سۋرەت: senate.parlam.kz
دەپۋتاتتار نۇرلان بەكنازاروۆ پەن ايگۇل قاپباروۆا ءو.جولداسبەكوۆ اتىنداعى №9 ليتسەي ۇجىمىمەن جانە شىمكەنت قالاسىنىڭ №2 كوپسالالى اۋرۋحاناسىنىڭ قىزمەتكەرلەرىمەن كەزدەستى. پارلامەنتشىلەر جاڭا كونستيتۋتسيا جوباسى ەلىمىزدىڭ ودان ءارى دامۋىن ايقىندايتىن ستراتەگيالىق قۇجات ەكەنىن اتاپ ءوتتى.
«جاڭا كونستيتۋتسيانىڭ جوباسى قۇرىلىمدىق وزگەرىستەرمەن شەكتەلمەيدى. ول مەملەكەتتىك باسقارۋدىڭ جاۋاپتى ۇلگىسىن قالىپتاستىرۋعا, ازاماتتاردىڭ قۇقىعىن قورعاۋدىڭ ناقتى تەتىكتەرىن كۇشەيتۋگە جانە قوعام مەن بيلىك اراسىنداعى سەنىمدى نىعايتۋعا باعىتتالعان», دەدى ن.بەكنازاروۆ.
ال سەناتورلار امانگەلدى نۇعمانوۆ پەن باۋىرجان قانيەۆ اقتوبە وبلىسىنىڭ اكىمى اسحات شاحاروۆپەن كەزدەستى. وندا الداعى رەسپۋبليكالىق رەفەرەندۋمعا دايىندىق بارىسى پىسىقتالىپ, ۇيلەستىرۋ جۇمىسىنىڭ ءمان-جايى ايتىلدى. سەناتورلار جاڭا اتا زاڭدا ۇسىنىلعان وزگەرىستەر ازاماتتاردىڭ قۇقىعى مەن بوستاندىعىن كەڭەيتۋگە, مەملەكەتتىك باسقارۋدىڭ تيىمدىلىگىن ارتتىرۋعا, الەۋمەتتىك ادىلەتتىلىكتى نىعايتۋعا جانە وڭىرلەردىڭ تۇراقتى دامۋىنا باعىتتالعانىن اتاپ ءوتتى.
قىزىلوردا وبلىسىنا بارعان دەپۋتاتتاردىڭ جۇمىس ساپارى جالاعاش اۋدانىندا جالعاستى. نۇرتورە ءجۇسىپ پەن رۋسلان رۇستەموۆ كونستيتۋتسيا جوباسىن تۇسىندىرۋگە ارنالعان بىرقاتار كەزدەسۋ وتكىزدى. اگرارشىلار الدىندا سويلەگەن ن.ءجۇسىپ نەگىزگى زاڭنىڭ جاڭا رەداكتسياسى مەملەكەتتىڭ ساياسي جاڭعىرۋىنىڭ ماڭىزدى كەزەڭى ەكەنىن ءارى قوعامنىڭ ناقتى سۇرانىسىن كورسەتەتىنىن اتاپ ءوتتى.
سەنات دەپۋتاتى ەرنۇر ايتكەنوۆ پاۆلودار وبلىسىنداعى ساپارىن وبلىستىق كواليتسيا شتابىنىڭ قىزمەتىمەن تانىسۋدان باستادى. بۇدان سوڭ دەپۋتات ءوڭىر جاستارىمەن كەزدەسىپ, كونستيتۋتسيالىق رەفورمانىڭ نەگىزگى باعىتتارىن جان-جاقتى ءتۇسىندىردى. سونداي-اق ول مۋايتايدان رەسپۋبليكالىق جارىستىڭ جەڭىمپازدارىمەن جۇزدەستى. سەناتور سپورتشىلاردى جەتىستىكتەرىمەن قۇتتىقتاپ, جاستاردىڭ بەلسەندى ازاماتتىق ۇستانىمىن قالىپتاستىرۋدىڭ ماڭىزدى ەكەنىن ايتتى.
دەپۋتاتتار جالپى رەسپۋبليكالىق رەفەرەندۋمنىڭ ماڭىزدىلىعىن اتاپ ءوتىپ, ازاماتتاردى داۋىس بەرۋگە بەلسەندى قاتىسۋعا شاقىردى.
