ەكسپوزيتسيادا ءىلياس جانسۇگىروۆتىڭ تۇتىنعان زاتتارى, سيرەك قولجازبالار, فوتوسۋرەتتەرى مەن قۇندى ارحيۆتىك قۇجاتتار بار. اقىننىڭ قىزىلوردا ەل بايتاعى اتانعان تۇستاعى شىعارماشىلىق ىزدەنىستەرى مەن قوعامدىق قىزمەتى كورمەدە كەڭىنەن قامتىلىپ, سول ءداۋىردىڭ ادەبي-رۋحاني تىنىسى ايقىن كورىنىس تاپقان.
اقىن كيگەن بىلعارى پلاشش پەن تىك جاعا جەيدە, شىعارمالارىن باسقان «Mersedes» ماركالى جازۋ ماشىڭكەسىنىڭ جانىنا جينالعاندار قاتارى كوپ ەكەن. قىزىلوردادا شىققان شىعارمالارى, قالامداستارىمەن تۇسكەن فوتولار جازىقسىز جالالى بولىپ ايىپتالعان كەزىندەگى قۇجاتتارعا جالعاسادى. ايىپتاۋ ۇكىمى, جيناق كىتاپشاسى, تولقۇجاتى, كەيبىر شىعارمالارىنىڭ قولجازباسى دا تۇر.
«رەسەيدە «ۆىستاۆكا ودنوگو ەكسپوناتا» دەگەن جوبا بار. جانسۇگىروۆ جادىگەرلەرىنىڭ ارقايسىسىنان سونداي كورمە جاساۋعا بولادى», دەيدى قىزىلوردا وبلىستىق تاريحي-ولكەتانۋ مۋزەيى ديرەكتورىنىڭ ورىنباسارى جانات احمەتوۆا.
اقىن اتىنداعى ادەبي مۋزەي مەڭگەرۋشىسى نۇرگۇل جاۋىنباەۆانىڭ ايتۋىنشا, مەكەمە ورنالاسقان تالدىقورعانداعى عيمارات تاريحي نىساندار قاتارىنا جاتادى. «قوسشى» ۇيىمىنىڭ وكىلى رەتىندە اقىن بىرنەشە مارتە بولعان ءۇي ونىڭ تۋعانىنا 90 جىل تولۋىنا وراي 1984 جىلى مۋزەي بولىپ اشىلىپتى.
«قازىر مۋزەيدە 6 مىڭنان استام جادىگەر ساقتاۋلى تۇر. ولاردىڭ قاتارىندا ءوزى ۇستاعان زاتتار مەن شىعارمالارىنان بولەك ءىلياستانۋشىلاردىڭ ەڭبەكتەرى دە بار. سونىمەن قاتار ءىلياس – العاشقى كاسىبي ءبىلىم العان جۋرناليست. قازىر قايراتكەردىڭ ماسكەۋدەگى جۋرناليستيكا ينستيتۋىندا وقىعان كەزەڭىنە قاتىستى قۇجاتتاردى ىزدەستىرۋ ۇستىندەمىز. وقۋدان كەيىن قىزىلورداداعى «ەڭبەكشى قازاق» گازەتىنە قىزمەتكە كەلگەن اقىنعا قاتىستى سونداي دەرەكتەر وسى سىر ەلىنەن تابىلىپ قالا ما دەگەن ءۇمىتىمىز بار», دەيدى ن.جاۋىنباەۆا.
قىزىلوردا
