اقش پرەزيدەنتى باراك وباما وسى ايدا جاپونيانىڭ حيروسيما قالاسىنا بارادى. وباما اتوم بومباسى تاستالعان ءبىرىنشى حيروسيما قالاسىنا بارعان اقش-تىڭ ءىس باسىنداعى العاشقى پرەزيدەنتى رەتىندە تاريحتا قالادى.
حالىقارالىق اقپارات اگەنتتىكتەرى حابارلاپ جاتقانداي, اق ءۇي باسشىسى حيروسيمادا 27 مامىردا ازيا قۇرلىعى ەلدەرىنە جاسايتىن ساپارى اياسىندا بولماق. سونداي-اق, ول جاپونيادا «ۇلكەن جەتىلىك» ەلدەرىنىڭ سامميتىنە قاتىسىپ, ءارى قاراي ونىڭ ساپارى ۆەتنامدا جالعاسادى. اقش پرەزيدەنتى اكىمشىلىگىنىڭ تاراتقان اقپاراتتارى بويىنشا, باراك وبامانىڭ بۇل ساپارى «ونىڭ بەيبىتشىلىك پەن يادرولىق قارۋسىزدانۋ» قاعيداتىنا ادال ەكەنىن بىلدىرەدى. بىراق, اقش بيلىگى ب.وباما حيروسيمادا رەسمي تۇردە كەشىرىم سۇراۋى ىقتيمالدىعىن جوققا شىعارىپ وتىر. بۇدان 70 جىلداي بۇرىن حيروسيما مەن ناگاساكي قالالارىنا اقش تاراپىنان تاستالعان اتوم بومبالارى 150 مىڭعا جۋىق ادامنىڭ ءومىرىن جالماعان ەدى.
كانتسلەر وتستاۆكاعا كەتەتىنىن مالىمدەدى
اۆستريانىڭ كانتسلەرى ۆەرنەر فايمان قىزمەتىنەن كەتەدى جانە اۆستريا سوتسيال-دەموكراتيالىق پارتياسى توراعاسى لاۋازىمىنان دا بوسايدى. بۇل جونىندە ارا اگەنتتىگى حابارلادى.
ول ءوزىنىڭ وسىنداي شەشىمگە كەلگەنى تۋرالى پارتيانىڭ وڭىرلىك جەتەكشىلەرىمەن كەزدەسكەننەن كەيىن مالىمدەگەن. ساياساتكەردىڭ سوزىنە قاراعاندا, ول ءوزىنىڭ جۇرگىزىپ جاتقان ساياساتى پارتيالاستارى اراسىندا ونشا كوپ قولداۋ تاپپاعان سوڭ, وتستاۆكاعا كەتۋ جونىندە شەشىم قابىلداپ وتىر. ۆەرنەر فايمان اۆستريا كانتسلەرى قىزمەتىن 2008 جىلدىڭ جەلتوقسانىنان اتقارىپ كەلەدى. سوڭعى ۋاقىتتا ول بوسقىندار ماسەلەسىندە بوساڭدىق تانىتقانى ءۇشىن ءجيى سىنعا ۇشىراپ ءجۇر. وتكەن جىلدىڭ كۇزىندە ساياساتكەر ەۋروپادا قالىپتاسقان بوسقىندار پروبلەماسى ەۋروپالىق وداققا ەرەكشە قاۋىپ تۋعىزاتىنىن, ءتىپتى, ەۋرووداقتى تاراتۋى ىقتيمال ەكەنىن دە ايتقان ەدى.
پرەزيدەنت 72 ساعات ۋاقىت بەردى
ۆەنەسۋەلا پرەزيدەنتى نيكولاس مادۋرو قىلمىسكەر توپتارعا بەيبىت جولمەن ەل بيلىگىنە بەرىلۋگە جانە قارۋلارىن تاپسىرۋعا ءۇش تاۋلىك مۇرسات بەردى.
