«قازاق قۇراماسى ارىستانشا الىستى»

سوڭعى كۇندەرى مۇز ايدىنى سەرىلەرى جانكۇيەرلەرىنىڭ نازارى ماسكەۋ مەن سانكت-پەتەربۋرگ قالالارىندا ءوتىپ جاتقان الەم چەمپيوناتىنا اۋعان. وسىعان ساي حوككەيشىلەردىڭ جارىسى دا كۇننەن-كۇنگە تارتىسقا تولىپ ءوتىپ جاتىر. مۇنى 9-10 مامىردا وينالعان كەزدەسۋلەردىڭ قورىتىندىلارى تاعى دا بايقاتتى. ماسكەۋدە ا توبىنداعى كوماندالار قۇرا­مىندا كۇش سىناسىپ جاتقان قازاقستان قۇراماسى 10 مامىر كۇنى نورۆەگيا حوككەيشىلەرىمەن كەزدەسىپ, 2:4 ەسەبىمەن ۇتىلۋعا ءماجبۇر بولدى. سوعان قاراماستان, ول سپورت ماماندارى مەن جاناشىرلارى تاراپىنان جاقسى باعالار الدى. سوندىقتان بولار, حالىقارالىق مۇزداعى حوككەي فەدەراتسياسىنىڭ (يحف) رەسمي سايتىندا كەشە جاريالانعان باستى ماقالا «قازاقتار ارىستانشا الىستى» دەگەن اتپەن شىقتى. وندا قازاقستاننىڭ ماتچ بارىسىندا ەكى مارتە ەسەپتى تەڭەستىرگەنى, بىراق سوڭىندا تاجىريبەسى مولداۋ جانە دەڭگەيى بۇرىننان جوعارى سانالاتىن ۆيكينگ ەلى جاماعاتىنىڭ جەڭىستى تارتىپ اكەتكەنى ايتىلادى. ماتچ نەگىزىنەن نورۆەگيا قۇراماسىنىڭ ءبىرشاما باسىمدىلىعىمەن ءوتتى. ەسەپتى دە الدىمەن سولار اشتى. ءبىرىنشى شايبانى 4-مينۋتتا يوحاننەس يوحاننەسسەن سالدى. قازاقستاندىق نايدجەل دوۋس 8-مينۋتتا تارازى باسىن تەڭەستىردى. ەكىنشى كەزەڭدە ءبىزدىڭ قارسىلاستارىمىز ءبىراز كۇش الىپ كەتتى. ولار 34-مينۋتتا كەن-اندرە ءوليمبتىڭ كۇش سالۋى­مەن تابلوداعى ەسەپتى 2:1-گە جەتكىزدى. وعان قازاقستاندىقتار 36-مينۋتتا قارىمتا قايتاردى. بىزدەن برەندون بوچەنسكي كوزگە ءتۇستى. الايدا, 39-مينۋتتا ماتيس وليمب كومانداسىن تاعى العا ۇزاتتى. ال سوڭعى كەزەڭدە نورۆەگتەر ءبىزدىڭ قاقپاشىسىز ويناپ جاتقان كەزىمىزدى ادەمى پايدالانىپ, ارتىقشىلىقتارىن ارتتىرا ءتۇستى. سوڭعى شايبانى 58-مينۋتتا ماتس تسۋككارەللو الىستان اشىق قاقپاعا ءدال ۇرىپ ءتۇسىردى. بۇل كۇنى سونداي-اق شۆەيتساريا دانيانى وۆەر-تايمدا 3:2 ەتىپ ۇتسا, فرانتسيا ۆەنگريانى 6:2 ەتىپ تىزە بۇكتىردى. ال گەرمانيا سلوۆاكيانى 5:1 ەسەبىمەن تالقانداپ, كەزەكتى سەنساتسياعا قول جەتكىزدى. بۇدان ءبىر كۇن بۇرىن وتكەن ويىندار مىناداي ناتيجەلەر اكەلدى: لاتۆيا – رەسەي 0:4, بەلارۋس – كانادا 0:8, شۆەتسيا – چەحيا 2:4, فينليانديا – اقش 3:2. كەشە تۇندە قازاقستان قۇراماسى شۆەدتەرمەن كەزدەستى. بۇدان بولەك, شۆەيتساريا – لاتۆيا, سلوۆاكيا – بەلارۋس, فينليانديا – ۆەنگريا ارالارىندا ويىندار ءوتتى. ءبىزدىڭ جىگىتتەر ءۇشىن ناعىز شەشۋشى شايقاستار الداعى كۇندەردىڭ ەنشىسىندە تۇر. ولاردىڭ 13 مامىر كۇنگى چەحتارمەن ويىنىنان كۇتەرىمىز از. الايدا, 14-ىندە لاتۆيامەن, 16-سىندا دانيامەن كەزدەسۋلەرى كوپ جايتتى انىقتاپ بەرۋگە ءتيىس. وسى ويىنداردا كوماندا تاعدىرى شەشىلەدى. تاعى ءبىر ايتاتىن نارسە, قازىر تۋرنيردە رەسەي كومانداسىنان كەيىنگى جانكۇيەردى ەڭ كوپ جيناۋشى ءبىزدىڭ جاساق بولىپ وتىر. رۋسلان يگىلىك