ۋاقىت قويىپ وتىرعان تالاپ

تۇڭعىش پرەزيدەنتىمىز وقىعان قابىرعالى ءبىلىم ورداسى قاراعاندى مەملەكەتتىك تەحنيكالىق ۋنيۆەرسيتەتى اسا ماڭىزدى رەفورمالاردى جۇزەگە اسىرۋ شارالارىنىڭ قاشاندا الدىڭعى قاتارىندا جۇرەدى. قوعامدا بولىپ جاتقان وڭ وزگەرىستەرگە سەرگەك قاراپ, ولاردى ىلگەرىلەتۋ بارىسىندا بەلسەندى پوزيتسيا ۇستانۋ – اكادەميك ارستان ماۋلەن ۇلى عازاليەۆ باسقاراتىن وقۋ ورنىنىڭ بولمىس-ءبىتىمىن تانىتاتىن ناقتى نىشاننىڭ ءبىرى بولسا كەرەك. اتالعان ۋنيۆەرسيتەتتە 19 ساۋىردەن باستاپ «ورتا جانە جوعارى مەكتەپتەر جۇيەسىندەگى كوپتىلدى ءبىلىم بەرۋدىڭ ادىستەمەلىك قىرلارىنىڭ ماسەلەلەرى» اتتى حالىقارالىق عى­لىمي-پراكتيكالىق سەمينار ءوتىپ جاتىر. بۇل ماڭىزدى شاراعا ەلىمىزدىڭ تۇكپىر-تۇكپىرىنەن 100-گە تارتا مەكتەپ مۇعالىمدەرى مەن كوللەدج جانە جوعارى وقۋ ورىندارىنىڭ وقىتۋشىلارى كەلىپ, پاندەردى بىردەن ءۇش تىلدە وقىتۋ جونىندەگى تاجىريبەلەرىمەن بولىسۋدە. مامانداردىڭ پىكىرىنشە, كوپتىلدى ءبىلىم بەرۋ ۇدەرىسىن مەكتەپتەن باستاۋ كەرەك. سول سەبەپتى, سەمينارعا قاتىسۋشى ۇستازدار بۇگىن قاراعاندىداعى ن.نۇر­ماقوۆ اتىنداعى №2 مەكتەپ-ينتەرناتتا بولىپ, ءۇش تىلدە وقىتۋ جونىندەگى سىناقتىڭ بارىسىمەن تانىسادى. بۇگىنگى كۇندە بۇل شارۋاداعى باس­تى ماسەلەنىڭ ءبىرى – كوپتىلدىك ءبىلىم بەرۋدى پراكتيكا جۇزىندە ەندىرۋ بولىپ وتىر. ءبىلىم سالاسىنداعى جاڭاشىل رەفورماعا بايلانىستى اتا-انالار تاراپىنان دا كوپتەگەن سۇراقتاردىڭ تۋىندايتىنى زاڭدى. بىراق تا, ومىرشەڭ وزگەرىستەرگە ۇركە قاراۋدىڭ قاجەتى جوق, دەپ ەسەپتەيدى لينگۆيست عالىمدار. «جالپى قورىقپاۋ كەرەك. ارينە, كەي-كەيدە كوڭىلگە كۇدىك ۇيالاۋى دا مۇمكىن, دەگەنمەن تىلدەردى دامىتۋ جال­پى­لاي العاندا جەكە تۇلعانىڭ جان-جاقتى دامۋىنا ىقپال ەتەدى», – دەيدى سەميناردى ۇيىمداستىرۋشىلاردىڭ ءبىرى, قارمتۋ-دىڭ شەت تىلدەرى سەكتسياسىنىڭ مەڭگەرۋشىسى ايلا جۇمابەكوۆا. حالىقارالىق سەمينار جۇمىسىنا قازاقستان رەسپۋبليكاسى اعىلشىن ءتىلىن وقىتۋ قاۋىمداستىعىنىڭ پرە­زي­دەنتى ت.لەتيايكينا, ءۇش تىلدە ءبىلىم بەرۋ ورتالىعىنىڭ ديرەكتورى ل.