جەرگىلىكتى پوليتسياعا ارتىلار مىندەت زور

قازىرگى تاڭدا جەرگىلىكتى اكىمنىڭ قۇزىرەتى ەداۋىر كەڭەيتىلگەن. ەندى اكىم جەرگىلىكتى پوليتسيا قىزمەتى الدىنا قوعامدىق ءتارتىپتى ساقتاۋدى قامتاماسىز ەتۋ بويىنشا مىندەتتەر قويۋعا جانە ولاردىڭ ورىندالۋىن تالاپ ەتۋگە قۇقىلى. بۇل جونىندە كەشە ورتالىق كوممۋنيكاتسيالار قىزمەتىندە وتكەن بريفينگتە ىشكى ىستەر مينيسترلىگى اكىمشىلىك پوليتسيا كوميتەتىنىڭ توراعاسى يگور لەپەحا اتاپ ءوتتى. نەگىزىنەن «100 ناقتى قادام» – ۇلت جوسپارىنىڭ 30-شى قادامىن ىسكە اسىرۋداعى باستى ماقسات – جەرگىلىكتى اتقارۋشى ورگاندار مەن جەرگىلىكتى قاۋىمداستىققا ەسەپ بەرەتىن جەرگىلىكتى پوليتسيا قىزمەتىن قۇرۋ. ال جەرگىلىكتى پوليتسيا قۇقىق بۇزۋشىلىقتىڭ الدىن الۋ, قوعامدىق ءتارتىپتى قورعاۋ, جول قوزعالىسى قاۋىپسىزدىگىن قامتاماسىز ەتۋ, قىلمىستىڭ ورىن الماۋىن ەسكەرتۋ جانە جولىن كەسۋ, اكىمشىلىك قۇقىق بۇزۋشىلىق ىستەرىن جانە قىلمىستىق تەرىس قىلىقتار بويىنشا حاتتامالىق نىساندا سوتقا دەيىنگى تەرگەۋ جۇرگىزۋمەن اينالىساتىن بو­لادى. «جەرگىلىكتى پوليتسيا قىزمەتىنىڭ قۇرامىنا ۋچاسكەلىك ينسپەكتورلار, يۋۆەنالدىق, جول-پاترۋلدىك, تابيعاتتى قورعاۋ, ايەلدەردى زورلىق-زومبىلىقتان قورعاۋ بولىنىستەرى (25 مىڭنان استام بىرلىك) بىرىكتىرىلىپ وتىر», دەدى يگور لەپەحا. كوميتەت توراعاسى بۇل رەتتە اكىمشىلىك پوليتسيا كوميتەتىنىڭ قۇرىلىمى وزگەرتىلىپ, جەرگىلىكتى پوليتسيا قىزمەتىن ۇيلەستىرۋ باس­قارماسى قۇرىلعاندىعىنا نازار اۋدارادى. ەندى ونىڭ قۇرامىندا جەرگىلىكتى اتقارۋشى ورگاندارىمەن ءوزارا ءىس-قيمىل جاساسۋ جونىندەگى جاڭا ءبولىم قۇرىلاتىن بولادى. ورايى كەلگەندە ايتا كەتۋ كەرەك, وبلىس اكىمدەرىنە جەرگىلىكتى پوليتسيا قىزمەتى باسشىلارىن لاۋازىمعا تاعايىنداۋ جانە ودان بوساتۋ قۇقىعى بەرىلگەن. سونداي-اق, جەرگىلىكتى پوليتسيا قىزمەتىن باعالاۋ حالىق پىكىرىنە نەگىزدەلەتىندىكتەن, جپق باسشىسى جىلىنا كەمىندە ەكى رەت اكىمدىكتەر مەن ءماسليحاتتار الدىندا, ال ءبىر رەت حالىق الدىندا ەسەپ بەرەتىنى بەلگىلى بولىپ وتىر. جپق جۇمىسىن ۇيىمداستىرۋداعى وسىنداي قادام جەرگىلىكتى اتقارۋشى ورگاندارمەن تىعىز بايلانىستا جۇمىس ىستەۋگە مۇمكىندىك بەرەدى جانە وسى قىزمەت ءۇشىن ەكى جاقتان باقىلاۋدى قامتاماسىز ەتەدى دەپ كۇتىلۋدە. ي.لەپەحانىڭ كەلتىرگەن ءما­لىمەت­تەرىنە قاراعاندا, وقيعا ىزىمەن جول-پاترۋلدىك پوليتسيا جاساقتارىنىڭ قىلمىستى اشۋى 28,5 پايىزعا (5950-دەن 7648-گە دەيىن) ارتىپ وتىر. جانە ۋچاسكەلىك ينسپەكتورلاردىڭ (7654-تەن 9492-گە دەيىن) قىلمىستاردى اشۋ سانى ءۇش ەسەگە وسكەن. بۇدان باسقا, انىقتالعان اكىمشىلىك قۇقىق بۇزۋشىلىقتاردىڭ سانى 30 مىڭعا ارتىپ وتىر. مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋباەۆ رەتى كەلگەندە تۇرعىنداردىڭ ءوز ۋچاسكەلىك پوليتسيا ينسپەكتورلارى تۋرالى حاباردار بولۋىن ارتتىرۋ ءۇشىن مينيسترلىكتىڭ ۆەدومستۆولىق ۆەب-پورتالىندا ارنايى بەت قۇرىلعاندىعىمەن ءبولىستى. تارقاتىپ ايتقاندا, تۇرعىندار ءوز ۋچاسكەلىك ينس­پەكتورلارى, ولاردىڭ دەربەس دەرەكتەرى جانە جۇمىس رەجىمى تۋرالى مالىمەتتەردى تابا الادى. سونداي-اق, جەرگىلىكتى اتقارۋشى ورگانداردىڭ ءرولىن ارتتىرۋ ءۇشىن مينيسترلىك وبلىستىق دەڭگەيدەگى جپق باسشىلىق لاۋازىمىنا كادر­لار رەزەرۆىنىڭ كانديداتتارىن ىرىكتەۋدە وڭىرلەر اكىمدەرىمەن الدىن الا كەلىسپەك. ياعني, ءىىد كادر­لار كوميسسياسىنىڭ قۇرامىنا وڭىرلىك اكىمدىكتەر وكىلدەرى كىرەتىن بولادى. وسىلايشا جەرگىلىكتى پوليتسيا مەن اكىمدەر اراسىندا ءوزارا ىقپالداسۋدىڭ وڭتايلى ۇلگىسى جاسالماقشى. سونىمەن قاتار, اكىمشىلىك پوليتسيا كوميتەتىنىڭ توراعاسى قازىرگى كەزدە جەرگىلىكتى اتقارۋ ورگاندارى جەرگىلىكتى پوليتسيا قىزمەتىنە 9 مىڭ بىرلىك بەينە-تىركەگىشتەر ساتىپ العاندىعىن جەتكىزدى. تاعى قوسىمشا 7,6 مىڭ بىرلىك قاجەت كورىنەدى. جانە دە جىل سوڭىنا دەيىن 2,5 مىڭ الىپ جۇرەتىن جانە 140 ءموبيلدى بەينەتىركەگىشتەردى ساتىپ الۋ جوس­پارلانىپتى. جىل باسىنان بەينەتىركەگىشتەر كومەگىمەن 17 مىڭنان استام قۇقىق بۇزۋشى جاۋاپكەرشىلىككە تارتىلعان. ونىڭ ىشىندە 100-دەن استامى قىلمىستىق ساناتقا جاتادى ەكەن. اسقار تۇراپباي ۇلى, «ەگەمەن قازاقستان»