ناۋقانعا دايىندىق ويداعىداي

وبلىستىق اۋىل شارۋاشىلىعى باسقارماسىنىڭ مالىمەتىنشە, بيىل وبلىس القاپتارىنداعى 675400 گەكتارعا ءداندى داقىلدار, 152600 گەكتارعا مايلى داقىلدار, 17500 گەكتارعا كارتوپ جانە 5700 گەكتارعا باقشا داقىلدارى سەبىلمەك. ەگىس القابىنىڭ باسىم بولىگى ەرتىس, جەلەزين جانە ۋسپەن اۋداندارىنا تيەسىلى. بيىلعى جىلدىڭ تاعى ءبىر جاڭالىعى – جىلدا كارتوپ ءوسىرىپ مول ءونىم الاتىن پاۆلودارلىق شارۋاشىلىقتار ەندى پياز ەكپەكشى. كوكتەمگى ەگىس جۇمىستارىنا دايىندىقتىڭ بارىسى تۋرالى وبلىستىق اكىمدىكتە ارنايى جيىن ءوتتى. جيىندا «قازاگرو» اق-تىڭ قۇرىلىمدىق بولىمشەلەرى ءوڭىردىڭ اۋىلشارۋاشىلىق تاۋار وندىرۋشىلەرىنە 1,2 ملرد. تەڭگە كولەمىندە قاراجات ءبولىپ وتىرعانى دا ايتىلدى. سۋارمالى ەگىستىك القاپتارىنىڭ اۋدانىن 2018 جىلعا قاراي 52 مىڭ گەكتارعا دەيىن ۇلعايتۋ بويىنشا ءىس-شارالار جوسپارىنىڭ شەڭبەرىندە بيىل 4,0 مىڭ گەكتار جەردى قولدانىسقا ەنگىزۋ كوزدەلگەن. كوكتەمگى ەگىس جۇ­مىستارىنا 15 مىڭ توننا ار­زانداتىلعان ديزەل وتىنى ءبو­لىن­دى. وپەراتورلاردىڭ قىزمەتىن ەسەپ­كە العاندا, اۋىلشارۋاشىلىق تاۋار وندىرۋشىلەرى ءۇشىن جاعارماي قۇنى ليترىنە 82 تەڭگەنى قۇرايدى. بۇل – نارىقتاعى باعادان 17 پا­يىزعا تومەن. مىسالى, وبلىستاعى ەرتىس اۋدانىندا بيىل ەگىس القابىنىڭ كولەمى 242 مىڭ گەكتارعا جەتىپ وتىر. استىقتى اۋدان جىل سايىن القاپ كولەمىن كوبەيتۋدە. كوكتەمگى دالا جۇمىستارى ءۇشىن وبلىس ديقاندارىنا 15000 توننا ارزانداتىلعان جانار-جاعارماي ءبولىندى. وبلىستىق اۋىل شارۋاشىلىعى باسقارماسىنىڭ حابارىنشا, جانار-جاعارماي تاسىمالىنا جاۋاپتى وپەراتور رەتىندە «پرومسەرۆيس پۆ» سەرىكتەستىگى بەكىتىلىپتى. كەلىسىمشارتتار جاسالدى. وتىننىڭ 1 تونناسى – 97821 تەڭگە, 1 ءليترى 82 تەڭگەدەن بوساتىلۋدا. وتكەن جىلى ەرتىستىك ديقاندار ءداندى داقىل القابىنان گەكتارىنا ورتاشا ەسەپپەن 13,6 تسەنتنەردەن ءونىم جينادى. ديقان­دار تۇقىمدى «اباي», «ەرتىس تج» سياقتى اۋدانداعى شارۋاشىلىقتارىنان ساتىپ الۋدا. ويتكەنى, اۋداندا ەليتالى تۇقىم دايىنداۋمەن اينالىساتىن بىرنەشە سەرىكتەستىك بار. بيىل جەرگىلىكتى ديقاندارعا «ازىق-ت ۇلىك كەلىسىمشارت كورپوراتسياسى» ۇق» اق