سىرىمبەتوۆا, بريتان كەڭەسى ارىپتەستىك قارىم-قاتىناستى دامىتۋ جونىندەگى مەنەدجەر ا.بەكتۇروۆا, قاراعاندى قالالىق اعىلشىن ءتىلى وقى­تۋشىلارى قاۋىمداستىعىنىڭ ءتور­ايىمى ف. كاكجانوۆا قاتىسۋدا. جالپى, ءبىلىم بەرۋ ۇدەرىسىندە مەكتەپتەن ۋنيۆەرسيتەتكە دەيىنگى بارلىق دەڭگەيدە كوپتىلدى وقىتۋ جۇيەسىن ەنگىزۋ بىرنەشە ءتىلدى مەڭگەرگەن, ءوزىن-ءوزى دامىتۋ مەن جەتىلدىرۋگە ۇمتىلعان, باسەكەگە قابىلەتتى جانە كوپمادەنيەتتى, كەز كەلگەن جاعدايدا كوممۋنيكاتيۆتى قىزمەتتى ءۇش تىلدە ىسكە اسىرا الۋعا قابىلەتتى تۇل­­­عانى قالىپتاستىرۋدىڭ كەپىلى. سول سەبەپتى, سەمينار اياسىندا پراكتيكالىق ماسەلەلەرگە ەرەكشە نازار اۋدارىلدى. وسى ماقساتتا پروبلەمالىق سەمينارلار, شەبەرلىك ساعاتتارى, دوڭگەلەك ۇستەلدەر ۇيىمداستىرىلدى. سەميناردىڭ قا­تىسۋشىلارى كاسىبي ماقساتتاعى الەۋ­مەتتىك پاندەردى كوپ تىلدە وقىتۋ سالاسىنداعى ۇزدىك پراكتيكتەردىڭ ماتەريالدارىمەن تانىسۋعا مول مۇمكىندىك الدى. «قازىرگى كەزدە اعىلشىن ءتىلىن وقى­تۋدىڭ ءارتۇرلى دەڭگەيلەرىنە سايكەس وقى­تۋدىڭ جاڭا تەحنولوگيالارىن, اقپاراتتىق جانە كومپيۋتەرلىك جۇيەلەر ارقىلى ىزدەنىس جۇمىستارىن جانداندىرا ءتۇسۋدىڭ بارلىق مۇمكىندىكتەرىن تۋدىرۋ قاجەت», دەپ سانايدى ۇستازدار قاۋىمى. شەتەل ءتىلىن وقىتۋدا لينگا­فوندىق قۇرال-جابدىقتار مەن اۋديو, ۆيدەو كەشەنىن پايدالانا وتىرىپ, وقۋشىلاردىڭ اۋىزشا جانە جازباشا اۋدارۋداعى ءبىلىمىن جەتىلدىرىپ, سوزدىك قورىن قوسىمشا جاڭا سوزدەرمەن بايىتىپ, ولاردىڭ وي-ءورىسىن دامىتۋ سەمينارعا قاتىسقان مامانداردىڭ پىكىرىنشە, كەزەك كۇتتىرمەيتىن مىندەت­تەردىڭ ءبىرى. ەرتەڭ, ياعني 22 ساۋىردە حالىقارالىق عىلىمي-پراكتيكالىق سەميناردىڭ سوڭعى كۇنىندە كانادادان جانە نازار­باەۆ ۋنيۆەرسيتەتتەن  عالىمدار كەلىپ, ۇستازدار الدىندا ءدارىس وقيدى دەپ جوسپارلانعان. ال يگى شارانىڭ جابىلۋىندا سەمينارعا قاتىسقان مۇعالىمدەر مەن ۇستازدارعا بىلىكتىلىكتەرىن جەتىل­دىرگەندەرى جونىندە سەرتيفيكاتتار مەن كۋالىكتەر سالتاناتتى جاعدايدا تابىس ەتىلمەك. قايرات ءابىلدينوۆ, «ەگەمەن قازاقستان» قاراعاندى