ەلباسى مانيفەسى: بەيبىت ومىرگە ۇندەۋ

بۇل – وتە ورىندى باستاما

ءبىز, ۇلتتىق عىلىم اكادەمياسىنىڭ ۇجى­مى, مەملەكەت باسشىسى نۇرسۇلتان نازارباەۆتىڭ «الەم. ءححى عاسىر» ماني­فەسىن زور ىقىلاسپەن قابىل الدىق. ءححى عاسىرعا اياق باسقان ادامزات كۇردەلى كەزەڭدى باستان كەشىرىپ وتىر. ۇلاسپالى ەكونوميكالىق داعدارىستاردان ءال-اۋقاتى السىرەگەن الەمگە جاڭا قاتەر ءتونىپ تۇر. جانە ونىڭ اۋقىمى جالپى ادامزاتتىڭ بولاشاعىنا بالتا شابۋى مۇمكىن. ول – جاھاندىق سوعىس قاۋپى. حح عاسىر تاجىريبەسى سوعىس سالقىنىنىڭ زاردابى قانشالىقتى قاسىرەتكە تولى ەكەنىن كورسەتتى. ميلليونداعان ادام ساياسي جانە ەكونوميكالىق الاۋىزدىقتىڭ قۇربانىنا اينالىپ, تۇتاس قالالار مەن مەملەكەتتەر جەر بەتىنەن جويىلدى. جەر داۋى, شيكىزات ءۇشىن تالاستان تۋىنداعان كوزقاراستار قاراما-قايشىلىعى الەم الپاۋىتتارىن ءبىر-بىرىنە قارسى قويىپ, جاپپاي قىرىپ-جويۋ قارۋلارىنىڭ سىنالۋىنا سەبەپشى بولدى. وسىنىڭ ءبارى, سايىپ كەلگەندە, ادامزاتپەن قاتار قورشاعان ورتاعا زالالىن كەلتىرىپ, ورنى تولماس شىعىنعا ۇشىراتتى. وسىنى ەسكەرە كەلە, وتكەن عاسىردىڭ قاتەلىگىن قايتالاماي, الەمدى زورلىق-زومبىلىقتان ازات ەتۋ ءۇشىن مەملەكەت باسشىسىنىڭ «ءححى عاسىر: سوعىسسىز الەم» اتتى كەڭ اۋقىمدى باعدارلاماسىن ازىرلەۋ تۋرالى باستاماسىن وتە ورىندى دەپ سانايمىز. بۇل قۇجات مەملەكەتتەر اراسىنداعى تالاس-تارتىستارعا توسقاۋىل بولىپ, الەمدى بەيبىت ومىرگە باستايدى دەپ سەنەمىز. قازاقستان رەسپۋبليكاسى ۇلتتىق عىلىم اكادەمياسى

جاھان كەلبەتىنىڭ ايقىن بەينەسى

ءبىز, دۇنيەجۇزى قازاق­تارى­نىڭ قاۋىمداستىعى, مەم­لەكەت باسشىسى نۇرسۇلتان نازارباەۆتىڭ «الەم. ءححى عاسىر» مانيفەسىمەن مۇقيات تانىسىپ شىقتىق. مۇندا ەلباسىنىڭ «ءححى عاسىر: سوعىسسىز الەم» اتتى كەڭ اۋقىمدى باعدارلاما ازىرلەۋ تۋرالى باستاماسى دەر كەزىندە كوتەرىلگەن ءارى وزەكتى ۇسىنىس ەكەنىن اتاپ وتكىمىز كەلەدى. پرەزيدەنتىمىز وسىناۋ ماڭىزدى قۇجاتتا ءتورتىنشى ونەركاسىپ توڭكەرىسىنىڭ تابالدىرىعىندا تۇرعان الەمدەگى عىلىمي جاڭالىقتار مەن جاڭا بۋىن تەحنولوگيالارىنىڭ ماڭىزىنا ەرەكشە ءمان بەرەدى. ءبىلىم مەن عىلىمعا دەن قويعان ادامزات ءوز دامۋىنىڭ ساپالى جاڭا ساتىسىنا وتكەنىن ەسكەرتەدى. الايدا, حالىقارالىق جاعدايدى ۋشىقتىرعان سوعىس ۆيرۋسى الداعى جاساندى ينتەللەكت توڭىرەگىندەگى جاڭالىقتارعا كەسەل جۇقتىرۋعا دايىن تۇر. ول اسكەري-ونەركاسىپتىك كەشەننىڭ الەۋەتىن ارتتىرىپ, ونى ويلاپ تاپقان ادامزاتتىڭ وزىنە قارسى قويىلعان قاۋىپتى قارۋعا اينالۋدا. مەملەكەت باسشىسى اتاپ وتكەندەي, سوعىستىڭ تامىرىنا بالتا شابۋ – ادامزاتتىڭ ەڭ كۇردەلى وركەنيەتتىك مىندەتى. مەملەكەتتەر اراسىنداعى ەشبىر تالاس-تارتىس سوعىس ارقىلى وڭ شەشىمىن تاپپايدى. سەبەبى, بىردە-ءبىر سوعىستا جەڭىمپاز جوق, وندا ءبارى دە جەڭىلەدى. سوندىقتان, ءبىز, دۇنيەجۇزى قازاقتارىنىڭ قاۋىمداستىعى, ەلباسىنىڭ «الەم. ءححى عاسىر» مانيفەسى ادامزاتقا وي سالىپ, الەمدى سوعىس ىندەتىنەن قۇتقارادى دەپ سەنەمىز. دۇنيەجۇزى قازاقتارىنىڭ قاۋىمداستىعى

