قوستانايدا «ماڭگى ءتىرى پولك» قۇرىلماقشى

قوستاناي. 21 ءساۋىر. قوستاناي وبلىسىندا 1941-1945 جىلدارى ۇلى وتان سوعىسىندا حالقىمىزدىڭ كورسەتكەن ەرلىگىنە, مايدان دالاسىندا قالعان, جارالى بولىپ كەلىپ, سوعىستان كەيىنگى جىلدارى قايتقان جاۋىنگەرلەر رۋحىنا تاعزىم ەتۋ ماقساتىندا «ماڭگى ءتىرى پولك» قۇرىلادى. بۇل تۋرالى قوستاناي قالالىق اكىمدىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. ۇلى وتان سوعىسىنا قاتىسقان, مايدان دالاسىندا قازا تاپقان جانە بۇگىندە دۇنيەدەن وتكەن سوعىس ارداگەرلەرىنىڭ ۇرپاقتارى اتالارىنىڭ, اجەلەرىنىڭ پورترەتى سالىنعان شتەندەر دايىنداپ جاتىر. ولار 9 مامىر جەڭىس كۇنى تاڭەرتەڭگى ساعات 9.00-دان «ماڭگى ءتىرى پولك» قوستاناي قالاسىنداعى ورتالىق الاڭىنان جەڭىس ساياباعىنا دەيىن كوشەلەرمەن ءجۇرىپ وتەدى. بۇل ەرلىككە تاعزىمنىڭ, وتانعا سۇيىسپەنشىلىكتىڭ, يماندىلىقتىڭ كورىنىسى بولماق. ودان ءارى قاراي جەڭىس كۇنى سالتاناتى اتالعان ساياباقتاعى اڭگىلىك وت پەن داڭق مەموريالىنا گۇل شوقتارىن قويۋمەن جالعاسادى. «ماڭگى ءتىرى پولك» قۇرۋدى وسىدان بىرنەشە جىل بۇرىن «نۇر وتان» پارتياسىنىڭ وبلىستىق فيليالى باستاعان بولاتىن. ولار وسى جاقسى ءداستۇردى بيىل دا جالعاستىرادى. ءنازيرا جارىمبەتوۆا. دەرەك, فوتو: قوستاناي قالالىق اكىمدىگىنىڭ ءباسپاسوز قىزمەتى.