استانا. 6 ءساۋىر. بۇگىن ءتۇن اۋا فۋتبولدان ۋەفا چەمپيوندار ليگاسىنىڭ شيرەك فينالى باستالدى. «بارسەلونا» ءوز الاڭىندا ءمادريدتىڭ «اتلەتيكو» كومانداسىمەن كەزدەستى. ەكىنشى ويىن ميۋنحەندە «باۆاريا» مەن «بەنفيكا» كلۋبتارىنىڭ اراسىندا ءوتتى. بۇل تۋرالى egemen.kz ءتىلشىسى حابارلادى.
«بارسەلونا» (بارسەلونا, يسپانيا) – «اتلەتيكو» (مادريد, يسپانيا) 2:1 (1:0)
بۇل ماتچتا يسپانيادا چەمپيوندىق اتاققا تالاسىپ جاتقان كوماندالار كەزدەستى. قازىر ەل چەمپيوناتىندا كاتالوندىق كلۋب 76 ۇپايمەن ءبىرىنشى ورىندا كەلە جاتسا, ءمادريدتىڭ كومانداسى 70 ۇپايمەن «بارسەلونانىڭ» وكشەسىن باسىپ كەلە جاتىر. سوندىقتان ەكەۋىنىڭ اراسىنداعى ويىن چەمپيوناتتاعىداي قىزىقتى جانە تارتىستى ءوتتى.
كەزدەسۋدە ءبىرىنشى گولدى 25 مينۋتتا قوناقتار سوقتى. بۇل دوپتىڭ اۆتورى فەرناندو توررەس اتاندى. وسىدان كەيىن جارتى ساعات ءبىر-ءبىرىن اڭدىسقان كوماندالاردىڭ ناعىز كەسكىلەسكەن شايقاسى باستالدى. الاڭ يەلەرى دە قوناقتار دا قاقپاعا قاۋىپتى جاعداي جاساپ قويماي, ويىن ەرەجەسىن دە بۇزىپ جاتتى. ماتچتا العاشقى سارى قاعازدى توررەس الدى. ودان كەيىن ول تاعى ەسكەرتۋ الىپ, ءبىرىنشى تايم بىتپەي جاتىپ الاڭنان قۋىلدى. وسى كۇنى «اتلەتيكونىڭ» ويىنشىلارى 7 سارى قاعاز بەن ءبىر قىزىل قاعاز الدى. ءسويتىپ, ماتچتىڭ 35 مينۋتىندا قوناقتار الاڭدا ون اداممەن قالدى. الاڭ يەلەرى ءۇش ەسكەرتۋمەن شەكتەلدى.
ماتچتىڭ ەكىنشى جارتىسىندا «بارسەلونا» شابۋىلداردى جيەلەتىپ, اقىر سوڭىندا ەكى دوپ سوعىپ, جەڭىسكە جەتتى. گولداردى الاڭ يەلەرىنىڭ ۋرۋگۆايلىق لەگيونەرى لۋيس سۋارەس سوقتى.
ۋەفا چەمپيوندار ليگاسى 1/4 فينالىنداعى قارسىلاستاردىڭ ءبىرىنشى ماتچتارى.
5 ءساۋىر. بارسەلونا. «كامپ نوۋ » ستاديونى.
تورەشى: برىح فەليكس
«بارسەلونا»:تەر شتەگەن, پيكە, الۆەس, ماسكەرانو, البا, راكيتيچ (رافينيا 64’), سەرحيو (روبەرتو 80’), ينەستا (اردا 83’), سۋارەس, مەسسي, نەيمار.
«اتلەتيكو مادريد»: وبلاك, گودين, لۋيس, لۋكاس, حۋانفران, كوكە, گابي, نيگەس (كوررەا 90’), گريزمانن (توماس 76’), توررەس, فەررەيرا-كارراسكو (اۋگۋستو 53’)
گولدار: فەرناندو توررەس, 25 – 0:1, لۋيس سۋارەس, 63 – 1:1, لۋيس سۋارەس, 74 – 2:1
الاڭنان قۋىلدى: فەرناندو توررەس, 35 (ەكىنشى ەسكەرتۋ)
«باۆاريا» (ميۋنحەن, گەرمانيا) – «بەنفيكا» (ليسسابون, پورتۋگاليا) 1:0 (1:0)
بۇل كەزدەسۋدە الاڭ يەلەرى جىلدام سوعىلعان گولدىڭ ارقاسىندا جەڭىسكە جەتتى. ايتپەسە, قوس كوماندانىڭ كوكمايسا الاڭداعى ويىنى تەڭ جاعدايدا ءوتتى. ويىننىڭ 2 مينۋتىندا «باۆاريانىڭ» ءوز الاڭىنان باستالعان شابۋىلى قارسىلاستارىنىڭ ايىپ دوپ الاڭىنان ءبىر-اق شىقتى. وسى جەردە ريبەري, لەۆاندوۆسكي مەن بەرنات «نەمىس ماشيناسىنا» ءتان الدىنا كەلگەن قارسىلاستارىنىڭ بارلىعىن جاپىرىپ, ادەمى ۇيىمداستىرعان شابۋىلىنىڭ ناتيجەسىندە «باۆاريانىڭ» چيليلىك لەگيونەرى ارتۋرو ۆيدال گول سوقتى. بۇل الاڭ يەلەرىنىڭ بيىلعى ماۋسىمداعى ەڭ تەز سوققان گولى بولدى.
وسىدان كەيىن «بەنفيكا» ەسەپتى تەڭەستىرۋگە قانشاما رەت ارەكەتتەنگەنىمەن ويىن الاڭ يەلەرىنىڭ پايداسىنا شەشىلىپ اياقتالدى. جالپى, كەزدەسۋدە كوماندالار قاقپاعا قاۋىپتى جاعدايلار جاساپ, جانكۇيەرلەر كۇتكەن جاقسى ويىن ورنەگىن كورسەتتى.
5 ءساۋىر. ميۋنحەن. « الليانتس ارەنا » ستاديونى.
تورەشى: مارتسينياك شيمون.
«باۆاريا»: نويەر, لام, كيمميح (مارتينەس 60’), الابا, بەرنات, ۆيدال, ميۋللەر (گيوتتسە 85’), الكانتارا, كوستا (كومان 70’), ريبەري, لەۆاندوۆسكي
«بەنفيكا»: ەدەرسون, المەيدا, ليندەلەف, جاردەل, ەليزەۋ, پيتستسي (ساماريس 90’), فەيسا, سانچەس, گايتان, جوناس, (سالۆيو 83’), ميتروگلۋ (حيمەنەس 70’)
گول: ۆيدال 2’
داستان كەنجالين.
دەرەك, فوتو: eurosport, euro-football.ru
ۆيدەو: vkontakte الەۋمەتتىك جەلىسى.