ەلدىڭ مەملەكەتتىك تەلەارناسى ەفيرىنەن سويلەگەن سوزىندە پرەزيدەنت: «ءبىزدىڭ بالالارىمىز بەيبىتشىلىك جاعدايىندا ءومىر ءسۇرۋى ءتيىس. بىزبەن كەلىسىمگە كەلگىسى كەلەتىن توپتاردىڭ 72 ساعات ۋاقىتى بار», – دەپتى. ەگەر قىلمىستىق توپتار مۇنىمەن كەلىسپەسە, مادۋرو ولاردى كۇش قولدانۋ ادىسىمەن تالقانداۋعا ۋادە بەرگەن. ونىڭ سوزىنە قاراعاندا, قارۋ-جاراقتارىن تاپسىرۋدان باس تارتقاندارعا قاتال جازا قولدانىلۋى دا مۇمكىن. ول ءۇشىن ەلدىڭ قارۋلى كۇشتەرى, ۇلتتىق پوليتسيا, ارنايى قىزمەت ورگاندارى تارتىلاتىنىن اتاپ وتكەن.
قىسقا قايىرىپ ايتقاندا:
- سوڭعى اقپاراتتارعا قاراعاندا, «يسلام مەملەكەتى» دەگەن توپ (قازاقستاندا تىيىم سالىنعان – رەد.) سودىرلارى پالميرا اۋدانىنداعى (سيريا) شاەر جانە ماحر اتالاتىن گاز ءوندىرۋ كەنىشتەرىن باسىپ العان. بۇل نىساندار حومس پەن داماسكىدەگى ەلەكتر ستانسالارىن وتىنمەن قامتاماسىز ەتەدى.
- فلوريدا شتاتىنان سەناتورلىققا سايلانعان ماركو رۋبيو ميللياردەر دونالد ترامپپەن بىرگە, ءوزىنىڭ اقش-تىڭ ۆيتسە-پرەزيدەنتى لاۋازىمىنا ۇمتىلمايتىنىن مالىمدەدى.
- اقش-تىڭ كوننەكتيكۋت شتاتىندا وسىدان 48 جىل بۇرىن تۇرمەدەن قاشقان 71 جاستاعى روبەرت ستاكوۆيتس دەگەن قىلمىسكەر ۇستالدى. ول 1966 جىلى قاراقشىلىق قىلمىسى ءۇشىن قاماۋعا الىنىپ, 17 جىلعا سوتتالعان ەكەن.
- نيۋ-يوركتىڭ وڭتۇستىك وكرۋگىنىڭ فەدەرالدىق سوتى وزبەكستان پرەزيدەنتىنىڭ قىزى گۇلنارا كاريموۆا مەن ونىڭ ماڭايىنداعى ادامدارعا تيەسىلى دەگەن 850 ميلليون دوللاردى تاركىلەۋ تۋرالى اقش پروكۋراتۋراسى قوزعاعان ءىستى ۋاقىتشا توقتاتتى.
اسكەري قىزمەتكەرلەر سانىن كوبەيتەدى
گەرمانيانىڭ قورعانىس مينيسترلىگى ەل اسكەرىنىڭ سانى كوبەيتىلەتىنىن مالىمدەدى. «بي-بي-ءسيدىڭ» حابارلاۋىنشا, اسكەر قاتارى 1990 جىلى ەكى گەرمانيانىڭ بىرىككەن كەزىنەن بەرى كوبەيتىلمەگەن.
ەلدىڭ قورعانىس ءمينيسترى ۋرسۋلا فون دەر لياەيننىڭ مالىمدەۋىنشە, نەمىس اسكەرى سانىنىڭ كەڭەيۋى الداعى جەتى جىل بويى جۇرگىزىلەدى. وسى كەزەڭدە ونىڭ قاتارىن 14 مىڭعا جۋىق اسكەري قىزمەتكەر مەن 4,5 مىڭ قىزمەتكەر تولىقتىرادى. مينيستر مۇنىڭ قاجەتتىلىگىن سوڭعى جىلدارى بۋندەسۆەر اسكەري قىزمەتكەرلەرىنىڭ الەمدەگى ءىس-قيمىلدارعا ءجيى قاتىسۋمەن ءتۇسىندىردى. مىسالى, نەمىس ساربازدارى مەن وفيتسەرلەرى ناتو ءىس-قيمىلدارىنا قاتىسىپ, جەرورتا تەڭىزىندە بوسقىنداردى قۇتقارۋمەن اينالىسقان. بۇگىندە بۋندەسۆەردىڭ سانى 177 مىڭعا جۋىق ادامدى قۇرايدى.
