72 جاسىندا انا اتاندى

ءۇندىستاننىڭ حاريانا شتاتىندا بۇدان بىرنەشە اپتا بۇرىن 72 جاستاعى دالدجينجەر كاۋر ەسىمدى ايەل العاش رەت انا اتاندى. پەرزەنتتىڭ اكەسى – موحيندەر سينگ گيللانىڭ جاسى قازىر 79-دا ەكەن. بۇل جاعداي ءساۋىردىڭ 19-ى كۇنى ورىن العانىمەن, اقپارات بەتتەرىندە بىرەر كۇن بۇرىن عانا جاريالاندى. وتاۋ تىككەلى 46 جىلدان بەرى ايەل بالا كوتەرە الماي كەلگەن. الايدا, جاساندى جولمەن بالا كوتەرۋدىڭ مۇمكىندىگى تۋرالى ەستىگەندە, «اۋليەدەن اۋليە قويماي قىدىرىپ, ەتەگىن شەڭگەل سىدىرماسا دا», ەكى بىلەكتەرىن سىبانا بارىن سالىپ ىزدەنۋگە كىرىسىپ كەتكەن. ءۇمىت وتى قايتا تۇتانعان ەرلى-زايىپتىلار سوڭعى ەكى جىل بويى قالاداعى ۇزدىك كلينيكالاردا ۇزدىكسىز ەم قابىلداپ, قولدا بار مۇمكىندىكتىڭ ءبارىن جاساعان. – شىنى كەرەك, بەينەبىر وزگە الەمدە جۇرگەندەيمىن. تۋعان بالامنىڭ بارىنا ءالى دە سەنە الار ەمەسپىن. جاراتقان ءبىزدىڭ كۇنى-ءتۇنى جاساعان دۇعامىزدى قابىل الدى. تۇڭعىشىم ومىرگە كەلگەلى تولىققاندى وتباسىندا ءومىر ءسۇرىپ جۇرگەنىمدى سەزىنگەندەي بولدىم. جاسىم جەتپىستەن اسسا دا بويىمداعى كۇش-قۋاتىم ءالى قايتقان جوق, ءسابيىمدى ءوزىم باعىپ-قاعامىن. جۇبايىم دا قامقور جان, ماعان بارىنشا كومەك كورسەتىپ ءجۇر. ال ۇلىمىزدىڭ ەسىمىن اقىلداسا كەلە ارماان دەپ قويۋدى ءجون كور­دىك, – دەيدى دالدجينجەر كاۋر. ەڭ قىزىعى, الەمدى تاڭىر­قاتقان بۇل جاعداي ۇندىستانعا تاڭسىق ەمەس سياقتى. وسىدان 8 جىل بۇرىن, ياعني 2008 جىلى ۋتتار-پرادەش شتاتىندا ەگدە تارتقان 72 جاستاعى ايەل بوسانىپ, ەگىز بالانى دۇنيەگە اكەلگەن ەكەن. دارىگەرلەردىڭ ايتۋىنشا, 45 جاستان كەيىن ايەلدەردىڭ بالا كوتەرۋ مۇمكىندىگى ايتارلىقتاي تومەندەيدى. ال 50 جاستان اسقان­داردىڭ دەنى ساۋ بالا تۋى ەكىتالاي بولسا كەرەك. دەگەنمەن, قۇدايدىڭ قۇدىرەتىندە شەك جوق قوي. ايان ءابدۋالي, «ەگەمەن قازاقستان»