شورتاندى كەنتىندە «بيزنەستىڭ جول كارتاسى – 2020» مەملەكەتتىك باعدارلاماسىمەن سالىنعان زامانالىق ديىرمەن كەشەنىن ىسكە قوسۋ سالتاناتى بولىپ ءوتتى. وعان اقمولا وبلىسىنىڭ اكىمى سەرگەي دياچەنكو, قازاقستان پارلامەنتى ءماجىلىسىنىڭ دەپۋتاتى ۆالەري كوتوۆيچ قاتىسىپ, جۇرتشىلىقتى جىلدىڭ جەمىستى قادامىمەن قۇتتىقتادى.
بۇگىنگى كۇن تالاپتارىنا ساي, الەمدىك ستاندارتتارعا تولىق جاۋاپ بەرەتىن كاسىپورىن تاۋلىگىنە 120 توننا ءونىم شىعارا الادى. بەلگىلى كاسىپكەر سۇيىندىك داۋكەنوۆ باسقاراتىن «دارجان گرۋپ» جاۋاپكەرشىلىگى شەكتەۋلى سەرىكتەستىگى قولعا العان جوبانىڭ جالپى قۇنى 3,5 ميلليون اقش دوللارىن قۇرايدى. ونى قامتاماسىز ەتۋگە وبلىس جانە سەرىكتەستىك قارجىسىمەن قاتار, «تسەنتر كرەديت بانك» اكتسيونەرلىك قوعامىنىڭ نەسيەسى جۇمىلدىرىلدى. قىسقا مەرزىمدە قاتارعا قوسىلعان كەشەندە تۇركيانىڭ تەحنولوگيالىق وزىق جەلىسى مەن جابدىقتارى ورناتىلىپ, سىيىمدىلىعى 7500 توننالىق قويما, 40 توننالىق ەلەكتروندى تارازى, كەبەكتى ءتۇيىرشىكتەۋ تسەحى, اكىمشىلىك-تۇرمىستىق عيمارات, كىرمە جولدار پايدالانۋعا بەرىلدى. ءبولەكتەپ ايتارلىعى, ءزاۋلىم كەشەن وڭىردە العاشقى بولىپ جىلۋدى ءوندىرۋ مەن پايدالانۋدىڭ وزىق تەحنولوگياسىن سىناقتان وتكىزىپ جاتقاندىعى دەر ەدىك. ماماندار ونىڭ بولاشاعى زور ەكەندىگىن مالىمدەۋدە.
اۋدان اكىمى سايات قامزەباەۆ زامانالىق كەشەن شورتاندىنىڭ الەۋمەتتىك-ەكونوميكالىق دامۋىنا ەلەۋلى سەرپىن بەرەتىنىن ايتادى. مۇندا قازىردىڭ ءوزىندە 60 ادام جۇمىسقا تارتىلىپ, ايلىق ورتاشا ەڭبەكاقى 45 مىڭ تەڭگەدەن اينالۋدا. بيۋدجەت قورجىنى دا بۇيىرلەنىپ قالدى. بىراق, الدا جاڭا جوبالاردى ىسكە اسىرۋ مىندەتى تۇر. ەلباسى تاپسىرماسىن مۇلتىكسىز ورىنداۋ شورتاندىلىقتاردىڭ ابىرويلى پارىزى سانالادى.
باقبەرگەن امالبەك.
اقمولا وبلىسى, شورتاندى اۋدانى.
