ج.ق.اسانوۆتى قازاقستان رەسپۋبليكاسىنىڭ باس پروكۋرورى قىزمەتىنە تاعايىنداۋ تۋرالى
جاقىپ قاجمان ۇلى اسانوۆ قازاقستان رەسپۋبليكاسىنىڭ باس پروكۋرورى بولىپ تاعايىندالسىن.
قازاقستان رەسپۋبليكاسىنىڭ پرەزيدەنتى
ن.نازارباەۆ
استانا, اقوردا, 2016 جىلعى 25 ءساۋىر
№238
جاقىپ قاجمان ۇلى اسانوۆ
1963 جىلى تۋعان. س.م.كيروۆ اتىنداعى قازاق مەملەكەتتىك ۋنيۆەرسيتەتىنىڭ زاڭ فاكۋلتەتىن بىتىرگەن. زاڭ عىلىمدارىنىڭ كانديداتى عىلىمي اتاعى بار.
جوعارى وقۋ ورنىن بىتىرگەننەن كەيىن قىزىلوردا وبلىستىق ادۆوكاتتار القاسىندا تاعىلىمداماشى بولىپ جۇمىس ىستەدى, قىزىلوردا وبلىستىق پروكۋرورىنىڭ كومەكشىسى, اعا كومەكشىسى, باس پروكۋراتۋرانىڭ اعا پروكۋرورى, ءبولىم باستىعى لاۋازىمدارىندا قىزمەت اتقاردى. قازاقستان رەسپۋبليكاسى پرەزيدەنتىنىڭ اكىمشىلىگىندە كونسۋلتانت, سەكتور مەڭگەرۋشىسى, باس پروكۋراتۋرانىڭ دەپارتامەنت باستىعى, الماتى قالاسى پروكۋرورىنىڭ ءبىرىنشى ورىنباسارى, پاۆلودار وبلىسىنىڭ پروكۋرورى بولدى. 2003-2005 جىلدارى – قازاقستان رەسپۋبليكاسىنىڭ ادىلەت ۆيتسە-ءمينيسترى.
ءار جىلدارى قازاقستاننىڭ كاسىپكەرلەرى مەن جۇمىس بەرۋشىلەرىنىڭ جالپىۇلتتىق وداعىن, «قازاقستاننىڭ كوممۋنالدىق جۇيەلەرى», «ورداباسى كورپوراتسياسى» اكتسيونەرلىك قوعامدارىن باسقاردى. ءتورتىنشى جانە بەسىنشى شاقىرىلىمدارداعى پارلامەنت ءماجىلىسىنىڭ دەپۋتاتى بولىپ سايلاندى.
2012 جىلعى قىركۇيەكتەن – قازاقستان رەسپۋبليكاسى باس پروكۋرورىنىڭ ورىنباسارى.
