فوتو: magnific.com
الماتى مەن اقتاۋدا كوسمەتيكالىق وپەراتسيالاردان كەيىن پاتسيەنتتەردىڭ قايتىس بولۋىنا بايلانىستى جەكەمەنشىك كلينيكالاردى تەكسەرۋ قالاي ءجۇرىپ جاتقانىن مەديتسينالىق جانە فارماتسەۆتيكالىق باقىلاۋ كوميتەتىنىڭ توراعاسى باۋىرجان ءجۇسىپوۆ ايتىپ بەردى.
ماڭعىستاۋدا ءماسليحات دەپۋتاتى پلاستيكالىق وپەراتسيا كەزىندە قايتىس بولدى
4 ساۋىردە ماڭعىستاۋ وبلىستىق ءماسليحاتىنىڭ بۇرىنعى دەپۋتاتى, 49 جاستاعى ەربول ايتۋوۆ «قاسيەت» جەكەمەنشىك كلينيكاسىنا جۇگىنگەن. ەر ادامعا ليپوساكتسيا وپەراتسياسى جاسالىپ, سودان كەيىن ول كوماعا ءتۇسىپ, كوز جۇمعان. وسى وقيعادان كەيىن مەديتسينالىق جانە فارماتسەۆتيكالىق باقىلاۋ كوميتەتىنىڭ دەپارتامەنتى تەكسەرۋ جۇرگىزدى.
«ماتەريالدار قۇقىقتىق باعا بەرۋ ءۇشىن پروكۋراتۋرا مەن قۇقىق قورعاۋ ورگاندارىنا تاپسىرىلدى. سوندىقتان ناتيجەلەرى ولار قاراعاننان كەيىن جاريالانادى», – دەدى ءجۇسىپوۆ سەنات قابارعاسىندا.
كوميتەت توراعاسى كلينيكا قىزمەتىندە قانداي دا ءبىر زاڭبۇزۋشىلىقتار انىقتالعان, انىقتالماعانىن ناقتىلامادى.
بەلگىلى كاسىپكەر ءارى بلوگەر ساۋلە بازارحان پلاستيكالىق حيرۋرگيا كلينيكاسىندا كوز جۇمدى
كوسمەتيكالىق وپەراتسيادان كەيىنگى تاعى ءبىر ءولىم جاعدايى 15 مامىردا الماتىدا تىركەلدى. كلينيكادا بلوگەر ءارى كاسىپكەر ساۋلە ەرماحانوۆا قايتىس بولدى. قازىر بۇل مەكەمەدە دە تەكسەرۋ باستالعان.
«بۇگىننەن باستاپ ارنايى كوميسسيا الماتىداعى وسى جەكەمەنشىك كلينيكاعا كىرىپ جاتىر. تەكسەرۋ ناتيجەلەرى بويىنشا قوسىمشا اقپارات بەرەمىز... ءبىز كوميسسيا قۇرامىن جاساقتادىق, ونىڭ ىشىندە تاۋەلسىز ساراپشىلار دا بار. ولار بارلىق ءىستى, بارلىق ماتەريالداردى, سونىڭ ىشىندە مەديتسينالىق تاريحتى تولىق زەرتتەيدى. مۇندا بەلگىلى ءبىر راسىمدەر بار», – دەپ ءتۇسىندىردى ءجۇسىپوۆ.
ءجۇسىپوۆتىڭ ايتۋىنشا, قازىرگى ۋاقىتتا قازاقستاندا پلاستيكالىق وپەراتسيا جاسايتىن شامامەن 247 جەكەمەنشىك كلينيكا جۇمىس ىستەيدى. وسى قايعىلى وقيعالاردان كەيىن مينيسترلىك پروفيلاكتيكالىق باقىلاۋدى كۇشەيتۋدى, سونىڭ ىشىندە ليتسەنزيالىق تالاپتاردىڭ ساقتالۋىن جانە مامانداردىڭ وقىتۋ سەرتيفيكاتتارىن تەكسەرۋدى جوسپارلاپ وتىر.
