنمەن كەزدەستى. كەزدەسۋ بارىسىندا جامبىل وبلىسىنىڭ ينۆەستيتسيالىق مۇمكىندىكتەرى تالقىلاندى. وڭىردەگى «جاسىل ەكونوميكا» بويىنشا اتقارىلىپ جاتقان جۇمىستار, حيميا ونەركاسىبىن جانداندىرۋ, ءتۋريزمدى دامىتۋ جايىندا اڭگىمە قوزعالدى.
«جامبىل وبلىسى «جاسىل ەكونوميكا» بويىنشا الدىڭعى قاتاردا تۇرعان وڭىرلەردىڭ ءبىرى. كۇن, جەل, سۋ ەلەكتر ستانتسيالارى جۇمىس ىستەيدى. 2020 جىلعا دەيىن بالامالى قۋات كوزدەرىنەن وندىرىلگەن ەنەرگيا وبلىس سۇرانىسىنىڭ 30-40 پايىزىن قامتيدى دەپ كۇتىلۋدە. بۇل جوعارى كورسەتكىش. ءبىز بولاشاقتا فرانتسيا مەملەكەتىمەن دە باۋىرلاستىق ارقىلى جۇمىس ىستەۋگە ءازىرمىز. قازىردىڭ وزىندە رەسەي, قىتاي, بەلارۋس ەلدەرىنىڭ بىرقاتار وبلىستارىمەن تىعىز قارىم-قاتىناس ورناتتىق. بىرلەسكەن جوبالارىمىز بار», دەدى كەزدەسۋ بارىسىندا جامبىل وبلىسىنىڭ اكىمى ك. كوكىرەكباەۆ.
مۇنان سوڭ قوس تاراپ 2010 جىلى يندۋستريالاندىرۋ كارتاسىنا ەنىپ, مويىنقۇم اۋدانىندا ىسكە قوسىلعان تسەمەنت زاۋىتىنىڭ بۇگىنگى تىنىس-تىرشىلىگىنە توقتالدى. كاسىپورىن ۇستىمىزدەگى جىلدىڭ ءبىرىنشى توقسانىندا 1,7 ملرد. تەڭگەنىڭ ءونىمىن وندىرگەن.
«جۇمىس ساپارى بارىسىندا سىزدەردىڭ وڭىردە ىسكە اسىرىلىپ جاتقان جوبالارمەن تانىستىق. ءبىز وتە قۋانىشتىمىز. اسىرەسە مامانداردىڭ كاسىبيلىگىنە ريزامىز. بولاشاقتا سىزدەرگە شاعىن جانە ورتا بيزنەس سالاسىندا ءوز جوبالارىمىزدى ۇسىنىپ, تابىستى جۇمىس ىستەيمىز», دەيدى قازاقستان رەسپۋبليكاسىنداعى فرانتسيانىڭ توتەنشە جانە وكىلەتتى ەلشىسى فرانسيس ەتەن.
ورالحان ءداۋىت.
دەرەك, فوتو: egemen.kz
