ماڭگىلىك عۇمىر

قازاقتىڭ قارا ولەڭىن كيە تۇتقان, جۇرەگىنىڭ تۇبىنەن قايناپ شىققان اسىل جىرلارىمەن قالىڭ جۇرتشىلىقتىڭ ماحابباتىنا بولەنگەن ۇلتىمىزدىڭ ءبىرتۋار اقىنى مۇقاعالي ماقاتاەۆتىڭ بيىل دا مەرەكەلى جىلى. جاۋھار جىرلارىمەن جۇر­تىن سۋسىنداتقان اقيىق اقىننىڭ ولمەس مۇراسىن ۇلىقتاۋ «مەن قازاقپىن» دەگەن ءاربىر جانعا اسىل پارىز عوي. وسىعان وراي, قىزىلوردا قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىندە «مۇقا­عالي – ماڭگىلىك عۇمىر» اتتى ادەبي-سازدى كەش وتكىزىلدى. كەش بارىسىندا مەكتەپتىڭ 7-9-سىنىپ وقۋشىلارى اقيىق اقىن پوەزياسىن جۇرەگىمەن سەزىنىپ, ناقىشىنا كەلتىرە مانەرلەپ جاتقا وقىدى. سونداي-اق, قالىڭ وقىرمانعا بەلگىلى, اقىننىڭ شوقتىعى بيىك تۋىندىسى «اق­قۋلار ۇيىقتاعاندا» پوە­ماسىن جاس ورەندەرىمىز شەبەر ساحنالاپ, ارتىستىك ەرەكشە قابىلەتتەرىن بايقاتتى. ادەبي كەشتە اقىننىڭ سوزىنە جازىلعان «باقىت دەگەن», «تۋعان جەر», «سارجايلاۋ», «ەسىڭە مەنى العايسىڭ» اندەرى شىرقالىپ, كوپشىلىكتىڭ كوڭىلىنەن شىقتى. اقىن رۋحىمەن سىرلاسۋ رەتىندە وقۋشىلار گ.ءسابيتوۆا «ولەڭنەن سەنى ىزدە­دىم», ا.سەكسەنباەۆا «مۇز­با­لاق اقىن مۇقاعالي», ا.وڭال­باەۆ «پوەزيا الىبى مۇقاعالي اتامىزعا» اتتى ءوز ولەڭدەرىن وقىدى. كەش سوڭىندا مۇقاعالي پوە­زياسىن ءسۇيىپ وقيتىن مەكتەپ مۇعالىمدەرى اقىن پوەزياسىنىڭ ءداۋىر تالعامايتىن ماڭگى پوە­زيا ەكەندىگىن ايتا كەلىپ, جاس­تىق شاقتارىن ەسكە الىپ, اقىن ولەڭدەرىن جاتقا وقىدى. جاس مامان جاسۇلان شەكتىباەۆ اقىن رۋحىنا ءوز شىعارماسىن ارنادى. تاعىلىمى مول دۇنيە ارقا­شان كوڭىلگە جىلى ۇيالاپ, ەستەن كەتپەيدى. اقىن پوەزياسىنا باس يگەن شاكىرتتەرىمىزدىڭ ءسابي جۇرەكتەن شىققان ۇندەرى جىر سۇيەر قاۋىمنىڭ جۇرەگىنە جەتتى. مۇقاعالي پوەزياسىنىڭ قۇدىرەتتىلىگى دە وسىندا! ميرا دونەنقوجاەۆا, نازارباەۆ زياتكەرلىك مەكتەبىنىڭ قازاق ءتىلى مەن ادەبيەتى پاندەرى بىرلەستىگىنىڭ جەتەكشىسى. قىزىلوردا.