Toyota اۆتوكونتسەرنى اقاۋى بار 3 ميلليون كولىكتى كەرى قايتاردى

استانا. 18 اقپان. جاپونيانىڭ Toyota اۆتوكونتسەرنى قاۋىپسىزدىك بەلدىگىنەن شىققان اقاۋعا بايلانىستى 2,87 ميلليون كولىكتى كەرى شاقىردى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. شاقىرىلعاندار قاتارىندا جاپونيا ايماعىنا تاراعان 2005-2014 جىلدارى شىققان RAV4 جانە 2005-2016 جىلدارى شىققان Vanguard ۇلگىلەرى بار.  سونداي-اق, اقاۋى بار كولىكتەردىڭ 1,1 ميلليونى اقش ايماعىنا تارالعان بولسا, ەۋروپادا 625 مىڭى بار. قىتايدا 434 مىڭ, جاپونيادا 177 مىڭ جانە قالعان 307 مىڭ كولىك وزگە دە مەملەكەتتەرگە ساتىلعان. ءۇش ميلليونعا جۋىق شاقىرتۋ العان كولىكتىڭ ورىندىعىنداعى مەتالدىق تىرەۋگە بايلانىستى قاۋىپسىزدىك بەلدىگى دۇرىس ورناتىلماعانى انىقتالدى. بۇل قاتەلىكتىڭ سالدارىنان جولاۋشىلار اپات كەزىندە قاتتى زارداپ شەگۋى مۇمكىن. كومپانيا باسشىلىعى بۇل اقاۋدىڭ بار ەكەنىن Toyota كولىگىنىڭ ەكى جۇرگىزۋشىسى جول اپاتىنا ۇشىراعاننان كەيىن عانا بىلگەن. ايتا كەتەيىك, اقپان ايىنىڭ باسىندا Toyota اۆتوكونتسەرنى اقش-تاعى 320 مىڭ كولىكتى كەرى شاقىرعان. قاۋىپسىزدىك جاستىعىنىڭ ەش سەبەپسىز ىسكە قوسىلىپ كەتۋىنەن كومپانيا وسىنداي قادامعا باردى. ايان ءابدۋالي. دەرەك: تاسس. سۋرەت: carrrsmag.com.