گۋمانيستىك يدەيانىڭ وزىق ۇلگىسى

ءبىز, قازاقستان كاسىپوداق­تارى فەدەراتسياسىنىڭ ۇجىمى, مەملەكەت باسشىسىنىڭ «الەم. ءححى عاسىر» مانيفەسىن زور قۋانىشپەن قابىل الدىق. بۇل قۇجات – قازىرگى قوعامنىڭ جاھاندىق كەلبەتىنىڭ ايقىن بەينەسى. بارشا ادام بالاسى ءححى عاسىرعا بەيبىت ءومىردىڭ جاڭا بەلەسى رەتىندە زور ءۇمىت ارتقانى شىندىق. وتكەن عاسىردىڭ وكىنىشتى تاجىريبەسىنەن ساباق العان ادامزات بار كۇش-جىگەرىن سوعىستان ازات قوعام قالىپتاستىرۋ ءۇشىن جۇمساۋعا تالپىندى. وسى ورايدا, اتوم بومباسىنىڭ اۋىر زاردابىن تارتقان مەملەكەت رەتىندە قازاقستان ءبىرىنشى بولىپ جاپپاي قىرىپ-جويۋ قارۋىنان باس تارتىپ, سەمەي پوليگونىن جاپتى. وسىلايشا, بەيبىت ومىرگە ۇمتىلعان گۋمانيستىك يدەيانىڭ وزىق ۇلگىسىن دۇنيەجۇزىنە پاش ەتتى. الايدا, ازىق-ت ۇلىك پەن شيكىزاتقا دەگەن اشكوزدىك, پايدالى قازبالارعا دەگەن قاناعاتسىزدىق مەملەكەتتەر اراسىنا وت سالىپ, تەررورلىق اگرەسسيانى ودان بەتەر ءورشىتىپ وتىر. سوندىقتان, قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ «الەم. ءححى عاسىر» مانيفەسىن جەر تۇرعىندارىن تاتۋ كورشىلىك پەن بەيبىت ومىرگە شاقىراتىن سيمۆولدىق مانگە يە بارشاپلانەتالىق ۇندەۋ دەپ سانايمىز. قازاقستان كاسىپوداقتارىنىڭ فەدەراتسياسى

