ولجا تاپقان وقۋشىلار

ادالدىقتىڭ ۇلگىسىن كورسەتتى سايرام اۋدانىنداعى № 26 م.قاشقاري اتىنداعى مەكتەپتىڭ اتاعى ءاپ-ساتتە اسپانداپ شىعا كەلدى. تاڭعالعاندارى دا, تامسانعاندارى دا جەتەرلىك. تىپتەن, وزگە مەكتەپتىڭ مۇعالىمدەرى ءوز وقۋشىلارىنا م.قاشقاري اتىنداعى مەكتەپتى ۇلگى ەتىپ, سول مەكتەپتىڭ وقۋشىلارىنداي ادال بولۋعا, تاربيەلى دە, وقۋدا وزات بولۋعا شا­قىرىپ جاتتى. شالعايداعى مەكتەپتىڭ ءبىر ساتتە بۇلايشا ابىرويلى بولا قالۋى كۇنى كەشە وتكەن سايلاۋدا مەكتەپ ديرەكتورىنىڭ باسىم داۋىسپەن اۋداندىق ماسليحاتقا دەپۋتات بولىپ سايلانعانى ەمەس, ءدال وسى مەكتەپتە وقيتىن ەكى وقۋشىنىڭ قوماقتى قارجى تاۋىپ الىپ, ونى يەلەرىنە قايتارۋى بولاتىن. سول كۇنى مەكتەپتەن قايتقان وقۋشىلاردىڭ ويلارىندا تۇك جوق ەدى. وقۋ ۇلگەرىمدەرى جاقسى, تارتىپتەرى ۇلگىلى ەكى وقۋشى ەرتەڭگى بولاتىن ساباق بارىسى تۋرالى وي ءبولىسىپ كەلە جاتقان. كەنەت, جول جيەگىندە جاتقان ءامياندى بايقاپ قالعان ولار اشىپ كورگەندە, ءوز كوزدەرىنە وزدەرى سەنبەدى. ءبىر بۋما كىلەڭ 10 مىڭدىق تەڭگەلەردى كورىپ, ابدىراپ قالعاندارى راس ەدى. وتىرا قالىپ سانادى, تۇپ-تۋرا 1 ميلليون 50 مىڭ تەڭگە! تەز شەشىم قابىلداندى. قالايدا قارجىنىڭ يەسىن تاۋىپ, قايتارۋ كەرەك. وسى شەشىمگە توقتالعان وقۋشىلار كوپ ۇزاماي-اق جوق ىزدەۋشىنى تاپتى. ول – بەلگىلى كاسىپكەر, اۋىل ازاماتى ەكەن. كاسىپكەردىڭ ايتۋىنشا, قارجىسىن جوعالتقان كۇنى شىمكەنتتەن قاجەتتى تاۋارلار الۋ ءۇشىن تاڭەرتەڭ 1 ميلليون 50 مىڭ تەڭگە الىپ شى­­عىپ, ونى ءتۇسىرىپ العانىن بايقاماعان. قار­جىسىنىڭ جوق ەكەنىن بىلگەندە سان سوعىپ, قايدان ىزدەرىن بىلمەي تۇرعاندا... جوعالتقانى الدىنان شىقتى. العاش سەنگەن جوق, 2 وقۋشى جوعىن قايتارعاندا مۇنداي ادالدىقتى تىپتەن ويلاماعان وتاعاسى وقۋشىلاردى قۇشاقتاپ, سۇيە بەرسە كەرەك. سايرام اۋداندىق ىشكى ىستەر ءبولىمى جەر­گىلىكتى پوليتسيا قىزمەتىنىڭ باسشىلىعى م.قاش­قاري اتىنداعى مەكتەپتىڭ وقۋشىلارى تاحيرجان ۋرمانوۆ پەن ءابدىنابي احمەدوۆتى ارنايى ىزدەپ كەلىپ, باسقارمانىڭ العىس حاتىن تابىس ەتتى جانە مەكتەپ اكىمشىلىگىنە وقۋشىلاردى ادالدىققا تاربيەلەگەندەرى ءۇشىن العىس ايتتى. ەرداۋلەت تۇراپبەك ۇلى  وڭتۇستىك قازاقستان وبلىسى, سايرام اۋدانى