تاعى ءبىر ەكسترەميستىڭ كوزى جويىلدى
اقش باستاعان حالىقارالىق كواليتسيا يراكتاعى انبار پروۆينتسياسىنىڭ اۋماعىندا «يسلام مەملەكەتى» دەگەن ەكسترەميستىك ۇيىم جەتەكشىلەرىنىڭ ءبىرىن ولتىرگەن.
اقش قورعانىس مينيسترلىگىنىڭ رەسمي وكىلى پيتەر كۋكتىڭ ايتۋىنا قاراعاندا, حالىقارالىق كواليتسيا كۇشتەرىنىڭ اۋەدەن سوققى جاساۋىنىڭ ناتيجەسىندە رۋتبا قالاسىنىڭ ماڭىندا «يسلام مەملەكەتىنىڭ» انبار پروۆينتسياسىنداعى ءامىرشىسى ءابۋ ۆاحيب ولتىرىلگەن. «ءال-كايدانىڭ» بۇرىنعى مۇشەسى ءابۋ ءۆاحيبتى قاماۋعا الىپ, ءولىم جازاسىنا كەسكەن بولاتىن. بىراق, ول 2012 جىلى قاماۋدان قاشىپ كەتكەن ەدى. ودان كەيىن ءا.ءۆاحيبتى يراك ارقىلى ساياحاتتاعان سيريالىق جۇك كولىكتەرىنىڭ جۇرگىزۋشىلەرىن ولتىرۋمەن اينالىستى دەپ ايىپتادى. ال حالىقارالىق كواليتسيا «يسلام مەملەكەتىنىڭ» يراكتاعى پوزيتسيالارىنا 2014 جىلدان بەرى سوققى بەرىپ كەلەدى.
81 ميلليوننىڭ ىزىنە تۇسكەن سياقتى
فەدەرالدىق تەرگەۋ بيۋروسى (فتب) حاكەرلەردىڭ بانگلادەش ورتالىق بانكىنەن 81 ميلليون دوللارعا جۋىق اقشانىڭ ۇرلانۋىنا وسى قارجى مەكەمەسىنىڭ قىزمەتكەرلەرى كومەكتەسۋى مۇمكىن دەپ شامالايدى.
فەدەرالدىق تەرگەۋ بيۋروسىنا سىلتەمە جاساۋ ارقىلى مالىمەتتەر كەلتىرگەن «The Wall Street Journal» گازەتىنىڭ جازۋىنشا, «فتب اگەنتتەرى كيبەرقىلمىسكەرلەرگە بانكتىڭ كەم دەگەندە ءبىر قىزمەتكەرى كومەك كورسەتكەنى جونىندە ايعاق كەلتىرىپ وتىر». اتالعان ۆەدومستۆو بۇل قىلمىسقا مەكەمەنىڭ تاعى بىرنەشە قىزمەتكەرىنىڭ قاتىسى بارىن دا جوققا شىعارمايدى. بەلگىسىز حاكەرلەر بانگلادەشتىڭ ورتالىق بانكىنەن نيۋ-يوركتىڭ فەدەرالدىق قور بانكى ارقىلى فيليپپين جانە شري-لانكاداعى شوتتارعا قارجى اۋدارعان ەكەن. ورتالىق بانكتىڭ كۇزەت جۇيەسىن بۇزعان قىلمىسكەرلەر ودان ءتورت ترانش ارقىلى 81 ميلليون دوللاردى شىعارعان. وسىعان بايلانىستى بانك باسشىسى وتستاۆكاعا كەتتى.
ينتەرنەت ماتەريالدارى نەگىزىندە ازىرلەندى
