فوتو: كولىك مينيسترلىگى
قالاداعى ابىلقايىر حان مەن ساعادات نۇرماعامبەتوۆ كوشەلەرىنىڭ قيىلىسىندا وتاندىق NAZAR اۆتونومدى جاياۋ جۇرگىنشىلەر وتكەلى پايدالانۋعا بەرىلدى. جۇيە جاياۋ جۇرگىنشى انىقتالعان ساتتە اۆتوماتتى تۇردە ىسكە قوسىلىپ, قوسىمشا جارىقتاندىرۋدى جانە جول بەتىنە ستوپ-سىزىقتىڭ جارىق پروەكتسياسىن شىعارادى.
اسىرەسە قاراڭعى ۋاقىتتا وتكەلدىڭ كورىنۋىن ايتارلىقتاي ارتتىرىپ, جولدى كەسىپ ءوتۋ قاۋپى تۋىنداعان ساتتە جۇرگىزۋشىلەردىڭ نازارىن كۇشەيتەدى. ياعني, تەحنولوگيا ادامدى قاعىپ كەتۋ تاۋەكەلىن ازايتۋعا باعىتتالعان.
بىلتىر قىزىلوردادا جاياۋ جۇرگىنشىلەر ەرەجەنى نەشە رەت بۇزعان؟
عىلىمي سۇيەمەلدەۋ جانە مونيتورينگ
جوبانى ەنگىزۋگە عىلىمي-تەحنيكالىق سۇيەمەلدەۋدى قازاقستان جول عىلىمي-زەرتتەۋ ينستيتۋتى (قازجولعزي) جۇزەگە اسىرىپ جاتىر. ينستيتۋت ماماندارى اتالعان ۋچاسكەدە تۇراقتى مونيتورينگ جۇرگىزىپ, كولىك قۇرالدارىنىڭ قوزعالىس پارامەترلەرىن تالدايدى جانە نىساننىڭ قولدانىستاعى نورماتيۆتىك تالاپتارعا سايكەستىگىن تەكسەرەدى.
قازجولعزي باس مامانى زاكيرجان دانياردىڭ ايتۋىنشا, جۇيە ورناتىلعاننان كەيىن جۇرگىزۋشىلەردىڭ مىنەز-قۇلقى جان-جاقتى باعالانادى.
«كولىك اعىنىنىڭ جىلدامدىعىن, ىقتيمال قاقتىعىس جاعدايلارىنىڭ سانىن جانە وتكەلدى پايدالانۋ قارقىندىلىعىن تىركەيمىز. مونيتورينگ قورىتىندىسى بويىنشا بۇل شەشىمنىڭ تيىمدىلىگىنە وبەكتيۆتى باعا بەرىلەدى», دەدى ول.
جكو-نى ازايتۋعا باعىتتالعان قادام
سالالىق قۇرىلىمداردىڭ دەرەكتەرىنە سايكەس, جول-كولىك وقيعالارىنىڭ ەڭ ءجيى كەزدەسەتىن تۇرلەرىنىڭ ءبىرى – جاياۋ جۇرگىنشىنى قاعىپ كەتۋ. مۇنداي جاعدايلارعا كوبىنە جارىقتاندىرۋدىڭ جەتكىلىكسىزدىگى جانە رەتتەلمەيتىن وتكەلدەردىڭ كوزگە انىق تۇسپەۋى سەبەپ بولادى.
ينستيتۋت ساراپشىلارىنىڭ حالىقارالىق تاجىريبەنى تالداۋىنا سۇيەنگەن باعالاۋى بويىنشا, بەلسەندى جارىقتىق ينديكاتسيانى قولدانۋ جاياۋ جۇرگىنشىنى قاعىپ كەتۋ وقيعالارىن ورتا ەسەپپەن 30-40%-عا دەيىن ازايتۋى مۇمكىن.
قازىر جوبا پراكتيكالىق سىناق كەزەڭىنەن ءوتىپ جاتىر. جينالعان دەرەكتەر ساراپتالعاننان كەيىن رەسپۋبليكالىق جانە جەرگىلىكتى ماڭىزى بار اۆتوموبيل جولدارى جەلىسىندە وسىنداي اۆتونومدى وتكەلدەردى كەزەڭ-كەزەڭىمەن ەنگىزۋ مۇمكىندىگى قاراستىرىلادى.
