الماتى. 5 مامىر. سوڭعى جىلدارى «ناعىز الماتىشا» قوعامدىق قورى وتكىزىپ جۇرگەن «ەڭ ۇزدىك اۋلا سىپىرۋشى» بايقاۋى الماتىدا بيىل دا جالعاساتىن بولدى. بۇل تۋرالى قازاقسان ءباسپاسوز كلۋبىنا سىلتەمە جاساعان egemen.kz ءتىلشىسى حابارلادى.
اۋلالاردى تازا ۇستاپ, دۋالدار مەن جول جيەكتەرىن سىرلاۋ, گۇلزارلار مەن كوك شالعىندى تەگىستەپ قىرقۋدى وزىنە مىندەت ەتىپ العان جاندارعا ارنالعان بۇل بايقاۋدىڭ باستالعانىنا بيىل 4 جىل.
اۋقىمدى جوبانىڭ ءبىرىنشى كەزەڭى بيىل 1 مامىردا باستالىپ, 1 ماۋسىمعا دەيىن سوزىلادى. وتىنىمدە ۇمىتكەر تۋرالى اقپاراتتى جانە وعان بەكىتىلگەن اۋماقتى كورسەتۋ قاجەت. 15 ماۋسىمنان باستاپ 15 تامىزعا دەيىن سوزىلاتىن ەكىنشى كەزەڭدە داۋىس بەرۋ وتپەك. بايقاۋدىڭ وسى كەزەڭىندە ءاربىر الماتىلىق ونىڭ ويىنشا ەڭ ۇزدىك اۋلا سىپىرۋشى دەگەن مارتەبەگە لايىق ادامعا ءوز داۋىسىن بەرە الادى.
بيىلعى «ەڭ ۇزدىك اۋلا سىپىرۋشى» بايقاۋىنىڭ جۇلدە قورى 650 000 تەڭگەنى قۇراپ وتىر: ءبىرىنشى ورىنعا – 200 000 تەڭگە, ەكىنشى ورىنعا – 150 000 تەڭگە بەرىلەدى. ءۇشىنشى ورىنعا بەرىلەتىن 100 000 تەڭگەگە تەڭ سىيلىقتى ءۇش قاتىسۋشى الا الادى.
جىل سايىن وسى بايقاۋعا قارجىلىق دەمەۋشىلىك جاساپ كەلە جاتقان «ەفەس قازاقستان» كومپانياسى كورپوراتيۆتىك قاتىناستار دەپارتامەنتىنىڭ ديرەكتورى شىڭعىس قاسكەەۆ بۇل جوبا قازاقستاننىڭ ەڭ ءىرى مەگاپوليسىندەگى تۇرعىنداردىڭ ءومىر ءسۇرۋ ساپاسىن جاقسارتۋعا باعىتتالعانىن جانە بۇل كومپانيانىڭ كورپوراتيۆتىك-الەۋمەتتىك جاۋاپكەرشىلىگى اياسىندا وسى باستامانى قولداپ وتىرعاندىعىن ايتادى.
ايناش ەسالي.
دەرەك, فوتو: قازاقسان ءباسپاسوز كلۋبى.