ءومىر قاجەتتىلىگىنەن تۋعان ماڭىزدى شارا

ءححى عاسىر – بار بولمىسى­مەن اعىمداعى عىلىم مەن ءبىلىمدى تاپقىرلاپ, كونەنى جاڭعىرتىپ, باردى جەتىلدىرىپ, بارشا قىرىنان جاڭارىپ وتىرۋعا باعىتتالعان عاسىر. دەسەك تە, ول ءبىلىمنىڭ «سوعىس» اتتى تۇرپايى قۇرىلىمدى جەتىلدىرۋگە نەگىزدەلىپ, يادرولىق قارۋ-جاراق شىعارۋ جولىندا ىزگىلىك پەن ادامگەرشىلىك كاتەگوريالارىنان اۋىتقۋى تورتكىل دۇنيەنى قىنجىلتىپ كەلەدى. سانسىز ۋايىم تۋعىزعان بۇل جايت بەيبىتشىلىك پەن كەلىسىم, تۇراقتىلىق پەن ىنتىماقتاستىق جولىنداعى باعىتى الەم ءۇشىن ۇلگى بولاتىنداي دەڭگەيگە جەتكەن قازاقستان ءۇشىن جىراقتا قالمادى. ەلباسىنىڭ «الەم. ءححى عاسىر» مانيفەسى وعان دالەل بولعانداي. مانيفەست ءومىر قاجەتتىلىگىنەن تۋىنداعان ماڭىزدى شارا, ەلباسى­نىڭ تاجىريبەلىك ويلاۋىنىڭ ناتيجەسى, ءتىپتى ءىرى دەرجا­ۆالاردىڭ وزىندىك مەنمەندىگى سالدارىنان پايدا بولعان تالاس-تارتىس جاعدايىندا لاي سۋعا قۇيعان تازا بۇلاق ىسپەتتەس. بۇل ورايدا, قازاقستان جوو-لارىنىڭ قاۋىمداستىعى, مانيفەستى بۇكىل جاھاندى دۇرلىكتىرگەن حالىقارالىق تەرروريزمگە قارسى كۇرەستە الەمدىك قوعامداستىقتى بىرىكتىرۋشى قۋاتتى قۇجات دەپ سانايدى. جانە ونىڭ الەم كوشباس­شىلارىنىڭ يگى ىستەرىنە باستاما بولاتىنىنا كامىل سەنەدى. سەبەبى, ادامزات قارەكەتى ءبىرىنشى كەزەكتە ىزگىلىك پەن باقىتتى ءومىر قۇرۋعا نەگىزدەلۋى ءتيىس. قازاقستان جوعارى وقۋ ورىندارىنىڭ قاۋىمداستىعى

كىم-كىمگە دە وي سالار ساليقالى ءسوز

الەم ءبىزدىڭ حالقىمىزدى ءجۇز­دەن اسا ۇلتتىڭ باسىن تاتۋلىق شا­ڭى­راعىنىڭ استىنا بىرىكتىرگەن بەيبىتشىلىك پەن جاناشىرلىقتىڭ جارشىسى رەتىندە تانيدى. سونداي-اق, ءبىز – ادامزاتقا زالالى مول اتوم بومباسىنان ءبىرىنشى بولىپ باس تارتقان مەملەكەتپىز. «اتوم» جوباسى, ماگاتە-ءنىڭ قولداۋىمەن قازاقستاندا تومەن بايىتىلعان ۋران بانكىن قۇرۋ – وسىنىڭ بارىنە باستاماشى بولعان مەملەكەت باسشىسىنىڭ كەلەر ۇرپاقتىڭ جارقىن بولاشاعى الدىنداعى قامقورلىعىن, جاناشىرلىعىن پاش ەتەدى. ەندى, مىنە, پرەزيدەنتىمىز سوعىسسىز قوعام قۇرۋعا ۇندەيتىن «الەم. ءححى عاسىر» مانيفەسىمەن الەمدىك قوعامداستىققا ساليقالى وي سالىپ وتىر. وندا سوڭعى 25-30 جىلدا ورىن العان ماڭىزدى وقيعالار مەن شەشىمدەرگە تەرەڭ تالداۋ جاسالىپ, ولاردىڭ ادام ءومىرى مەن قاۋىپسىزدىگىنە ىقپالى جان-جاقتى زەردەلەنگەن. سونىمەن قاتار, مەملەكەت باسشىسىنىڭ مانيفەسى عارىش كەڭىستىگىندە, الەم مۇحيتتارىنىڭ ءتۇبى مەن ورتاق سۋلارىندا, اركتيكادا زياندى قارۋ-جاراقتاردى ساقتاۋعا تىيىم سالاتىن جاھاندىق شەشىم قابىلداۋ تۋرالى ۇسىنىسىمەن قۇندى. بۇل رەتتە, ءبىز, قازاقستان كومپوزيتورلارىنىڭ قاۋىمداس­تىعى, قۇجاتتىڭ ماڭىزدىلىعىن ەسكەرىپ, ونىڭ جاھاندىق سوعىس ۆيرۋسىنا توسقاۋىل بولاتىنىنا سەنەمىز. قازاقستان كومپوزيتورلارىنىڭ قاۋىمداستىعى

