كوپەن كۇلكىگە كومدى

«كۇلكى – كۇشتىلەردىڭ قارۋى», «كۇ­لە بىلگەنىمىز – ءومىر سۇرە ءبىل­گەنى­مىز», «ءومىر بار جەردە – يۋمور بار»... كەزىندە قازاق ساتيراسىنىڭ سارابدال قازىسى اتانعان تەمىربەك قوجاكەەۆ ءبىزدى وسىلاي وقىتاتىن. انشەيىندە قاراسى كورىنسە التى قىردى اينالىپ قاشاتىن ستۋدەنتتەر قاتال پروفەسسورىمىزدىڭ سا­با­عىندا ەكى ەزۋلەرىن جيا الماي قا­لاتىن. قىزىقتى لەكتسيانىڭ «قىزۋىمەن» ءتىپتى, ونىڭ جۋرفاكتى اشسا – الاقانىندا, جۇمسا – جۇدىرىعىندا ۇستايتىن دوكەي دەكان ەكەنى ەسىمىزدەن شىعىپ كەتەتىن. ال, ەندى وسى تەمكەڭنىڭ «تەپ­كىسىنە» شىداعان شاكىرتتەرىنىڭ تالايى كەيىن ءباسپاسوزدىڭ باھا­دۇرى اتانعانى بەلگىلى. ەلوردا ەندىگىندەگى ەڭ بەدەلدى وقۋ وردا­لا­رىنىڭ بىرىنەن سانالاتىن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندەگى «كاۋ­سار» مادەني-تانىمدىق ءبىر­­­لەستىگى ۇيىم­داستىرعان «ءان مەن ءازىل» اتتى كو­ڭىلدى كەشتە كوپشىلىكتى كۇلكىگە كە­نەلتكەن كوپەن ءامىر­بەكوۆ تە سولار­دىڭ سويى­نان. اڭگىمە تىزگىنىن ادەتتەگىدەي ءوز قولىنا العان اتالمىش رۋحاني تا­عىلىم وتاۋىنىڭ جەتەكشىسى, قازاق­ستاننىڭ ەڭبەك سىڭىرگەن ءار­تىسى كەنجەعالي مىرجىقباەۆ كەزدەسۋگە كەلگەن قادىرلى قوناقتىڭ قو­جاناسىر باباسىنان ميراس قىلعان قالجىڭ قورجىنىن اقتارىپ, كورەرمەن قاۋىمعا كوتەرىڭكى كوڭىل-كۇي سىيلادى. كورگەنى بار كوپەكەڭ كوزى قا­راقتى وقىرمانعا جاقسى تانىس «مىڭ ءبىر مىسالىنان» ۇزىندىلەر وقىپ ۇزدىككەن جوق. ەسەسىنە ەسىم­دەرى ەلگە تانىمال وسپانحان ءاۋ­باكىروۆ, شونا سماحان ۇلى, سا­دىقبەك ادامبەكوۆ, قالتاي مۇحامەدجانوۆ, ءشامشى قالداياقوۆ, قاجىتاي ءىلياسوۆ سەكىلدى الاشقا اتى كەتكەن الدىڭعى بۋىن اعالارى تۋرالى ءازىل-شىنى ارالاس ادەمى ەستەلىكتەر ايتتى. ولاردىڭ قوعام قوتىرىن قانىن شىعارا قاسىعان تىكەنەك ءتىلدى تۋىندىلارىنىڭ ءالى كۇنگە دەيىن ومىرشەڭدىگىن اتاپ ءوتتى. ۇزاق جىلدارعى ۇزىلىستەن كەيىن رەسپۋبليكالىق «ايقىن» گازەتىنىڭ قوسىمشاسى بولىپ جا­رىق كورىپ جاتقان «ارانىڭ» رەداكتورى رەتىندە قازىرگى تاڭدا قات­تى بەلەڭ العان جەمقورلىق, پا­راقورلىق, سىبايلاستىق سياقتى كە­ساپاتتاردىڭ تامىرىنا بالتا شابىلماي مەملەكەتتىگىمىزدى نىعايتۋ ءىسى ىلگەرى باسپايتىنىن جەتكىزدى. اسەرلى كەش داۋىسى كوك­تە دا­مىلداعان كەنجەعالي مىر­جىق­­باەۆتىڭ ورىنداۋىنداعى ءماريام جاگورقىزىنىڭ «دۋدار-اي», سىدىق مۇحامەدجانوۆتىڭ «ءاي­تەۋىر سول قىز – ءبىر سۇلۋ» , ءشام­شى قالداياقوۆتىڭ «ءانىم سەن ەدىڭ» جانە تاعى باسقا الەۋمەت ءسۇيىپ تىڭدايتىن تاماشا اندەرمەن ءادىپ­تەلىپ وتىردى. كەزدەسۋ سوڭىندا ساحناعا كوتە­ر­­ىلگەن ۋنيۆەرسيتەت رەكتورى ەرلان سىدىقوۆ قابىرعالى قالام­گەرگە جينالعان جۇرتشىلىق اتى­نان ريزاشىلىعىن ءبىلدىرىپ, شىعار­ماشىلىق تابىس تىلەدى. تالعات باتىرحان, «ەگەمەن قازاقستان». سۋرەتتى تۇسىرگەن ەربول ەردەنبەك.