بۇل جولى 22 وتباسى باسپانالى بولدى. ال الداعى ايلاردا تاعى 14 پاتەر بەرىلمەك. وبلىس اكىمى بەرىك ءۋالي جۇمىس ساپارىمەن كۋرچاتوۆ قالاسىندا بولىپ, سالتاناتتى جيىنعا قاتىستى. بىلتىر جەكە ينۆەستور ەسەبىنەن شاھارداعى شكولنايا كوشەسىندە ورنالاسقان 36 پاتەرلى ءتورت قاباتتى تۇرعىن ءۇيدى قالپىنا كەلتىرىلگەن. وندا 8 ءبىر بولمەلى, 16 ەكى بولمەلى جانە 12 ءۇش بولمەلى پاتەر بار. اتالعان باسپانالار حالىقتىڭ الەۋمەتتىك وسال توپتارى ساناتىنداعى كەزەكتە تۇرعان ازاماتتارعا ارنالعان. بۇگىندە پاتەرلەر تولىق ساتىپ الىنىپ, تۇرعىندارعا ءبولۋ ءۇشىن «وتباسى بانك» اق-عا بەرىلدى.
«بۇگىن ەل ءۇشىن ەلەۋلى, حالىق ءۇشىن قۋانىشتى ساتكە جينالىپ وتىرمىز. بۇگىن 22 وتباسى قونىس تويىن تويلايدى. الداعى ايلاردا تاعى 14 پاتەر وسى ساناتتاعى ازاماتتارعا بەرىلەتىن بولادى. ياعني, 36 وتباسى باسپاناعا قول جەتكىزەدى. بۇل باسپانالار الەۋمەتتىك وسال توپتاعى ازاماتتارعا, جەتىم بالالارعا بەرىلىپ وتىر. بۇل – جاي عانا باسپانا ەمەس, جاڭا ءومىردىڭ, ەرتەڭگى كۇنگە دەگەن ءۇمىت پەن سەنىمنىڭ باستاۋى. بۇل – مەملەكەتتىڭ حالىق الدىنداعى الەۋمەتتىك جاۋاپكەرشىلىگىنىڭ ناقتى كورىنىسى. الداعى ۋاقىتتا قالاداعى وسىنداي ءۇش كوپ قاباتتى ءۇي قايتا جاڭعىرتىلىپ, حالىقتىڭ يگىلىگىنە بەرىلەتىن بولادى», دەدى بەرىك ءۋالي.
وبلىس اكىمى جاڭا قونىس يەلەرىن قونىس تويىمەن قۇتتىقتاعان ول ەلىمىز ءۇشىن تاريحي تاڭداۋ كونستيتۋتسيالىق رەفەرەندۋم تۇرعانىن, بۇل مەملەكەتتىلىگىمىزدى نىعايتۋ مەن دەموكراتيالىق قۇندىلىقتاردى ورنىقتىرۋ جولىنداعى جاۋاپتى قادام ەكەنىن دە ايتا كەتتى. سونىمەن قاتار جاڭا قونىس يەلەرى دە ءوز ريزاشىلىقتارىن جەتكىزدى.
«بۇگىن ءبىز ءۇشىن ەرەكشە كۇن. جىلدار بويى كەزەكتە تۇرعان تۇرعىندار باسپانالى بولىپ, قۋانىپ جاتىر. قالامىز كۇننەن كۇنگە كوركەيىپ كەلەدى. مەملەكەت باسشىسىنىڭ تاپسىرماسىنا سايكەس كۋرچاتوۆقا «عىلىم قالاسى» مارتەبەسى بەرىلەتىنىن ەستىپ جاتىرمىز. وسىنداي قولداۋ كورسەتكەنى ءۇشىن پرەزيدەنت قاسىم-جومارت توقاەۆقا ريزاشىلىعىمىزدى بىلدىرەمىز», دەدى قالا تۇرعىنى قابدراشيت تولەۋحان ۇلى.
قالالىق اكىمدىكتىڭ دەرەگىنشە, كۋرچاتوۆتا قۋاتتىلىعى 700 مۆت بولاتىن كوندەنساتسيالىق ەلەكتر ستانتسياسىن, كومىردى تەرەڭ وڭدەيتىن كومىر-حيميا كەشەنىن سالۋ سىندى ءىرى جوبالاردى ىسكە اسىرۋ جوسپارلانعان. بۇعان قوسا جىلىنا 150 مىڭ توننا موليبدەن كەنىن وڭدەيتىن بايىتۋ فابريكاسىن سالۋ كوزدەلىپ وتىر ەكەن.
«ينفراقۇرىلىمدى دامىتۋ باعىتىندا دا اۋقىمدى جۇمىس اتقارىلۋدا. 2025 جىلى «كۋرچاتوۆ–پاۆلودار» اۆتوجولىنىڭ ۋچاسكەسى پايدالانۋعا بەرىلدى. «سەمەي-كۋرچاتوۆ» تاس جولىنا رەسپۋبليكالىق ماڭىزى بار جول مارتەبەسى بەرۋ جۇمىسى جۇرگىزىلىپ جاتىر. بۇل الداعى ۋاقىتتا جول ساپاسىن ارتتىرىپ, قاتىناس تيىمدىلىگىن كۇشەيتۋگە مۇمكىندىك بەرەدى. قالانىڭ كوشە-جول جەلىسىن جاڭعىرتۋ اياسىندا اسفالتتىڭ ءبىرىنشى قاباتى توسەلدى, 2026 جىلى ەكىنشى قاباتىن توسەۋ جۇمىستارى اياقتالادى. «قازتسينك» اق دەمەۋشىلىگىمەن اۋلاىشىلىك جولدار 100 پايىز جاڭارتىلدى», دەيدى اكىمدىكتىڭ ءباسپاسوز قىزمەتى.
