TikTok − الەمدەگى ەڭ ءىرى الەۋمەتتىك جەلىلەردىڭ ءبىرى. 2025 جىلى پلاتفورمانىڭ اي سايىنعى بەلسەندى قولدانۋشىلارى سانى شامامەن 1,59 ميلليارد ادام بولعانى ءمالىم. بۇل TikTok-تى الەمدە ەڭ كوپ قولدانىلاتىن الەۋمەتتىك مەديا پلاتفورمالار قاتارىنا قوسادى جانە ونىڭ اقپارات تاراتۋداعى ىقپالىن ايقىندايدى.
قازاقستاندا دا TikTok اۋديتورياسى جىل سايىن ءوسىپ جاتىر. 2025 جىلعى دەرەكتەر بويىنشا ەلدەگى ەرەسەك ينتەرنەت قولدانۋشىلاردىڭ 86,5 %-ى TikTok ارقىلى جارنامالىق كونتەنتكە قول جەتكىزە الادى, بۇل پلاتفورمانىڭ كەڭ تارالعانىن كورسەتەدى. سونىمەن قاتار, الەۋمەتتىك جەلىلەردى پايدالانۋ كولەمى جالپى ينتەرنەت قولدانۋشىلارى اراسىندا جوعارى: 2025 جىلى ەلدە ينتەرنەت قولدانۋشىلار سانى 19,2 ميلليونعا جەتكەن, ونىڭ ىشىندە جاستار اراسىندا TikTok وتە تانىمال ەكەنى بايقالادى.
TikTok-تىڭ نەگىزگى ەرەكشەلىگى − قىسقا بەينەفورمات ارقىلى اقپارات تاراتۋ. ءبىر مينۋتقا جەتپەيتىن ۆيدەولاردىڭ ىشىندە وقيعانىڭ ءمانىن اشۋ جۋرناليستەردەن ىقشام ويلاۋدى, ناقتى ءارى اسەرلى ءتىل تابۋدى تالاپ ەتەدى. بۇگىندە جاڭالىقتىڭ مازمۇنى عانا ەمەس, ونى ۇسىنۋ فورماسى دا شەشۋشى ءرول اتقارادى. كورەرمەن نازارىن العاشقى سەكۋندتاردا اۋدارتا الماعان كونتەنت كەڭ اۋديتورياعا جەتپەيدى.
قىسقا ۆيدەونىڭ قوعامعا تيگىزەر وڭ ىقپالى بار. ەڭ الدىمەن, اقپارات تاراتۋ جىلدامدىعى ارتتى. وقيعا ورنىنان تۇسىرىلگەن بەينەماتەريال كورەرمەنگە وقيعانىڭ شىنايى بەينەسىن جەتكىزەدى. سونىمەن قاتار, TikTok − جاستار اراسىندا كەڭىنەن تارالعان پلاتفورما. بۇرىن ءداستۇرلى مەديانى سيرەك تۇتىنعان جاس اۋديتوريا الەۋمەتتىك, ساياسي جانە قوعامدىق تاقىرىپتارعا وسى جەلى ارقىلى نازار اۋدارا باستادى. بۇل جۋرناليستيكا ءۇشىن جاڭا مۇمكىندىكتەر الاڭىن اشتى.
سونىمەن بىرگە قىسقا فورماتتىڭ بەلگىلى ءبىر شەكتەۋلەرى دە بار. كۇردەلى تاقىرىپتار كەيدە تەرەڭ تالداۋسىز, جەڭىلدەتىلگەن تۇردە بەرىلەدى. ال پلاتفورمانىڭ الگوريتمدىك جۇيەسى ەموتسياعا قۇرىلعان, قارالىم جيناۋعا بەيىم كونتەنتتى العا شىعارادى. مۇنداي جاعدايدا اقپاراتتىڭ ناقتىلىعى مەن ساپاسى ەكىنشى ورىنعا ىسىرىلىپ, جالعان نەمەسە تەكسەرىلمەگەن مالىمەتتەردىڭ تارالۋ قاۋپى كۇشەيەدى.
TikTok جۇلدىزى حابي لەيم ءوزىنىڭ جي-سىڭارىن 975 ميلليون دوللارعا ساتتى
جۋرناليستيكا ءۇشىن ەڭ وزەكتى ماسەلەنىڭ ءبىرى − كاسىبي ستاندارتتاردى ساقتاۋ. TikTok-تا كەز كەلگەن قولدانۋشى ءوزىن اقپارات تاراتۋشى رەتىندە كورسەتە الادى. الايدا جۋرناليستىك قىزمەت جاۋاپكەرشىلىكپەن, دەرەككوزدەردى تەكسەرۋمەن جانە ەتيكالىق نورمالاردى ساقتاۋمەن تىكەلەي بايلانىستى. وسى ەرەكشەلىكتەردى ەسكەرمەي, الەۋمەتتىك جەلىدەگى كەز كەلگەن كونتەنتتى جۋرناليستيكامەن تەڭەستىرۋ دۇرىس ەمەس.
دەگەنمەن TikTok-تى ءداستۇرلى جۋرناليستيكاعا قارسى قويۋ بىرجاقتى كوزقاراس بولار ەدى. قازىرگى تاڭدا كوپتەگەن مەديا ۇيىمدار بۇل پلاتفورمانى اۋديتوريامەن بايلانىس ورناتۋدىڭ, جاڭالىققا قىزىعۋشىلىق تۋدىرۋدىڭ ءتيىمدى قۇرالى رەتىندە پايدالانىپ وتىر. قىسقا ۆيدەو − اقپاراتقا باستايتىن العاشقى قادام, ال تەرەڭ تالداۋ مەن تولىق ءتۇسىندىرۋ ءداستۇرلى مەديانىڭ ۇلەسىندە قالۋى ءتيىس.
TikTok-تا قازاق ۇلتىنا ءتىل تيگىزگەن قوستاناي تۇرعىنى 2 جىلعا سوتتالدى
قورىتىندىلاي كەلە, TikTok ءداۋىرى جۋرناليستيكانى جوققا شىعارعان جوق, كەرىسىنشە ونى جاڭا فورماتقا بەيىمدەدى. قىسقا بەينە قوعامعا اقپاراتقا قولجەتىمدىلىكتى ارتتىردى, الايدا ساپا مەن جاۋاپكەرشىلىك ماسەلەسىن الدىڭعى قاتارعا شىعاردى. بۇگىنگى جۋرناليستيكا ءۇشىن باستى مىندەت − جىلدامدىق پەن تەرەڭدىكتىڭ, تانىمالدىق پەن سەنىمدىلىكتىڭ اراسىنداعى تەپە-تەڭدىكتى ساقتاۋ.
الۋا مۇراتحانقىزى,
ەۇۋ ستۋدەنتى