زامان تالابى تۋىنداتقان قۇجات

1991 جىلى ەلباسىنىڭ باستاماسىمەن جابىلعان سەمەي يادرولىق پوليگونى الەم تاجىريبەسىندەگى تاريحي جاعداي بولدى. ەندى عانا ەگەمەندىك العان جاس مەملەكەت بۇل ارەكەتىمەن ءوزىنىڭ دامۋ باعىتىن جاھان الدىندا ايقىنداپ, ءتىپتى, الەمدىك يادرولىق ارسەنالداردىڭ جابىلۋىنا تۇرتكى بولا ءبىلدى. يادرولىق قارۋدان ازات الەم قۇرۋ جانە حالىقارالىق تەرروريزم كۇشىن السىرەتۋ – وسى قاتىگەز جايتتار جاھان­دىق جۇيە كۇن ءتارتىبىنىڭ باستى ماسەلەلەرى مەن ەڭ ماڭىزدى وركەنيەتتىك مىندەتكە اينالىپ وتىر. ال ونىڭ وڭ شەشىم تابۋى – تەك بەيبىتشىلىك پەن ىمىرالىقتى كوزدەيتىن, ەتەك-جەڭى جيناقى جاندارعا بەرىلگەن مۇمكىندىك. بۇل ماقسات  – ەلباسى ن.نازارباەۆتىڭ «الەم. ءححى عاسىر» مانيفەسىنە ارقاۋ بولدى. سەبەبى, قازاقستان بەيبىت الەمدى قالايدى, بارشا ادامزاتقا سول بەيبىتشىلىك پەن تۇراقتىلىقتى تىلەيدى. مانيفەست – الەمدىك قوعامداستىقتىڭ نۇرسۇلتان نازارباەۆتى كورەگەن ساياساتكەر رەتىندە قابىلداۋىنىڭ تاعى ءبىر نىق دالەلى. قۇجات – ادامزاتتىڭ بولاشاق تاعدىرىنا الاڭداۋشىلىق پەن ىشكى جان-تەبىرەنىس ناتيجەسىندە تۋىنداعان زامان تالابى. گەنەرالدار كەڭەسى

مارتەبەمىزدى اسىرعان مانيفەست

ەلباسىمىز ۇسىنعان «الەم. ءححى عاسىر» مانيفەسى – قازىرگى تاڭداعى مەملەكەتتەر مەن كونفەسسيالار اراسىنداعى قايشىلىقتاردى شەشۋگە ىقپال جاسايتىن ماڭىزدى قادام. ادامزاتتى قارۋسىزدانۋعا شاقىرىپ, بەيبىتشىلىككە ۇندەيتىن ەلباسى باستاماسى قازاقستاننىڭ الەم الدىندا مارتەبەسىن تاعى ءبىر مارتە ارتتىرعانى ءسوزسىز. «الەم. ءححى عاسىر» مانيفەسى – سوعىستان ازات قوعام قۇرۋعا شاقىراتىن قايتالانباس قۇجات. وندا «سوعىس» دەگەن زۇلماتتان ەشكىم جەڭىمپاز بولىپ شىقپايتىندىعى, تالاس-تارتىستاردى تەك بەيبىتشىلىك پەن قاۋىپسىزدىك قاعيداتتارىنا نەگىزدەلگەن كەلىسسوزدەر ارقىلى شەشۋ كەرەكتىگى ايتىلعان. قىرىپ-جوياتىن يادرولىق قارۋدان العاش بولىپ ءوز ەركىمەن باس تارتقان جانە تاتۋلىق پەن كەلىسىمنىڭ مەكەنىنە اينالعان قازاقستاننىڭ باستاماسى بۇۇ باس اسسامبلەياسى مەن قاۋىپسىزدىك كەڭەسىنىڭ قىزۋ قولداۋىنا يە بولىپ, رەسمي قۇجات مارتەبەسىن الدى. وعان الەمنىڭ الپاۋىت ەلدەرى مەن يادرولىق دەرجاۆالار دا ءۇن قوسادى دەپ سەنەمىز. سەبەبى, الەمدە بەيبىتشىلىك پەن تىنىشتىققا تەك بىرلەسە وتىرىپ قانا قول جەتكىزۋگە بولادى. ەۋرازيالىق قۇقىق قورعاۋ ورتالىعى