ترامپ قۇپيا ماتەريالداردىڭ تولىقتاي جاريالاناتىنىن ناقتىلاماسا دا, «اسا كۇردەلى, بىراق وتە قىزىقتى ءارى ماڭىزدى تاقىرىپتارعا قاتىستى بارلىق اقپاراتتى» قامتۋدى تاپسىردى.
Truth Social پلاتفورماسىنداعى جازباسىندا ول بۇل شەشىم قوعام تاراپىنان بەلگىسىز اۋە قۇبىلىستارى (UAP) جانە جەردەن تىس تىرشىلىك تاقىرىبىنا دەگەن جوعارى قىزىعۋشىلىق تۋىنداۋىنا بايلانىستى قابىلدانعانىن اتاپ ءوتتى.
بۇل تاقىرىپقا قىزىعۋشىلىق بۇرىنعى اقش پرەزيدەنتى باراك وبامانىڭ جۋىرداعى مالىمدەمەسىنەن كەيىن كۇشەيدى. ول پودكاستتاعى سۇحباتىندا عالامنىڭ اۋقىمى وتە كەڭ بولعاندىقتان, وندا تىرشىلىكتىڭ بولۋى ىقتيمال ەكەنىن ايتقان. الايدا ءوزى ەشقانداي بوتەن تىرشىلىك يەلەرىن كورمەگەنىن جانە پرەزيدەنتتىك كەزەڭىندە مۇنداي بايلانىس تۋرالى دالەلدەر بولماعانىن جەتكىزگەن.
اقش-تىڭ كەلەسى پرەزيدەنتى كىم بولۋى مۇمكىن؟
كەيىن وباما Instagram جەلىسىندە تۇسىندىرمە جاساپ, عالامدا ءومىردىڭ بولۋى ستاتيستيكالىق تۇرعىدان مۇمكىن ەكەنىن, بىراق جۇلدىز جۇيەلەرى اراسىنداعى قاشىقتىق وتە ۇلكەن بولعاندىقتان, جەرگە وزگە وركەنيەتتەردىڭ كەلۋى ەكىتالاي ەكەنىن اتاپ ءوتتى.
ترامپ وبامانىڭ سوزدەرىنە قاتىستى پىكىر ءبىلدىرىپ, ونىڭ ايتقاندارى قۇپيا اقپاراتقا قاتىستى بولۋى مۇمكىن ەكەنىن مەڭزەدى.
2024 جىلى پەنتاگون جاريالاعان ەسەپتە وزگە عالامشارلىقتاردىڭ جەردەن تىس تەحنولوگيا ەكەندىگىن دالەلدەيتىن ايعاقتار تابىلماعانى ايتىلعان. ۆەدومستۆونىڭ مالىمەتىنشە, مۇنداي جاعدايلاردىڭ باسىم بولىگى بارلاۋ ۇشاقتارى, جاساندى جەر سەرىكتەرى نەمەسە مەتەورولوگيالىق شارلارمەن بايلانىستى.
سوعان قاراماستان, ترامپتىڭ بۇل باستاماسى الەۋمەتتىك جەلىلەردە جانە زاڭ شىعارۋشىلار اراسىندا قولداۋ تاپتى. بەلگىسىز اۋە قۇبىلىستارىن زەرتتەۋ جونىندەگى جۇمىس توبىن باسقاراتىن رەسپۋبليكالىق كونگرەسس مۇشەسى اننا پولينا لۋنا پرەزيدەنتكە العىس ءبىلدىرىپ, بارلىق ماتەريالداردى قوعاممەن بىرگە قاراۋعا دايىن ەكەنىن مالىمدەدى.
ال دەموكرات سەناتور دجون فەتتەرمان Fox News ارناسىنا بەرگەن سۇحباتىندا بۇل شەشىمدى وڭ باعالاپ, «امەريكا دا, بۇكىل الەم دە بۇل ماسەلەدە اشىقتىققا لايىق» ەكەنىن ايتتى.
