كەزدەسۋ بارىسىندا تاراپتار گەندەرلىك تەڭدىك, ايەلدەر قۇقىقتارى مەن مۇمكىندىكتەرىن كەڭەيتۋ, وتباسى ينستيتۋتىن نىعايتۋ جانە ايەلدەر مەن بالالار قۇقىعىن قورعاۋ سالالارىنداعى ىنتىماقتاستىقتىڭ قازىرگى جاعدايى مەن بولاشاعىن تالقىلادى.
قازاقستاندا جۇرگىزىلىپ جاتقان رەفورمالارعا, ونىڭ ىشىندە جاڭا كونستيتۋتسيانى قابىلداۋ ماسەلەسى بويىنشا الداعى رەسپۋبليكالىق رەفەرەندۋمعا ەرەكشە نازار اۋدارىلدى. ايدا بالاەۆا اتا زاڭ جوباسىندا وتباسى ينستيتۋتىن نىعايتۋ, ايەلدەر مەن ەرلەر ءۇشىن تەڭ مۇمكىندىك جاساۋ, سونداي-اق انا, اكە جانە بالالاردى قورعاۋ نورمالارى قاراستىرىلعانىن اتاپ ءوتتى.
«كونستيتۋتسيادا العاش رەت ءداستۇرلى وتباسى ينستيتۋتىن قولداۋ ماقساتىندا نەكە تەڭ قۇقىقتى ەر مەن ايەل وداعى رەتىندە ايقىن بەكىتىلمەك. بۇل ءداستۇرلى وتباسىلىق قۇندىلىقتاردى نىعايتۋعا اسەر ەتەدى. قازاقستان ءۇشىن بۇل ماسەلە اسا ماڭىزدى. اڭگىمە تەك مادەني جانە تاريحي داستۇرلەردى ساقتاۋ تۋرالى عانا ەمەس, سونىمەن قاتار كەڭ اۋقىمدى ساياسي جانە ەكونوميكالىق اسپەكتىلەر جايىندا بولىپ وتىر. ەلىمىزدىڭ اۋماعى كەڭ, ال حالىق تىعىزدىعى تومەن بولعاندىقتان, وتباسى ينستيتۋتىن نىعايتۋ مەملەكەتتىڭ تۇراقتى دامۋىنا تىكەلەي اسەر ەتەدى», دەدى ا.بالاەۆا.
جيىندا دجەرەن گيۋۆەن گيۋرەس ەلدەگى گەندەرلىك ساياسات سالاسىنداعى وڭ وزگەرىستەرگە توقتالدى. ونىڭ ايتۋىنشا, قازىرگى كەزدە بۇۇ مەن قازاقستان ءوزارا ىنتىماقتاستىقتىڭ ەكىنشى كەزەڭىنە ءوتتى. سونداي-اق كەزدەسۋدە «بۇۇ-ايەلدەر» ساراپشىلارىن وسى جۇمىسقا تارتۋ ماسەلەسى دە ءسوز ەتىلدى.
كەزدەسۋ قورىتىندىسى بويىنشا تاراپتار گەندەرلىك ساياسات پەن تۇراقتى دامۋ سالالارىندا ناقتى ناتيجە كۇتىلەتىن جۇمىستاردى جالعاستىرۋعا كەلىستى.