ولاردىڭ مالىمەتىنشە, 2025 جىلى قايتا جاڭعىرتىلعان بالالار مەن جاسوسپىرىمدەر شىعارماشىلىق ءۇيى قولدانىسقا بەرىلدى. جاستارعا ارنالعان عيمارات قالپىنا كەلتىرىلىپ, ەكى كوپپاتەرلى تۇرعىن ءۇيدىڭ قۇرىلىسى اياقتالدى. قالاداعى №2 ورتا مەكتەپ تولىق جاڭعىرتىلدى. سونىمەن قاتار «دەگەلەڭ» ستانتسياسىندا تەمىرجول پەررونىن جاڭارتۋ جانە جاڭا ۆوكزال عيماراتىنىڭ قۇرىلىسى قارقىندى جۇرگىزىلىپ جاتىر.
قالا اكىمى بولات ابدىراليەۆتىڭ ايتۋىنشا, كۋرچاتوۆ قالاسىنا 2026–2035 جىلدارعا ارنالعان عىلىم قالاشىعىن دامىتۋ جوباسى ازىرلەنىپ جاتىر. مۇنىڭ اسەرى قالانىڭ قايتا جاندانۋىنا زور اسەر ەتپەك.
«قالادا قاجەتتى الەۋمەتتىك جانە ينجەنەرلىك ينفراقۇرىلىم قالىپتاسقان, سونداي-اق اۋماقتىق كەڭەيۋگە مۇمكىندىك بەرەتىن بوس جەر تەلىمدەرى ساقتالعان. قازاقستان رەسپۋبليكاسىنىڭ اتوم ەنەرگياسى جونىندەگى اگەنتتىگى 2026–2035 جىلدارعا ارنالعان كۋرچاتوۆ قالاسىندا عىلىم قالاشىعىن دامىتۋ تۇجىرىمداماسىنىڭ جوباسىن ازىرلەدى. عىلىم قالاشىعى مارتەبەسىن بەرۋ راسىمدەرىن 2026 جىلدىڭ جەلتوقسان ايىندا اياقتاۋ جوسپارلانىپ وتىر. اتالعان مارتەبە بەرىلگەن جاعدايدا قالا الەۋمەتتىك, ەكونوميكالىق جانە دەموگرافيالىق دامۋ تۇرعىسىنان جاڭا سەرپىن الىپ, حالىقارالىق عىلىمي جوبالار مەن ينۆەستيتسيالار تارتۋ ءۇشىن تارتىمدى ورتالىققا اينالادى», دەدى قالا اكىمى.
راسىندا مەملەكەت باسشىسى قاسىم-جومارت توقاەۆ ۇلتتىق قۇرىلتاي وتىرىسىندا كۋرچاتوۆ قالاسىنىڭ عىلىمي الەۋەتىنە ارنايى توقتالىپ, ونى ەلىمىزدەگى ەكىنشى عىلىم قالاشىعى رەتىندە دامىتۋ ماسەلەسىن كوتەرگەن بولاتىن. پرەزيدەنت ۇكىمەتكە جانە ءتيىستى ۆەدومستۆولارعا قالادا عىلىم قالاشىعىن قالىپتاستىرۋدىڭ ناقتى جوسپارىن ازىرلەۋدى تاپسىرعان.
بولات تاڭسىقباي ۇلىنىڭ ايتۋىنشا, جوبا اياسىندا جوعارى تەحنولوگيالىق وندىرىستەردى قولداۋ, باسىم عىلىمي جانە عىلىمي-تەحنيكالىق باعىتتاردى دامىتۋ, يننوۆاتسيالىق قىزمەتتى ىلگەرىلەتۋ, عىلىمي جانە ءبىلىم بەرۋ ينفراقۇرىلىمىن نىعايتۋ, سونداي-اق عىلىمي ازىرلەمەلەردى كوممەرتسيالاندىرۋ مەن ينۆەستيتسيالار تارتۋ تەتىكتەرىن جەتىلدىرۋ كوزدەلگەن.
ايتا كەتەيىك, وتكەن اپتادا سەمەي قالاسىندا ۇشاقتار كەنتىندەگى الەۋمەتتىك وسال توپتاعى ازاماتتارعا 60 پاتەرلى بەرىلسە, قاراعايلى ىقشام اۋدانىندا بىلتىر جالپى اۋماعى 27 مىڭ شارشى مەتر بولاتىن 5 تۇرعىن ءۇي پايدالانۋعا بەرىلدى. وسىلايشا, اباي ەلىندە ءبىر اپتادا ىشىندە ەلۋ شاقتى ءتۇتىن جاڭا ءۇيلى بولىپ, قونىس تويىن تويلادى.
