اسكەري دروننىڭ ءتىلىن تاپقان مامان

30 رەت

كورسەتىلدى

3 مين

وقۋ ءۇشىن

Cوڭعى جىلدارى اسكەري سالادا ۇشقىشسىز ۇشۋ اپپاراتىن (درون) باسقارۋ ماشىعىنىڭ ماڭىزى ايرىقشا ارتىپ كەلەدى. قاشىقتان بارلاۋ, اقپارات جيناۋ, جاۋىنگەرلەردىڭ قاۋىپسىزدىگى مەن تاكتيكالىق يكەمدىلىك تۇرعىسىنان درونداردى باسقارۋدى ۇيرەنۋ ستراتەگيالىق مۇمكىندىكتەردى دە كەڭەيتەدى. زاماناۋي شەشىمدەردى شەبەر مەڭگەرۋ مەن تاجىريبە تولىستىرۋ ماقساتىندا 19-20 اقپان كۇندەرى ەلوردادا اسكەريلەر اراسىندا AITU KazRoboDrone 3.0 حالىقارالىق درون-رەيسينگ جانە اۆيامودەلدەۋ جارىسى ۇيىمداستىرىلدى, دەپ جازادى Egemen.kz.

دانا مىرزاقادىر

فوتو: gov.kz

Astana IT University بازاسىندا وتكەن اسكەريلەر باسەكەسىندە وڭىرلەر مەن شەتەلدەن جەتكەن 120-دان استام قاتىسۋشى باس قوسىپ, ولاردىڭ ىشىندە 20-سى درون دوداسىندا شەبەرلىك بايقاستى. ولار وزدەرى باسقاراتىن قۇرىلعىنى تراسسادان ءوتۋ جىلدامدىعى, مانەۆر جاساۋ دالدىگى مەن ۇشۋ شەبەرلىگى تالاپتارى بويىنشا سىناپ كوردى.

حالىقارالىق جارىستا ەل نامىسىن قورعاعاندار اراسىندا ىشكى ىستەر مينيسترلىگى ۇلتتىق ۇلاننىڭ «Burkit Team» سپورت كومانداسىنىڭ مۇشەسى بەكزات تا بار. «SABR» لاقاپ اتىن يەلەنگەن اسكەري قىزمەتشى بەدەلى بيىك باسەكەدە ەل اسكەري جۇيەسىندە FPV دروندى باسقارۋ دالدىگى تەرەڭ يگەرىلىپ جاتقانىن دالەلدەپ, جۇلدەلى ءۇشىنشى ورىندى يەلەندى. جۇلدەگەر بىزگە جارىسقا قالاي دايىندالعانىن ايتىپ بەردى.

«بۇل جارىسقا دايىندىق قىسقا مەرزىمدە ءوتتى. ءوزىم وسى FPV دروندارىن باسقارۋ داعدىمدى ASHYQ ASPAN FOUNDATION عىلىمي قورىندا باسشىلىقتىڭ قولداۋىمەن 2 اپتالىق كۋرستا شىڭداي ءتۇستىم. اراعا ءبىر اي سالىپ العاشقى جارىسىما قاتىسىپ, جۇلدەلى ورىندى يەلەندىم. اسىلىندا, ۆيدەوگرافتاردىڭ درونىن باسقارۋ وڭاي. ال ارنايى ماقساتتاعى دروندار ءبىرشاما ەپتىلىك پەن ىزدەنۋدى قاجەت ەتەدى. جارىس بارىسىندا تىزگىندەگەن FPV دروندارىن 1 جارىم اي كولەمىندە ىرقىما كوندىردىم», دەيدى «Burkit Team» سپورت كومانداسىنىڭ مۇشەسى.

ارنايى جاساق جاۋىنگەرى: قازاقستان اسكەري قۇرىلىمىنىڭ دايىندىعى جوعارى دەڭگەيدە ەكەنىن دالەلدەدىك

سالاداعى جاڭاشىلدىقتارعا تەز داعدىلانعان مامان درون ءتىلىن تابۋ ءۇشىن ەڭ الدىمەن, قىزىعۋشىلىق پەن تالماي ىزدەنۋ قاجەت ەكەنىن تىلگە تيەك ەتىپ, جارىس بارىسىنداعى تاۋەكەلدى تۇستاردى دا اتاپ ءوتتى.

«جارىس جولىندا ارنايى ورناتىلعان ءتۇرلى كەدەرگىلەردىڭ ءدال ىشىنەن جىلدام, سوقتىقپاي ءوتۋ كەرەك ءارى درون جىلدامدىعى ۋاقىت كورسەتكىشى بويىنشا تىركەلىپ وتىرادى. جارىس بارىسىندا ءتۇرلى قيىندىقتار مەن كەدەرگىلەر كەزدەسەدى. ناقتى ايتسام درون مەن كوزىلدىرىكتىڭ بايلانىسى ءۇزىلىپ, بەينە كورىنبەي كەتۋى مۇمكىن جانە كەدەرگىلەردەن ءوتۋ كەزىندە بۇرىلىستاردىڭ جاقىن بولۋى دا ىڭعايسىزدىق تۋدىردى. دەسە دە مۇنداي ماسەلەلەردى ەڭسەرىپ, جۇلدەگەرلەر قاتارىنان تابىلعانىما قۋانىشتىمىن», دەدى ول.