اپات ايماعى الاڭداتۋدا

اقمولا وبلىسىنىڭ اكىمى سەرگەي كۋلاگين كەزەكتى جۇمىس ساپارىمەن زەرەندى, ساندىقتاۋ, اتباسار اۋداندارىندا بولىپ, كوكتەمگى سۋ تاسقىنىنىڭ قاۋپى جوعارى ەلدى مەكەندەردى ارالادى. اسىرەسە, اتباسار اۋدانىنىڭ جاباي وزەنى ماڭىنداعى ەلدى مەكەندەر ايرىقشا نازارعا الىندى. – بيىل وڭىردە قار كوپ ءتۇستى. سول سەبەپتى سۋ تاسقىنىنىڭ قاۋ­پى دە جوعارى. الدىڭعى جىل­داعى جاعداي قايتالانباس ءۇشىن دايىندىق جۇمىستارىن ەرتە باستاپ كەتتىك. قازىرگى كەزدە قالاعا جاباي وزەنىنەن قاۋىپ ءتونىپ تۇر. وسىعان وراي وزەن جاعاسىن بويلاي ۇزىندىعى 5,6 شاقىرىم, بيىكتىگى 4-7 مەتر بوگەت تۇرعىزىلۋدا. وعان 12 ەكسكاۆاتور تارتىلعان. وعان قوسا قاۋىپتى ايماقتارداعى تۇرعىن ۇيلەر مەن الەۋمەتتىك نىسانداردىڭ ماڭى قۇم تولتىرىلعان قاپتارمەن قورشالدى. اپاتتىڭ الدىن الۋ جۇمىستارىنا تۇرعىندار دا ءبىر كىسىدەي اتسالىسۋدا, – دەدى اتباسار اۋدانىنىڭ اكىمى اندرەي نيكيشوۆ اكىمگە بەرگەن ەسەبىندە. وبلىس اكىمى س.كۋلاگين الدىمەن كوكتەمگى سۋ تاسقىنىنىڭ الدىن الۋ شارالارىنا كومەك كورسەتىپ جۇرگەن حالىققا العى­سىن ايتتى. بۇل اپاتپەن كوپ بولىپ كۇرەسپەسەك, ەرتەڭ ونىڭ اۋىر سالدارىمەن كۇرەسۋگە تۋرا كەلەدى, دەي كەلە اكىم اتباسار اۋدانىنداعى سۋ تاسقىنىنىڭ الدىن الۋ شارالارىنا جۋىردا 20 ميلليون تەڭگە قارجى بولىنگەنىن, وعان قوسا بىرەر كۇندە تاعى 20 ميلليون تەڭگە قاراجات بوساتىلاتىنىن اتاپ ءوتتى. سونداي-اق, ءوڭىر باسشىسى وسى كۇنى ساندىقتاۋ اۋدا­نىنىڭ ماڭىنداعى جاباي وزەنى ۇستىمەن وتەتىن كوپىردىڭ بەرىكتىگىن تەكسەرتىپ, توتەنشە جاعدايلار كارتاسىنا ەنگىزىلگەن وڭىردەگى جالپى جاعدايمەن تانىستى. ساندىقتاۋ اۋدانىنىڭ ورتالىعى بالقاشىن سەلوسىنان شىعابەرىستە تج بويىنشا سۋ تاسقىنىنىڭ الدىن الۋ شارالارىنا جۇمىلدىرىلعان اپاتتىق-قۇتقارۋ جانە كوم­مۋنالدىق سالا تەحنيكالارى جۇمىس بارىسىنداعى سى­ناقتان وتكىزىلدى. وسى جەردە ول اۋداننىڭ توتەنشە جاعداي قىزمەتكەرلەرىمەن جۇزدەسىپ, سۋ قويماسى مەن وزەندەرگە جاقىن ورنالاسقان ەلدى مەكەندەردەگى جاعدايدى كۇنى-ءتۇنى باقىلاۋدا ۇستاۋدى تاپسىردى. – قازىر جاعداي وتە كۇردەلى. دالاداعى قار تولىق ەرىگەن جوق. زەرەندى, ساندىقتاۋ, اتباسار اۋداندارى ءالى قار قۇرساۋىندا جاتىر. اسىرەسە, اتباسار اۋدانىندا وسى مەزگىلدە مۇنداي قار كولەمى بولعان ەمەس. سوندىقتان, كۇن-ءتۇن دەمەي ءساۋىر ايىنىڭ بەل ورتاسىنا دەيىنگى قاۋىپتى كۇندەردى ويداعىداي وتكىزۋىمىز كەرەك. ول ءۇشىن سۋ باسۋ قاۋپى بار ەلدى مەكەندەرگە, الەۋمەتتىك نىساندار مەن تۇرعىن ۇيلەردى امان ساقتاپ قالۋعا بارلىق كۇشتى جۇمىلدىرىپ, ءتيىستى كەرەك-جا­راقپەن قامتاماسىز ەتىپ, دايىن وتىرۋىمىز قاجەت, – دەدى وبلىس باسشىسى. ال, اقمولا وبلىستىق تجد جاڭادان تاعايىندالعان باسشى الەكسەي سوۆەتوۆ ءوڭىر باسشىسىنا جۋىق كۇندەرى رەسپۋبليكادان ءتيىستى قول كومەگى جەتەتىنىن باياندادى. اتاپ ايتقاندا, اتباسارعا الماتى جانە قىزىلوردا وبلىستارىنان قوسىمشا 100 ادام جانە 19 ارنايى تەحنيكا كومەككە كەلمەك ەكەن. باقبەرگەن امالبەك, «ەگەمەن قازاقستان». اقمولا وبلىسى.