ءتىس ەمدەۋدىڭ تىڭ ءتاسىلى

– جاس عالىمنىڭ جاھاندىق جاڭالىعى ۇلىبريتانيا جانە سولتۇستىك يرلانديا بىرىككەن كورولدىگىندە «بولاشاق» باعدارلاماسى بويىنشا وقىپ كەلگەن جاس مامان باۋىرجان ايتۋوۆ باسقاراتىن InnoDent كومپانياسى مەديتسينا سالاسىندا بۇرىن-سوڭدى بولماعان پرەپارات ويلاپ تاپتى.  جاڭا جابدىقتىڭ اتى – InnoDent. ول الەمنىڭ اقش, يزرايل, رەسەي, قىتاي مەن جاپونيا سياقتى مەديتسيناسى جاقسى دامىعان مەملەكەتتەرىندە دە جوق. ءبىز ءسوز ەتىپ وتىرعان InnoDent ءدارىسى كاريەستى ەمدەۋگە ارنالعان. ءدارى ءتىستى باستاپقى كەزدەگى قال­­پىنا كەلتىرەدى. باۋىرجان اي­تۋوۆتىڭ ايتۋىنشا, InnoDent كاريەستى ەرتە ساتىسىندا ەمدەۋ ءۇشىن پايدالانىلادى, تەز ءارى اۋىرت­پاي ەمدەيدى. بۇگىندە ەلىمىزدە كاريەستىڭ كەڭەس وداعىنان قالعان مەديتسي­نالىق ءتاسىل بويىنشا ەمدەلىپ جاتقانى بەلگىلى. ونىڭ كەڭ تا­رالعان ءتاسىلى – پلومبا ورنا­تۋ. ءبىزدىڭ ەمحانالارىمىزدا ءدا­رىگەرلەر جاڭا ساپالى پلوم­با­لىق ماتەريالداردى پايدالانادى. سوڭعى كەزدەرى كاريەستى اۋىرتپاي ەمدەيتىن قازىرگى زا­مانعى ستوماتولوگيالىق قۇرال-جابدىقتار قولدانىلادى. قازىر, جاسىراتىنى جوق, ادامداردىڭ بارلىعى كاريەستى ەمدەۋ ءۇشىن وسى تاسىلگە جۇگىنەدى. ادامدار ءتىستى تازالاپ, پلومبا جاساتىپ الۋعا ۇيرەنگەن. ونى ءوزىمىز دە جاساتاتىنىمىز جاسىرىن ەمەس. ال باۋىرجان ايتۋوۆتىڭ ۇسىنىپ وتىرعان ءتاسىلى مۇلدەم باسقاشا. ونىڭ ايتۋىنشا, كاريەستى پلومبا جاساتىپ ەمدەۋ ۋاقىتشا نارسە. – پلومبا ساپاسىنا قاراي ءبىر­نەشە جىل عانا تۇرادى. سوندىقتان وسى كۇنگە دەيىن كاريەستى پلومبا جاساتىپ تولىق ەمدەۋ مۇمكىن بولماي تۇر. ال ءبىزدىڭ ويلاپ شىعارعان پرەپاراتىمىز بۇزىلعان ەمالدى قايتا قالپىنا كەلتىرۋ جولىن ۇسىنا الادى. InnoDent ءدارىسى ەمال­دىڭ تابيعي ءوسىپ-جەتىلۋىنە ىقپال ەتەدى. سونىڭ ناتيجەسىندە, حيميالىق پرەپاراتتار مەن اكريلدى ماتەريالداردى پايدالانباي-اق كاريەستىڭ كەسىرىنەن بۇزىلعان ەمالدى جاڭادان قالپىنا كەل­تىرىپ, ءوسىرىپ شىعارۋعا بولادى. ەمدەۋ ۇزاقتىعى – 15 مينۋت.  ەم اۋىرتپاي جاسالادى. جاڭا ەمال ءبىر ايدا ءوسىپ شىعادى. ول ءۇشىن جاڭا پرەپاراتتىڭ ءبىر تامشىسى جەتىپ جاتىر. تىڭ تەحنولوگيا كاريەستى حيرۋرگيالىق ءادىسسىز ەمدەپ شىعۋعا جاڭا مۇمكىندىك بەرەدى. مۇنى ءتىس ەمدەۋ سالاسىنداعى سونى جاڭالىق دەسە بولادى, – دەيدى ول. باۋىرجان ايتۋوۆ بۇل جوبا­نى ءبىرىنشى جىلى «دامۋ» باع­دارلاماسى بويىنشا جۇزەگە اسىر­عان. سوسىن استانادا ەكى جىل جۇ­مىس ىستەپتى. اتالمىش جوبانى عى­لىمي عانا ەمەس, سونداي-اق, بيز­نەس­تىك جوبا دەسە دە بولادى. مۇنى ول ءوزى دە جاسىرمايدى. وسى جوبانى بيزنەسكە اينالدىرۋ ءۇشىن الدىمەن بيزنەس-جوسپار, ونىڭ جولدارى بولۋ كەرەك دەيدى. ونىڭ ايتۋىنشا, قازىر قازاقستان مەن رەسەيدە InnoDent پرەپارا­تىنا قىزىعىپ جاتقان ەكى-ءۇش كومپانيا بار. «قازىر ءبىز­دىڭ جۇمىسىمىزعا, جوبامىزعا قىزىعۋشىلىق تانىتىپ جاتقان كومپانيالار تابىلدى. سولار ارقىلى دارىلەردى ستوماتولوگيالارعا جەت­كىزۋگە تى­­­رىسامىز. دەگەنمەن, ءبىزدىڭ نە­­­گىزگى ماقساتىمىز اقشا تاۋىپ, پايدا كورۋ ەمەس. ءدال قا­زىر ءبىز دارىگەرلەرگە جاڭا ءدارىنى قولدانۋدى ۇيرەتىپ, تاجىريبە ءبولىسۋدى ماقسات ەتىپ وتىرمىز. سودان كەيىن عانا كوتەرمە ساۋدا ارقىلى نارىققا شىعامىز. ول ءۇشىن ءبىز الدىمەن عىلىمي پاتەنت الۋىمىز كەرەك. قازىر ەلى­مىزدە ءدارىنىڭ پاتەنتى بار. ەندى رەسەي مەن قىتايدا پاتەنت الساق, شەتەلدەردىڭ نارىعىنا شىعا الامىز. اسىرەسە, ءبىزدى قىتاي قاتتى قىزىقتىرىپ وتىر. ويتكەنى, ول ۇلكەن نارىق», – دەيدى ول. داستان كەنجالين, «ەگەمەن قازاقستان»