استانادا كۇرەس تۇرلەرىنەن وليمپيادا جولداماسى ساراپقا سالىنادى

استانا. 16 ناۋرىز. 18-20 ناۋرىز كۇندەرى استانا قالاسىندا كۇرەس تۇرلەرىنەن ازيا قۇرلىعى بويىنشا ريو-دە-جانەيرو وليمپياداسىنا ىرىكتەۋ ءتۋرنيرى وتەدى. بۇل تۋرالى ۇلتتىق شتاتتىق كوماندالار جانە سپورتتىق رەزەرۆ ديرەكتسياسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. سايىسقا قۇرلىقتىڭ 20-دان استام ەلىنەن پالۋاندار قاتىسادى دەپ جوسپارلانۋدا. ولاردىڭ اراسىندا يران, قىتاي, جاپونيا, موڭعوليا, وڭتۇستىك كورەيا جانە ءۇندىستان سىندى ءبىزدىڭ پالۋاندارعا باستى باسەكەلەس بولاتىن ەلدەردىڭ وكىلدەرى بار. استاناداعى تۋرنيردە التى سالماق دارەجەسى بويىنشا وليمپيادا جولداماسى تاراتىلادى. اتاپ ايتقاندا, گرەك-ريم كۇرەسىنەن – 59 كگ, 66 كگ, 75 كگ, 85 كگ, 98 كگ, 130 كگ, ەركىن كۇرەستەن – 57 كگ, 65 كگ, 74 كگ, 86 كگ, 97 كگ, 125 كگ جانە ايەلدەر كۇرەسىنەن 48 كگ, 53 كگ, 58 كگ, 63 كگ, 69 كگ, 75 كگ سالماقتاعى پالۋاندار جولداماعا تالاسادى. وسى سالماقتاردا جوعارىدا اتالعان ەلدەر استاناعا ءبىرىنشى ءنومىرلى پالۋاندارىن اكەلەتىنىن اتاپ وتكەن ءجون. ايتا كەتەيىك, بۇگىندە ۇلتتىق قۇراما قورجىنىندا كۇرەس تۇرلەرىنەن 3 وليمپيادا جولداماسى بار. ولاردى گرەك-ريم كۇرەسىنىڭ شەبەرى المات كەبىسباەۆ (59 كگ), تاعى ءبىر «كلاسسيك» پالۋانىمىز دوسجان كارتىكوۆ (75 كگ) جانە ەركىن كۇرەستەن ەل نامىسىن قورعايتىن ارتاس سانا (57 كگ) ەنشىلەگەن بولاتىن. وسىعان بايلانىستى بۇل سپورتشىلار ەلورداداعى سايىسقا قاتىسپايدى. ال قالعان سالماقتاردا قۇراما جاتتىقتىرۋشىلارى تەك ۇزدىكتەرگە عانا سەنىم ارتىپ وتىر. ەلامان قوڭىر. دەرەك: ۇلتتىق شتاتتىق كوماندالار جانە سپورتتىق رەزەرۆ ديرەكتسياسىنىڭ ءباسپاسوز قىزمەتى. سۋرەت: astana-sport.kz.