وڭتۇستىك قازاقستاندا 56 جاستاعى ايەل مەن 7 جاسار قىز جوعالىپ كەتتى

استانا. 20 ءساۋىر. وڭتۇستىك قازاقستان وبلىسى, تۇلكىباس اۋدانى, ءداۋبابا اۋىلىندا 56 جاستاعى ايەل مەن 7 جاسار قىز جوعالىپ كەتتى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. وقيعا ءداۋبابا اۋىلىندا بولعان. تۋىستارىنا قىدىرىپ بارعان اشىركۇل بايمۇراتوۆا كىشكەنتاي ينابات ەسىمدى ءسىڭىلىسىن ەرتىپ, تاۋعا قاراي كەشتەتىپ سەرۋەندەپ كەلۋگە شىعىپ كەتكەن. سودان قايتا ورالماعان. «سول كۇنى جاۋىن جاۋىپ تۇر ەدى», – دەيدى 7 جاستاعى قىزدىڭ ناعاشى اجەسى گۇلجان تۇياقوۆا. ونىڭ ايتۋىنشا, اشىركۇل بولە ءcىڭىلىسىنىڭ ۇيىنە ءجيى قىدىرىپ كەلىپ تۇرعان. تاۋعا شىققاندى جاقسى كورەدى ەكەن. بۇعان دەيىن ونى ءداۋبابا شاتقالىنا جول بىلەتىن ەرەسەك ازاماتتار الىپ بارىپ جۇرگەن. سول كۇنى ەشكىمنىڭ قولى بوس بولماعان سوڭ كەشكى 18.00 شاماسىندا «جاقىن جەرگە بارىپ كەلەمى» دەپ 1-سىنىپتا وقيتىن يناباتتى ەرتىپ كەتكەن. سونداي-اق, ونىڭ تۋىستارى: «ىمىرت يىرىلگەنشە كۇتتىك, بىراق سودان قايتا كەلمەدى», – دەيدى. ازىرگە ولاردى كورگەن ادام جوق. سول كۇننەن باستاپ ىزدەۋ جۇمىستارىنا قۇتقارۋشىلار مەن پوليتسەيلەر جانە ەرىكتى اۋىل ازاماتتارى دا جۇمىلدىرىلعان. ءتىپتى ءيىس سەزگىش يت پەن ارنايى تەحنيكالار پايدالانىلۋدا. تالعات رايىمبەك. دەرەك, فوتو: 24.kz.