ارقىلى 194 ميلليون تەڭگە نەسيە بەرىلمەكشى. ءتىپتى, نەسيەنى اقشالاي نەمەسە بيداي تۇرىندە قايتارۋعا مۇمكىندىك بار. كوكتەمگى دالا جۇمىستارىن جۇرگىزۋگە 34 ەگۋ كەشەنى جۇمىلدىرىلماق. ءبىرىنشى كەزەكتە ىلعال ۇنەمدەۋ تەحنولوگياسىمەن بايلانىستى. نولدىك تەحنولوگيا دەگەن اتاۋمەن بەلگىلى بۇل ءادىس قازىر الەمدە كەڭ تاراعان. ءداندى داقىلداردىڭ ىستىق-سۋىققا ءتوزىمدى جاڭا تۇرلەرىن پايدالانعان ءجون. ويتكەنى, ولار اۋا رايىنا نەمەسە جەردىڭ ىلعالدىلىعىنا قارا­ماستان مول ءونىم بەرە بەرەدى, دەيدى ديقاندار. جالپى, اۋداندا 37 شارۋاشىلىق استىق, ەگىن, وسىمدىك جانە مال شارۋا­شى­لىعى ونىمدەرىن ءوسىرىپ, وندىرۋمەن اينالىسادى. ەرتەڭ كۇز ايلارىندا جينال­عان استىقتى ىسىراپسىز ساقتاۋعا ارنالعان جالپى سىيىمدىلىعى 248,4 مىڭ توننالىق شاعىن 106 قويما سالىنىپتى. ال, ەرتىس اۋدانىندا جەردىڭ جالپى اۋماعى 1019 مىڭ گا بولسا, اۋىل شارۋاشىلىعىنا ارنالعان بولىگى 915 مىڭ گا جەردى الىپ جاتىر. اۋدانداعى ەگىس كولەمىنىڭ تورتتەن ءبىرىن اباي سەرىكتەستىگى ەگەدى. استىقتى القاپتىڭ ءار گەكتارىنان 9-10 تسەنتنەردەن ءونىم الادى. بيدايدى قاپقا سالىپ ساقتايتىن ارگەنتينالىق يننوۆاتسيانى دا جۇزەگە اسىردى. قاپتاردا ساقتالعان استىقتىڭ ساپاسى جوعارى, باعاسى قىمبات. وسىنداي تاسىلمەن بيدايدى جاڭا استىق العان مەرزىمگە دەيىن ساقتايدى. بۇگىندە وبلىس بويىنشا تۇقىم الۋعا 6,8 مىڭ توننا كولەمىندە ءوتىنىش تۇسكەن. بۇل رەتتە, «تۇقىم شارۋاشىلىعىن دامىتۋدى قولداۋ» باعدارلاماسى بويىنشا جەرگىلىكتى بيۋدجەتتەن 230 ميلليون تەڭگە ءبولىندى. سوندىقتان, وبلىستىق اكىمدىك تاراپىنان اۋىل شارۋاشىلىعى باسقارماسى مەن «قازاگرو» اق-تىڭ قۇ­رىلىمدىق بولىمشەلەرىنە كوكتەمگى ەگىس جۇمىستارىنا نەسيە بەرۋدى قامتاماسىز ەتۋ, قالالار مەن اۋدانداردىڭ اكىمدەرىنە, اۋىل شارۋاشىلىعى باسقارماسىنا ارزانداتىلعان ديزەل وتىنىن بەرىلگەن ۋاقىتىندا تاسىمالدانۋدى جۇرگىزۋ, كوكتەمگى ەگىس جۇمىستارىن «پاۆلودار عى­لىمي-زەرتتەۋ ينستيتۋتى» جشس-ءنىڭ ۇسى­نىستارى بويىنشا اۋىلشارۋاشىلىق دا­قىلدارىن ەگۋدى ءتيىمدى مەرزىمدە وتكىزۋ بويىنشا شارالاردى قولدانۋ جونىندە تاپسىرمالار بەرىلدى. فاريدا بىقاي, «ەگەمەن قازاقستان» پاۆلودار وبلىسى