ەكاتەرينبۋرگ قالاسىندا مايدانگەرلەردى ەسكە الۋ ءراسىمى ءوتتى

الماتى. 18 اقپان. رەسەيدىڭ ەكاتەرينبۋرگ قالاسىندا كەڭەس وداعىنىڭ مارشالى گەورگي جۋكوۆتىڭ ەسكەرتكىشى الدىندا «ءبىز پانفيلوۆشىلارمىز – ميلليونبىز!» اتتى زەردە ۆاحتاسىنىڭ ءراسىمى ءوتتى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. ءىس-شارا 1941 جىلدىڭ قاراشا ايىندا ماسكەۋ ماڭىندا قازا تاپقان باتىر-پانفيلوۆشىلاردىڭ ەرلىگىنە ارنالدى. حالىقارالىق زەردە ۆاحتاسى 2015 جىلى قازان ايىندا ورىنبور قالاسىندا باستالعان. ەسكەرتكىش تۋ بۇعان دەيىن چەليابى, ءنوۆوسىبىر جانە الماتى قالالارىندا بولدى. ارداگەرلەرگە ارنالعان پاتريوتتىق يگى شارا قان مايدانداعى قىزىل اسكەرلەردىڭ العاشقى قارسى شابۋىلىنىڭ 75 جىلدىعىنا وراي, 2016 جىلدىڭ قازان ايىندا ماسكەۋ قالاسىندا اياقتالادى. ەكاتەرينبۋرگ قالاسىندا كەزەك بويىنشا بەسىنشى رەت وتكىزىلىپ تۇرعان شاراعا  وبلىس باسشىلىعى, اسكەريلەر, ديپلوماتتار, ورتالىق ازيا مەملەكەتتەرىنىڭ وكىلدەرى, ارداگەرلەر مەن قوعامدىق ۇيىمدار, ورال مەملەكەتتىك پەداگوگيكالىق ۋنيۆەرسيتەتىنىڭ «ستيكس» زەرتتەۋ جاساعى قاتىستى. تالعات ءسۇيىنباي. دەرەك, سۋرەت: سىرقى ىستەر مينيسترلىگىنىڭ ءباسپاسوز قىزمەتى.