ونىڭ ءبىرى – تەمىرجول بويىندا ورنالاسقان جامانسور ەلدى مەكەنىندە باستالعان مەكتەپ-ينتەرناتتىڭ قۇرىلىسى. شاعىن اۋىلدا مەكتەپ جاسىنداعى 200-گە جۋىق بالا بار. مۇندا باستاۋىش سىنىپتىڭ وقۋشىلارى 60 ورىنعا بەيىمدەلگەن عيماراتتا ءبىلىم الادى. الايدا مەكتەپكە بەيىمدەلگەن نىساندا سپورت پەن ءماجىلىس زالى جوق.
بىلتىر باستاۋىش سىنىپتار مەن دايىندىق توپتارىندا 64 بالا تىركەلىپتى. اۋىل تۇرعىندارىن جوعارى سىنىپتاردىڭ وقۋشىلارى اتىراۋ مەن قۇلسارى قالالارىنداعى, ماقات, مۇقىر ستانسالارىنداعى مەكتەپ-ينتەرناتتا وقىپ جۇرگەنى قىنجىلتادى. سول سەبەپتەن بىلتىر اتالعان ەلدى مەكەندە قايتارىلعان قارجىعا مەكتەپ-ينتەرناتتىڭ قۇرىلىسى باستالدى. ءبىلىم بەرۋ نىسانىندا ەكى بلوك قاراستىرىلىپتى. بلوكتىڭ ءبىرى – 80 ورىندىق مەكتەپ, ال ەكىنشىسى – 30 ورىنعا ەسەپتەلگەن ينتەرنات.
قىزىلقوعا اۋدانى اكىمدىگىنىڭ مالىمەتىنە سۇيەنسەك, ءبىلىم ورداسىنىڭ قۇرىلىسىنا قايتارىلعان قارجىدان
2 ملرد 89 ملن تەڭگە ءبولىنىپتى. قۇرىلىس جۇمىستارىن «جيەنباي» جشس جۇزەگە اسىرىپ جاتىر. مەكتەپ-ينتەرناتتىڭ قۇرىلىسىن بيىل تولىق اياقتاۋ كوزدەلىپ وتىر. دەمەك, وزگە ءبىلىم وردالارىنا قاتىناپ وقىپ جۇرگەن جامانسورلىق وقۋشىلارى الداعى جاڭا وقۋ جىلىندا اۋىل مەكتەبىنە بارادى.
ال ەكىنشى نىسان – ميالىدان تايسويعان اۋىلىنا تارتىلىپ جاتقان سۋ قۇبىرى. ونىڭ قۇرىلىسىن «ساپا قۇرىلىس 2007» جشس جۇرگىزۋدى قولعا الدى. اتالعان جوبا اياسىندا جالپى ۇزىندىعى 73,5 شاقىرىم ماگيسترالدى سۋ قۇبىرىن تارتۋ, 12 سۋ ۇڭعىماسىن قازۋ كوزدەلىپ وتىر. قازىر مەردىگەر مەكەمە بارلىق ۇڭعىمانى تولىق قازىپ, 66 شاقىرىم سۋ قۇبىرىن جۇرگىزىپ ۇلگەردى. ەندى پوليەتيلەن قۇبىرلارىن بىرىكتىرۋ جۇمىسى ەكى ۋچاسكەدە قاتار اتقارىلىپ جاتىر. بۇدان سوڭ سۋ ايداۋ نىساندارىن سالۋ جوسپارلانىپتى.
«جوبانىڭ جالپى قۇنى 6 ملرد 877 ملن تەڭگەدەن اسادى. ونىڭ ىشىندە 5 ملرد تەڭگە ەلىمىزگە قايتارىلعان اكتيۆتەر ەسەبىنەن ءبولىندى», دەپ حابارلادى اۋداندىق اكىمدىكتەن.
تايسويعان – قىزىلقوعا اۋدانىندا 2006 جىلى قۇرىلعان وكرۋگ. مۇندا 2010 جىلى 220 وقۋشىعا ەسەپتەلگەن مەكتەپ, 2015 جىلى دارىگەرلىك امبۋلاتوريا پايدالانۋعا بەرىلدى. ءۇش جىل بۇرىن اۋدان ورتالىعى ميالىدان اتالعان اۋىلعا قاراي 45 شاقىرىمدى قۇرايتىن قاتقىل تاباندى تاس جولدىڭ, كەيىن سپورت كەشەنىنىڭ, بالالارعا ارنالعان ويىن الاڭىنىڭ قۇرىلىسى باستالدى. قازىر وكرۋگتە 60-تان استام شارۋا قوجالىعى, ءتورت كاسىپكەرلىك دۇكەن اشىلعان. ءۇش كاسىپكەر جولاۋشىلار تاسىمالىمەن اينالىسادى. اۋىل تۇرعىندارى گاز جەلىسىمەن, تەلەفون بايلانىسىمەن, كىتاپحانا, كلۋبپەن قامتىلىپ وتىر.
اتىراۋ وبلىسى
