كاۋسار ءۇن

جاس ورىنداۋشىلاردىڭ ءداستۇرلى رەسپۋبليكالىق «جاس قانات» ەسترادالىق ءان بايقاۋى بەيبىتشىلىك جانە كەلىسىم سارايىندا 20-22 مامىر ارالىعىندا وتەدى دەپ جوسپارلانۋدا. ەسكە سالا كەتەتىن جايت, ەل تاۋەلسىزدىگى مەن «جاس قاناتقا» بيىل 25 جىل تولىپ وتىر. سول سەبەپتى دە جەر-جەردەگى تالانتتى جاستاردى قولداپ, كوكتەمگى بۇلاقتىڭ كوزىن اشۋدا جەمىستى ەڭبەك ەتىپ كەلە جاتقان ءان بايقاۋىنان ۇستىمىزدەگى جىلى ەرەكشە سىيلار كۇتىلۋدە. وسىناۋ جوباعا وراي 1992 جىلى وتكەن «جاس قانات» بايقاۋىنىڭ لاۋرەاتى, بۇگىندە قازاق ۇلتتىق ەس­ترادا ونەرىنىڭ جۇلدىزى مەدەۋ ارىنباەۆ ءوز ويىن بىزگە بىلايشا بايانداپ بەردى: «جاس قانات» وسى ارالىقتا ەلىمىزدەگى ەڭ بەدەلدى دە تانىمال ءان بايقاۋىنا اينالعانى راس. ونىڭ ساحناسىندا العاش رەت ونەر كورسەتكەن شات-شا­دىمان شاق كۇنى كەشە عانا سياقتى ەدى... قايران, 25 دەپ حالقىمىز ەرەكشە سۇيىسپەنشىلىكپەن ءۇمىت ارت­قان, نەبىر اسەم انگە ارقاۋ بولعان جالىن اتقان, جىر ۇناتقان جاس ەمەس پە بۇل؟ سون­دىقتان, شىركىن, اساۋ دا بۇلا 25-ءتىڭ مىنەزىنە لايىق تاماشا تالانتتار تانىلار ساتكە ساناۋ­لى عانا كۇندەر قالدى». – العاشقى بايگە قانداي ەرەكشەلىكتەرىمەن ەستە قال­دى؟ – دەگەن سۇراعىمىزعا ءان­شى: «ول ۋاقىتتا بايقاۋعا تىركەلۋدىڭ ءوزى وڭاي بول­ماي­تىن. ارانجيروۆكا مەن تەحنيكاعا جاۋاپتى ما­مان­داردىڭ ازدىعى, ءان جازدىراتىن ستۋديانىڭ جوقتىعى... ت.س.س دۇنيەلەر جاس ءانشى­لەر ونەرىنىڭ تولىققاندى اشى­لۋىنا كوپ قيىندىق تۋعىزدى. وكىنىشكە قاراي, اق­پا­رات تاراتۋ مۇمكىندىگى دە تىم شەكتەۋلى بولدى. قا­تى­سۋشىلاردى تابۋ ءشوپ ءۇيى­مى­نەن ينە ىزدەگەندەي ءىس ەدى ءارى ولاردى امالسىز مەيرامحانا­لاردان ىزدەۋگە ءماجبۇر بولاتىن. ايتكەنمەن دە «جاس قا­نات» بايقاۋى ءوزىنىڭ مارتە­بەسىن ەشقاشان تۇسىرگەن ەمەس. ءتىپتى, 1992 جىلعى بايقاۋدا ءبىرىنشى جۇلدە ەشكىمگە بۇيىرماي قالدى. نەگە؟ ونىسى وتە دۇرىس شەشىم ەدى. ويتكەنى, «جاس قانات» بايقاۋىنان كاسىبي جوعارى دەڭگەي, تياناقتى دايىندىق تالاپ ەتىلدى. وسى ارقىلى ول بۇگىندە ەلىمىزدىڭ ەڭ بەدەلدى بايقاۋىنا اينالدى, – دەپ جاۋاپ بەردى. – ارينە, ۋاقىت ءبىر ورىندا تۇرمايدى. جيىرما بەس جىلدا كوپ نارسە وزگەردى, ءتىپتى ۋاقىت تا. قازىرگى كۇنى ءتۇرلى تەلەۆيزيالىق بايقاۋلار, رەاليتي-شوۋلار پايدا بولدى. تەحنيكانىڭ مۇمكىندىگى الدەقايدا ارتتى, قازىر قاتى­سۋشىلارعا SMS ارقىلى نە الەۋمەتتىك جەلىلەردە داۋىس بەرىلەدى. وسىنداي بايقاۋلاردىڭ كوپتىگى, ارينە, كاسىبيلىكتى ەكىنشى ورىنعا ىسىرىپ جىبە­رەتىنى قيىن, ياعني «حاريزما» العاشقى ورىنعا قويىلادى. بۇگىندە مىقتى ۆوكالدىڭ ءوزى ەسكەرىلمەي قالاتىنى جاسىرىن جايت ەمەس. ال, «جاس قانات» بايقاۋىنىڭ وزگە سايىستاردان ايىرماشىلىعى – باستى نازار ءاردايىم كاسى­بي دەڭگەيگە اۋدارىلىپ, دا­يىن­دىققا بارىنشا ءمان بەرىلەتىندىگى. – ءان بايقاۋىنىڭ تاعى قانداي قىرلارى كوڭىل اۋدارتادى؟– دەگەن سۇراعىمىزعا ساحنا جۇلدىزى: «العاشقى بايقاۋدان باستاپ ءار قاتى­سۋشى 2 ءان ورىندايدى. ء(ار بايقاۋ كۇنى – ءبىر ءان­نەن), 2007 جىلدان باستاپ ونەر سايىسىنىڭ تالابى ۇش­تاتىلدى, سودان بەرى سايىس 3 كەزەڭ بويىنشا وتىلەدى, ءارى ءار كەزەڭدە ۇپايى تومەن­دەگەن قاتىسۋشى سايىستان شىعارىلىپ وتىرادى. جالپى, قازىلار القاسىنا 546 ءان ۇسىنىلدى. ونىڭ 24-ءى بىرنەشە رەت ورىندالدى. ال, بايقاۋعا قاتىسۋعا نيەت بىلدىرەتىندەردىڭ سانى ورتاشا ەسەپپەن 75-80 ءوتىنىمدى قۇرايدى, ال 25 جىلدا بۇل كورسەتكىش 5 774 وتىنىمگە دەيىن ءوستى», دەدى.  قارشىعا كۇلەن