بانگلادەشتە ەكى قولىن سۇيەل باسقان ناۋقاسقا وتا جاسالدى

استانا. 13 ناۋرىز. بانگلادەشتە دارىگەرلەر ەكى قولىن تۇتاستاي سۇيەل قاپتاپعان ناۋقاسقا كۇردەلى وتا جاسادى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. دارىگەرلەر كۇندەلىكتى تاجىريبەدە ءجيى كەزدەسە بەرمەيتىن ەڭ كۇردەلى وتانى جاسادى. اتاپ ايتقاندا, بۇل جولعى ناۋقاستىڭ دەرتى بولەك. 10 جىلدان بەرى اۋرۋ ازابىن تارتىپ كەلگەن 25 جاستاعى ابۋل باياندرا «ەپيدەرموديسپلازيا ۆەررۋتسيفورميس», ياعني قاراپايىم تىلدە «اعاش ادام» دەگەن دەرتكە شالدىققان. اۋرۋى اسقىنعانعا دەيىن ارباكەش بولعان ول قازىر ءوز قولىمەن تاماق ىشە المايدى. سەبەبى اعاش تامىرىنا ۇقساس سۇيەل, ونىڭ الاقانى مەن ساۋساقتارىن تۇگەل باسىپ كەتكەن. ايتا كەتەيىك, 3 ساعاتقا سوزىلعان وتادان شىققان دارىگەرلەر جارا ورنى ءبىتۋى ءۇشىن تاعى 6 اي ۋاقىت قاجەت دەيدى. سونداي-اق, پلاستيكالىق حيرۋرگ سامانتا لال سەن «ءبىز ناۋقاستى تولىقتاي تەكسەرىستەن وتكىزىپ, سۇيەلدى جويۋ ءۇشىن العاشقى وپەراتسيا جاسادىق. بىراق وپەراتسيا سانى 10-12-گە دەيىن بارۋى مۇمكىن. وعان قوسا ناۋقاستىڭ تەرىسى مەن قان قۇرامىن امەريكاعا ساراپتاماعا جىبەرىپ, ناتيجەسىن كۇتۋدەمىز. ءبىز ونىڭ ەكى قولىنا دا وپەراتسيا جاساپ, سۇيەلدىڭ ءوسۋىن توقتاتامىز دەپ ويلايمىز», – دەدى. جالپى, ابۋل باياندرا مۇنداي دەرتكە شالدىققان الەمدەگى ءتورتىنشى ادام. تالعات رايىمبەك. دەرەك, سۋرەت: 24.kz.