كەزدەسۋگە ورك توراعاسىنىڭ ورىنباسارى مۇحتار ەرمان, ورك مۇشەسى ميحايل بورتنيك, تمد اتقارۋ كوميتەتىنىڭ كەڭەسشىسى ولەگ كۋلەبا دا قاتىستى. جيىندا نۇرلان ءابدىروۆ ميسسيا باسشىلىعىن 15 ناۋرىزعا تاعايىندالعان رەفەرەندۋم ۋچاسكەلەرىنىڭ ينفراقۇرىلىمىن وزەكتەندىرۋ جۇمىستارى اياقتالعانىن اتاپ ءوتتى.
– قازىر بارلىق كوممۋنيكاتسيا ارنالارىن پايدالانا وتىرىپ, كەڭ اۋقىمدى اقپاراتتىق جۇمىس جۇرگىزىلۋدە. اتاپ ايتقاندا, رەفەرەندۋم تۋرالى تولىق اقپاراتتى قامتيتىن QR-كودى بار اتاۋلى شاقىرۋ بيلەتتەرى تاراتىلادى. ورتالىق رەفەرەندۋم كوميسسياسى ازاماتتاردىڭ, ونىڭ ىشىندە مۇگەدەكتىگى بار ادامداردىڭ سايلاۋ قۇقىقتارىن تولىققاندى جۇزەگە اسىرۋعا باسا نازار اۋدارادى. سونىمەن قاتار رەفەرەندۋم ۋچاسكەلەرىندە اككرەديتتەلگەن قوعامدىق بىرلەستىكتەردىڭ, كوممەرتسيالىق ەمەس ۇيىمداردىڭ جانە بۇقارالىق اقپارات قۇرالدارى وكىلدەرىنىڭ قىزمەتىن جۇزەگە اسىرۋى ءۇشىن زاڭنامادا كوزدەلگەن جاعدايلار جاسالۋدا, – دەي كەلە ورك توراعاسى تمد بايقاۋشىلار ميسسياسىنىڭ شتابىنا ەلدەگى ەلەكتورالدىق ناۋقانداردى بايقاۋعا تۇراقتى تۇردە قاتىسىپ جۇرگەندىگى ءۇشىن العىس ءبىلدىردى.
ءوز كەزەگىندە, تمد بايقاۋشىلار ميسسياسى شتابىنىڭ باسشىسى ميسسيانىڭ قىزمەتى تۋرالى ايتىپ, قازاقستاندا ونىڭ ءتيىمدى جۇمىس ىستەۋى ءۇشىن جاسالعان جاعداي ءۇشىن ريزاشىلىعىن جەتكىزدى. ول ميسسيا رەفەرەندۋمنىڭ ءوتۋىن جالپىعا تانىلعان دەموكراتيالىق قاعيداتتار مەن ۇلتتىق زاڭناماعا سايكەستىگى تۇرعىسىنان باعالايتىنىن مالىمدەدى. وعان قوسا داۋىس بەرۋ وتكەننەن كەيىنگى كەلەسى كۇنى تمد ەلدەرىنەن كەلگەن بارلىق ۇيلەستىرۋشىمەن كەلىسىلگەن مالىمدەمەدە ءوز باعاسىن جاريالايتىنىن ەسكە سالدى.
جيىننان كەيىن تمد بايقاۋشىلار ميسسياسىنىڭ شتابى (قۇرامىندا 7 بايقاۋشى بار) بۇقارالىق اقپارات قۇرالدارىنا ارنالعان بريفينگتە ءوز جۇمىسىنا كىرىسكەندىگىن حابارلادى.
– حالىقارالىق بايقاۋشىلار رەتىندە اككرەديتاتسيامىزدى الدىق. ەندى قازاقستان رەسپۋبليكاسى كونستيتۋتسياسىنىڭ جوباسى بويىنشا رەسپۋبليكالىق رەفەرەندۋمنىڭ ءوتۋىن مونيتورينگىلەۋگە رەسمي تۇردە كىرىسكەنىن مالىمدەيمىن. ءبىز مۇندا ءبىرىنشى رەت كەلىپ وتىرعان جوقپىز, بۇل – 19-ساپارىمىز. ال جالپى 2001 جىلدان بەرى قاراي تاۋەلسىز مەملەكەتتەر دوستاستىعى مەملەكەت باسشىلارى كەڭەسىنىڭ شەشىمىمەن تمد كەڭىستىگىندە سايلاۋ ناۋقاندارىن مونيتورينگىلەۋدى العاش باستاعان ساتتەن ەسەپتەسەك, 133-ميسسيامىز. ميسسيا قۇرامىنا شامامەن 100-گە جۋىق حالىقارالىق بايقاۋشى اككرەديتاتسيادان وتەدى دەپ بولجاپ وتىرمىز. قۇرامدى جاساقتاۋ جۇمىسى باستالدى. ۇزاقمەرزىمدى بايقاۋشى رەتىندە ەلدە بولامىز. شتاب-پاتەر استانادا ورنالاسادى. جالپىحالىقتىق ناۋقانعا تامان قىسقامەرزىمدى بايقاۋشىلار دا كەلەدى, – دەدى ە.كوزياك.
سپيكەردىڭ ايتۋىنشا, ميسسيانى تمد باس حاتشىسىنىڭ ءبىرىنشى ورىنباسارى يگور پەتريشەنكو باسقاراتىن بولدى. ول رەفەرەندۋم كۇنىنە جاقىن ۋاقىتتا كەلمەكشى. ونىڭ كانديداتۋراسى تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ جارعىلىق جانە باسقا دا ورگاندارى جانىنداعى تۇراقتى وكىلەتتى وكىلدەر كەڭەسىندە كەلىسىلگەن.
ايتا كەتەيىك, بۇگىندە ەلىمىزدەگى 12 416 759 ازامات جالپىحالىقتىق ناۋقاندا داۋىس بەرۋ قۇقىعىنا يە. رەفەرەندۋمعا قاتىسۋ ءۇشىن وتانداستارىمىز وزدەرىنىڭ تىركەلگەن مەكەنجايى بويىنشا بەلگىلى ءبىر ۋچاسكەگە بەكىتىلەدى جانە ارنايى تىزىمگە ەنگىزىلەدى. داۋىس بەرۋ كۇنىنە دەيىن ءار ازامات ءوز دەرەكتەرىنىڭ تىزىمدە بار-جوعىن اقپاراتتىق سەرۆيستەر ارقىلى تەكسەرە الادى. ەگەر قاتە نەمەسە سايكەسسىزدىك انىقتالسا, ۋچاسكەلىك كوميسسياعا ءوتىنىش بەرىپ, تۇزەتۋ ەنگىزۋگە بولادى. داۋىس بەرۋ كۇنى ۋاقىتشا تىركەلۋ مۇمكىندىگى دە قاراستىرىلادى.
