الماتىداعى الاپات الاۋ

46 پاتەرگە ۇلكەن شىعىن كەلتىردى تاڭ مەزگىلىندە قالانىڭ قاق ورتاسىندا ەلدى دۇرلىكتىرىپ, قىپ-قىزىل وتقا ورانعان جەتى قابات تۇرعىن ءۇي ءورت سوندىرۋشىلەردىڭ جەدەل-قابىل قيمىلىنىڭ ارقاسىندا ءبىر ساعاتقا جەتەر-جەتپەس ۋاقىتتا «ءتىلسىز جاۋدان» ازات ەتىلدى. ابىروي بولعاندا, ادام شىعىنى جوق. تۇتىنگە تۇنشىققان جەتى ادام ءدىن-امان دالاعا شىعارىلدى. قاتتى ءيىس تيگەن ءبىر ازامات اۋرۋحاناعا جونەلتىلدى. تەز ارادا قاۋىپسىز جەردە قۇرىلعان «شاتىرلى قالاشىققا» 120 تۇرعىن جايعاستىرىلدى. اراعا كوپ ۋاقىت سالماي, وقيعا ورنىنا اسىعىس جەتكەن قالا اكىمى باۋىرجان بايبەك زارداپ شەگۋشىلەرمەن كەزدەسىپ, حال-جاعدايلارىنا قانىقتى. ابىلاي حان مەن گوگول كوشەلەرىنىڭ قيىلىسىنداعى كەڭەس زامانىنان كوپشىلىككە اسا تانىمال «يۋبيلەينىي» گاسترونومى بۇگىندە سول اتاۋمەن سۋپەرماركەت تۇرىندە حالىققا ۇلگىلى قىزمەت كورسەتىپ كەلەتىن. سول جىلدارى گاسترونومنىڭ بۇرىشىندا تۇشپاراسى تاۋسىلمايتىن «قاراگوز» كافەسى بولۋشى ەدى. اياق استىنان اتى جوعالعان «قاراگوزگە» جاپسارلاسىپ كەيىننەن سالىنعان «كوروۆا بار» دەگەن «تەحاستىق سيىرشىلار» ۇلگىسىندە كافە جۇمىس ىستەيتىن. ءورت سول «سيىر باققاندار» ءدامحاناسىنان شىقتى. نىساننىڭ ساۋ-تامتىعى قالماي ورتەنىپ كەتتى. بولعان وقيعامەن جان-جاقتى تانىسقان قالا اكىمى باۋىرجان بايبەك «داستارحان» جاۋاپكەرشىلىگى شەكتەۋلى سەرىكتەستىگىنىڭ باسشىلارىنا تاياۋداعى 7 كۇننىڭ ىشىندە جالىن شارپىعان بارلىق 46 پاتەردى كۇل-قوقىستان تازارتىپ, قالپىنا كەلتىرۋدى تابىستادى. ءتيىستى ۆەدومستۆو باسشىلارىنان وسى مەرزىم ىشىندە پاتەرلەردى گازبەن, سۋمەن, ەلەكتر جارىعىمەن تولىق قامتاماسىز ەتۋدى مىندەتتەدى. ءۇش مەردىگەر مەكەمە باس­پانالاردى باستاپقى قالپىنا كەلتىرۋ ىسىنە كىرىسىپ تە كەتتى. ارناۋلى كوميسسيا اۋماعى 1100 شارشى مەتردى شارپىعان ورتتەن كەلگەن شىعىننىڭ اقىرعى سوماسىن انىقتاپ تا قويدى. تەرگەۋ باستالدى. توتەنشە وقيعانىڭ ساباق بولعانىن ەسكەرە كەلىپ, قالا اكىمى ورىنباسارلارىنا قالاداعى تۇرعىن ۇيلەرگە جاپسارلاسقان بارلىق دامحانالىق, شايحانالىق نىسانداردىڭ زاڭدىلىعى مەن جايلىلىعىن ءبىر رەت تەكسەرىپ, سۇزگىدەن وتكىزۋ كەرەكتىگىن تاپسىردى. تالعات ءسۇيىنباي, «ەگەمەن قازاقستان» الماتى