اتىراۋ ءماسليحاتتارىنا 414 كانديدات تىركەلدى

اتىراۋ. 25 اقپان. اتىراۋ وبلىسىندا ءار دەڭگەيدەگى ماسليحاتتارعا 433 كانديدات ۇسىنىلىپ, ونىڭ 414-ءى تىركەلدى. بۇل تۋرالى اتىراۋ وبلىستىق اۋماقتىق سايلاۋ كوميسسياسىنىڭ توراعاسى اساۋ يبراشەۆتىڭ مالىمدەمەسىنە سىلتەمە جاساعان egemen.kz ءتىلشىسى حابارلادى. «اتىراۋ وبلىسىندا 134 وكرۋگ بويىنشا 433 كانديدات ۇسىنىلدى. سونىڭ 414-ءى ۇمىتكەر رەتىندە تىركەلدى. ولاردىڭ ىشىندە وبلىستىق ءماسليحاتتىڭ 27 سايلاۋ وكرۋگى بويىنشا 90 كانديدات ۇسىنىلىپ, 87-ءسى تىركەلدى. اتىراۋ قالالىق ءماسليحاتىنا 19 قالالىق سايلاۋ وكرۋگىنەن ۇسىنىلعان 65 كانديداتتىڭ 62-ءسى تىركەلدى. اۋداندىق ءماسليحاتتاردىڭ 88 سايلاۋ وكرۋگى بويىنشا 278 كانديدات ۇسىنىلىپ, ونىڭ 265-ءى تىركەۋدەن ءوتتى. بارلىق دەڭگەيدەگى ماسليحاتتارعا ۇسىنىلعان كانديداتتاردىڭ اراسىنان 19 كانديدات ءوز وتىنىشتەرىن كەرى قايتارىپ الدى», – دەپ ءمالىم ەتتى اتىراۋ وبلىستىق اۋماقتىق سايلاۋ كوميسسياسىنىڭ توراعاسى اساۋ يبراشەۆ. ءار دەڭگەيدەگى ماسليحاتتارعا ۇسىنىلعانداردىڭ اراسىندا 365 (88%) كانديداتتىڭ جوعارى ءبىلىمى بار, ال ارنايى ورتا بىلىممەن – 35 كانديدات (8%) جانە ورتا بىلىممەن – 14 كانديدات (4%) سايلاۋ دوداسىنا تۇسكەلى وتىر. كانديداتتاردىڭ كاسىبي ماماندىعى تۋرالى ايتار بولساق, دارىگەر – 21 ادام (5%), ينجەنەر – 74 (17%), ءبىلىم بەرۋ سالاسىنىڭ قىزمەتكەرى – 103 ادام (24,9%), زاڭگەر – 42 (10%) جانە باسقا ماماندىقتى مەڭگەرگەندەر ۇلەسى 174 (44%) ادامدى قۇرايدى. ساياسي پارتيالاردان 139 كانديدات بار, ولاردىڭ اراسىندا 134 كانديدات «نۇر وتان» پارتياسىنان, 3 كانديدات قازاقستان كوممۋنيستىك حالىق پارتياسىنان, ال 2 كانديدات «اق جول» دەموكراتيالىق پارتياسىنىڭ اتىنان سايلاۋعا تۇسەدى. اتىراۋ ءماسليحاتتارىنىڭ دەپۋتاتتىعىنان ءۇمىتتى كانديداتتاردىڭ اراسىندا 297 ەر ادام (72%) جانە 117 ايەل ادام (28%) بولسا, ولاردىڭ 275-ءى ءوزىن-ءوزى ۇسىنىپتى. كانديداتتاردىڭ ورتاشا جاسى – 44 جاس. جولداسبەك شوپەعۇل. دەرەك: اتىراۋ وبلىستىق اۋماقتىق سايلاۋ كوميسسياسى. سۋرەت: راحىم قويلىباەۆ.