مينيسترلىكتىڭ دەرەكتەرىنە سۇيەنسەك, 2025-2035 جىلدار ارالىعىندا ەكونوميكادا كادرلارعا دەگەن جالپى قاجەتتىلىك 2,9 ملن ادامدى قۇرايدى. بۇل كورسەتكىش ەكونوميكالىق وسىمگە, جاڭا جۇمىس ورىندارىنىڭ اشىلۋىنا جانە زەينەتكە شىعاتىن قىزمەتكەرلەردىڭ ورنىن باسۋعا بايلانىستى قالىپتاسادى.
اسىرەسە بىلىكتى ماماندارعا سۇرانىس ارتادى. كاسىبي جانە جوعارى ءبىلىمى بار قىزمەتكەرلەرگە دەگەن قاجەتتىلىك 2,5 ملن ادامعا دەيىن جەتىپ, شامامەن 27%-عا وسەدى دەپ كۇتىلەدى. بۇل ەڭبەك نارىعىندا زاماناۋي داعدىلار مەن قولدانبالى ءبىلىمنىڭ ماڭىزى كۇشەيەتىنىن بىلدىرەدى.
قازاقستان اقش-پەن بىرلەسىپ اتوم ەنەرگەتيكاسى سالاسىنا قاجەتتى كادرلار دايىندايدى
سونىمەن قاتار جۇمىسشى ماماندىقتارعا دا سۇرانىس ايتارلىقتاي وسەدى. وندىرىستىك جانە تەحنيكالىق سالادا 813 مىڭ مامان قاجەت بولادى, بۇل قازىرگى دەڭگەيدەن 48%-عا جوعارى. دەمەك, ناقتى سەكتور مەن ينفراقۇرىلىمدىق جوبالاردىڭ ءرولى ارتا تۇسپەك.
قاي سالالاردا سۇرانىس جوعارى بولادى؟
سالالىق قۇرىلىمعا كوز جۇگىرتسەك, ەڭ كوپ كادر قاجەت ەتەتىن باعىتتار – الەۋمەتتىك جانە وندىرىستىك سالالار.
ءبىلىم بەرۋ سالاسى الدىڭعى ورىندا تۇر. 2035 جىلعا دەيىن بۇل سالاعا 447,7 مىڭ قىزمەتكەر كەرەك بولادى. بۇل جالپى قاجەتتىلىكتىڭ شامامەن 15%-ىن قۇرايدى. سۇرانىستىڭ ارتۋى دەموگرافيالىق ءوسىم مەن ءبىلىم بەرۋ جۇيەسىندەگى رەفورمالارعا بايلانىستى.
ساۋدا سالاسىندا (كوتەرمە جانە بولشەك ساۋدا) 251,3 مىڭ ادامعا سۇرانىس بولادى (8,4%). بۇل سالا ءىرى قالالاردا جۇمىسپەن قامتۋدىڭ نەگىزگى درايۆەرلەرىنىڭ ءبىرى بولىپ قالا بەرەدى.
ال دەنساۋلىق ساقتاۋ جۇيەسىندە 240,4 مىڭ مامان قاجەت (8%). دارىگەرلەرگە, مەيىرگەرلەرگە جانە قوسالقى مەديتسينالىق قىزمەتكەرلەرگە دەگەن سۇرانىس تۇراقتى تۇردە جوعارى بولماق.
وڭدەۋ ونەركاسىبىندە 231,4 مىڭ ادام قاجەت بولادى. بۇل يندۋستريالاندىرۋ ساياساتى مەن وندىرىستىك الەۋەتتى ارتتىرۋعا باعىتتالعان مەملەكەتتىك باسىمدىقتاردى كورسەتەدى.
سونىمەن بىرگە اۋىل شارۋاشىلىعىنا 222,1 مىڭ ادام (7,5%), ال قۇرىلىس سالاسىندا 216,8 مىڭ ادام (7,2%) قاجەت بولادى. بۇل ەكى باعىت تا ەلدىڭ ازىق-ت ۇلىك قاۋىپسىزدىگى مەن ينفراقۇرىلىمدىق دامۋى ءۇشىن ستراتەگيالىق ماڭىزعا يە.
كادر تاپشىلىعى قاي وڭىرلەردە بايقالادى؟
وڭىرلىك ءبولىنىس بويىنشا ەڭ جوعارى سۇرانىس ءىرى ەكونوميكالىق ورتالىقتاردا شوعىرلانادى. ەڭ كوپ مامان قاجەت بولاتىن قالا – الماتى (464 مىڭعا دەيىن كادر). سونداي-اق قالا بيزنەس, قارجى جانە قىزمەت كورسەتۋ سالاسىنىڭ نەگىزگى ورتالىعى بولىپ قالا بەرەدى.
ەكىنشى ورىندا – استانا. ەلوردادا 263,4 مىڭ مامانعا سۇرانىس بار. اكىمشىلىك, قۇرىلىس جانە سەرۆيس سالالارىنىڭ دامۋى بۇل كورسەتكىشكە اسەر ەتەدى. قاراعاندى وبلىسىندا – 191,6 مىڭ ادامعا, الماتى وبلىسىندا – 172 مىڭ ادامعا, تۇركىستان وبلىسىندا – 173,6 مىڭ ادامعا سۇرانىس قالىپتاسادى. سونداي-اق شىمكەنت قالاسىندا 141,8 مىڭ مامان قاجەت بولادى.
بۇل دەرەكتەر كادر تاپشىلىعى تەك مەگاپوليستەردە عانا ەمەس, وندىرىستىك جانە اگرارلىق الەۋەتى بار وڭىرلەردە دە سەزىلەتىنىن كورسەتەدى.
جۇمىسسىزدىق ماسەلەسى شەشىلە مە؟
كادرلارعا دەگەن اۋقىمدى سۇرانىسقا قاراماستان, جۇمىسسىزدىق دەڭگەيى سالىستىرمالى تۇردە تومەن كۇيىندە قالادى دەپ بولجانعان. 2026-2028 جىلدارى بۇل كورسەتكىش 4,7% شاماسىندا بولادى. ياعني ماسەلە جۇمىس ورىندارىنىڭ جەتىسپەۋىندە ەمەس, مامانداردىڭ بىلىكتىلىگى مەن نارىق تالاپتارىنىڭ سايكەس كەلمەۋىندە بولۋى مۇمكىن. بۇل – قۇرىلىمدىق تەڭگەرىمسىزدىك قاۋپىن بىلدىرەدى.
2035 جىلعا دەيىنگى بولجام قازاقستان ەڭبەك نارىعىنىڭ تەرەڭ ترانسفورماتسيا كەزەڭىنە اياق باسقانىن اڭعارتادى. 3 ملن-عا جۋىق مامانعا دەگەن سۇرانىس – ءبىر جاعىنان ۇلكەن سىن-قاتەر, ەكىنشى جاعىنان ەكونوميكانى جاڭعىرتۋعا مۇمكىندىك.
بىلىكتى كادرلار مەن جۇمىسشى ماماندىقتارعا سۇرانىستىڭ ارتۋى ءبىلىم بەرۋ جۇيەسىن جاڭعىرتۋدى, كاسىپتىك باعدارلاۋدى كۇشەيتۋدى جانە بيزنەس پەن وقۋ ورىندارى اراسىنداعى بايلانىستى نىعايتۋدى تالاپ ەتەدى.
الداعى ونجىلدىقتا كادرلىق ساياسات ەلدىڭ باسەكەگە قابىلەتتىلىگىن ايقىندايتىن باستى فاكتورلاردىڭ بىرىنە اينالۋى مۇمكىن.
