ورالدا بالالارى سيرياعا كەتكەن اتا-انالار ناسيحات جۇمىستارىن جۇرگىزۋدە

ورال. 3 ناۋرىز. باتىس قازاقستان وبلىسىنىڭ ورتالىعى – ورال قالاسىندا بالالارى راديكالدى ءدىني اعىمداردىڭ جەتەگىنە ەرىپ, سيرياعا كەتكەن جانە سول جاقتا قازا تاپقان اتا-انالار مەشىتكە كەلىپ جەرگىلىكتى جاماعاتقا ۇگىت-ناسيحات جۇمىستارىن جۇرگىزۋدە. بۇل تۋرالى batysnewskz.kz سايتىنا سىلتەمە جاساعان egemen.kz ءتىلشىسى حابارلادى. اتا-انالار وزگەلەرگە ساباق بولار دەگەن نيەتپەن اداسقان بالالارىنىڭ تاعدىرىن بايانداپ, جاماعاتتى تەرىس پيعىلدى اعىمداردان ساقتانۋعا شاقىرۋدا. وبلىستىق ءدىن ماسەلەلەرىن زەرتتەۋ ورتالىعىنىڭ باسشىسى جاراس احانوۆتىڭ ايتۋىنشا, بۇگىندە سيرياعا سوعىسقا كەتكەن ورالدىقتاردىڭ ناقتى سانى بەلگىسىز. «بۇل اقپاراتتى قۇزىرلى ورگاندار قۇپيا ۇستاپ وتىر. ال جات اعىمنىڭ جەتەگىندە كەتىپ, سوتتالعان 24 ازاماتتىڭ ىشىندە مەملەكەتتىك قىزمەتكەرلەر دە بولعان. مەنىڭشە, تۋرا جولدان تايۋعا وتباسىنداعى تاربيەنىڭ دۇرىس جولعا قويىلماۋى سەبەپ. سوندىقتان قازىرگى تاڭدا ءبىرىنشى كەزەكتە جاستارمەن جۇمىستى كۇشەيتۋ كەرەك», – دەيدى جاراس احانوۆ. سونىمەن قاتار, ونىڭ سوزىنەن جالعان ۇگىت-ناسيحاتقا ۇرىنىپ, ءدىني ەكسترەميستىك كوزقاراسى بويىنشا سوتتالعان جانە اتالعان ورتالىققا كومەككە جۇگىنگەن ازاماتتاردىڭ 99 پايىزىنىڭ دۇرىس تاربيە الماعانى بەلگىلى بولدى. تەمىر قۇسايىن. دەرەك: batysnewskz.kz. سۋرەت: muftyat.kz.