نيۋ-يورك قالاسىنا جاۋعان قاردىڭ قالىڭدىعى شامامەن 60 سانتيمەترگە جەتتى. وسى تابيعات قىسپاعىنىڭ سالدارىنان مەكتەپتەر جابىلىپ, كولىك قوزعالىسى سيرەپ, قالا كورىنىسى كۇرت وزگەردى. ال Central Park سىرعاناق تەۋىپ, اققالا جاساعان بالالار مەن وتباسىلار جينالعان دەمالىس الاڭىنا اينالدى.
قالانىڭ ورتالىق ساياباعىندا سوڭعى ون جىلدان استام ۋاقىتتاعى ەڭ قالىڭ قار تىركەلدى. قاۋىپسىزدىك ماقساتىندا جول جۇرۋگە ۋاقىتشا شەكتەۋ قويىلىپ, كولىكتەردىڭ باسىم بولىگىنىڭ قوزعالىسى توقتادى. قوعامدىق كولىك پەن جەدەل جاردەم قىزمەتى عانا دوڭگەلەكتەرىنە تايعاناۋدان ساقتايتىن شىنجىر بايلاپ الىپ, باياۋ عانا قوزعالىپ ءجۇر.
قالا بويىنشا مەكتەپتەر مەن بالاباقشالاردىڭ جابىلعانى ايتپاسا دا تۇسىنىكتى. دەسە دە بالالار بوس ۋاقىتىن ساياباقتاردا وتكىزىپ جاتىر. Central Park تۇرعىنداردىڭ شانامەن سىرعاناپ, اققالا جاساپ, قىس قىزىعىنا باتاتىن شاعىن قالاشىققا اينالىپ شىعا كەلدى.
قالا مەرى زوحران مامداني اۋا رايىنىڭ كۇرت ناشارلاۋىنا قاراماستان, دالادا جۇرگەن ءۇيسىز-كۇيسىز ادامدار اراسىندا قازا تاپقاندار تىركەلمەگەنىن ايتتى. ونىڭ سوزىنشە, بۇل توتەنشە قىزمەتتەردىڭ جەدەل جۇمىسى مەن ۋاقىتشا باسپانالاردىڭ كوبەيتىلۋىنىڭ ناتيجەسى.
80 جاستاعى قازاقستاندىق سپورتشى نيۋ-يورك مارافونىن باعىندىردى
قالادا مەترو پويىزدارى دا كىدىرىپ قالىپ جاتىر. ال مۇز قاتقان كوشەلەر تۇرعىنداردىڭ دا ءجۇرىپ-تۇرۋىن قيىنداتا ءتۇستى. دەگەنمەن كەيبىر قالا تۇرعىندارى بوس قالعان كوشەلەردە شاڭعى تەۋىپ جۇرسە, ەندى ءبىرى ەرىگەن قاردىڭ كوكتايعاققا اينالۋىنان قاۋىپتەنىپ, اۋلالارىن تازالاۋعا كىرىسكەن.
وسىلايشا, ادەتتە قاربالاسقا تولى بولىپ جاتاتىن Times Square ماڭى بۇگىن ەرەكشە تىنىشتىق قۇشاعىنا ەندى.
