جاعداي تۇراقتانىپ كەلەدى

گازەتىمىزدىڭ 1 ءساۋىر كۇنگى سانىندا «باياناۋىلدىڭ اۋىلدارى تاعى دا سۋ استىندا قالماق پا؟» دەگەن سىن ماقالا جاريالانعان-دى. 2 ءساۋىر كۇنى جاڭا تاعايىندالعان وبلىس اكىمى بولات باقاۋوۆ بايان­اۋىل اۋدانىنا جۇمىس ساپارىمەن بارىپ قايتتى. ساپار بارىسىندا وبلىس اكىمى ءبىز ماقالادا جاز­عانداي, قارااششى, تەڭدىك اۋىل­دارىنىڭ سۋ تاسقىنىنا قارسى جاساپ جاتقان دايىندىقتارىن تەك­سەردى. وبلىس اكىمىنىڭ ءباسپاسوز قىزمەتىنىڭ حابارىنا قاراعاندا, ءوڭىر باسشىسى تەڭدىك اۋىلى جانىنداعى ءبىز گازەتىمىزگە سۋرەتىمەن جاريالاعان كوپىردىڭ دە جاعدايىن ءوز كوزىمەن كورىپ قاراپ شىقتى. وتكەن جىلى كوپىردىڭ اششىسۋ وزەنى ۇستىنە سالىنعان تىرەگى اعىن سۋعا شىداس بەرمەگەن ەدى. سونىڭ سالدارىنان اۋىلدا توتەنشە جاعداي قالىپتاسىپ, التى تۇرعىن ءۇي, ءتورت شارۋاشىلىق قۇرىلىسى سۋعا كەتىپ, 99 تۇرعىن جانە 162 باس مال كوشىرىلگەن بولاتىن. بيىل ناۋرىزدىڭ سوڭىندا قارااششى اۋىلىنىڭ ماڭىندا اينالا بوگەت سالىندى. قازىر قار كەتكەن ايماق 70 پايىزدى قۇرايدى, قار تاۋ­لى جوتالاردا عانا قالدى. وسىعان بايلانىستى قورعانىش توپىراقتى 800 مەترگە دەيىن ۇزارتۋعا شەشىم قابىلدانعان بولاتىن. سۋ تاسقىنى جاعدايى ۇنەمى باقىلاۋ, باياناۋىل اۋدانى بويىنشا تاۋلىك بويى باقىلاۋ ءجۇر­گىزىلىپ, توتەنشە جاعداي قىزمەتتەرى قاۋىپكە قارسى ساقاداي-ساي تۇر. جۇمىس ساپارىنىڭ قورى­تىندىسى بويىنشا, وبلىس اكىمى بولات باقاۋوۆ اپاتتى جاعدايدى بول­دىرماۋ ءۇشىن باياناۋىل اۋ­دانىنىڭ باسشىلىعى مەن وبلىس­تىڭ توتەنشە جاعداي قىزمەتتەرىنە قاراعاندى وبلىسىنىڭ توتەنشە جاعداي دەپارتامەنتىمەن بايلانىس ورناتۋ جونىندە ناقتى تاپسىرمالار بەردى. فاريدا بىقاي, «ەگەمەن قازاقستان». پاۆلودار وبلىسى.