EXIT-POLL

550 سايلاۋ ۋچاسكەسىندە  ساۋالداما جۇرگىزەدى كەشە استانادا كتك تەلەارناسى مەن «دەموكراتيا ينستيتۋتى» عىلىمي زەرتتەۋ قاۋىمداستىعى بىرلەسىپ 20 ناۋرىز كۇنى وتەتىن پارلامەنت ءماجىلىسى دەپۋتاتتارىنىڭ سايلاۋىنا بايلانىستى بريفينگ وتكىزدى. وندا الداعى ساياسي ناۋقاندى الەۋمەتتىك سۇيەمەلدەۋ ماسەلەسى ءسوز بولدى. اتالعان تەلەارنانىڭ ديرەكتورى قانات ساحاريانوۆ «دەموكراتيا ينستيتۋتى» سايلاۋ كۇنى داۋىس بەرۋ ۋچاسكەلەرىندە ساۋالداما جۇرگىزەتىنىن ايتىپ: «كتك سايلاۋ­دى الەۋمەتتىك سۇيەمەلدەۋ ءۇشىن وسى عىلىمي ينستيتۋتقا تاپسىرىس بەردى. بۇل رەتتە ءبىز سەنىم ارتىپ وتىرعان ۇيىمنىڭ exit-poll تەحنولوگياسى بويىنشا جۇمىس ىستەيتىنىن ەرەكشە اتاپ وتكەن ءجون», – دەدى. ءوز كەزەگىندە «دەموكراتيا ينستيتۋتى» عزق ديرەكتورى يۋليا كۋچينسكايا ساۋالداما كەزىندە ەلىمىزدىڭ بارلىق ايماعى مەن استانا جانە الماتى قالالارىنداعى 550 سايلاۋ ۋچاسكەسى قامتىلاتىنىن جەتكىزدى. بۇل جونىندە ول: «ءبىزدىڭ ينستيتۋتتىڭ وكىلدەرى سايلاۋ كەزىندە قالالىق جەرلەردەگى – 313, ال اۋىلدىق ەلدى مەكەندەردەگى 237 داۋىس بەرۋ ۋچاسكەسىندە جۇمىس ىستەيدى. ءار ۋچاسكەدە كەۋدەلەرىندە ارنايى بەيدجدەرى بار 2 قىزمەتكەرىمىزدەن تۇرادى. ولاردىڭ بارلىعى exit-poll-دىڭ شىعابەرىستە كىمگە داۋىس بەرگەندىگى جونىندە ساۋالداما جۇرگىزۋ تەحنولوگياسىن مەڭگەرگەن. زەرتتەۋ بارىسىندا داۋىس بەرۋشىنىڭ جاسى, گەوگرافيالىق ەرەكشەلىگى سەكىلدى بارلىق فاكتورلار ەسكەرىلەدى. ءبىز قولداناتىن ءادىستى شەتەلدىك جانە وتاندىق عالىمدار ماقۇلداعان. وسىعان دەيىن قازاقستاندا وتكەن ءۇش سايلاۋ ناۋقانىندا جۇمىس ىستەدىك. قورىتىندىمىز ورتالىق سايلاۋ كوميسسياسىنىڭ ەسەبىمەن بىردەي بولدى. ايىرماشىلىق شامامەن 0,5 پايىز مولشەرىندە عانا», – دەدى. يۋ.كۋچينسكايانىڭ سوزىنە قاراعاندا, ساۋالداما جۇرگىزىلەتىن سايلاۋ ۋچاسكەلەرى ءار ايماقتاعى سايلاۋشىلاردىڭ سانىنا بايلانىستى بولىنەدى. ولاردىڭ تىزىمدەرى ستراتيفيكاتتالعان ىرىكتەمەنى قۇرۋ تەحنيكاسىن ورىنداۋ ارقىلى جاسالادى. سونىڭ ارقاسىندا وبلىس ورتالىقتارىنان شالعايدا ورنالاسقان جانە دامۋ دەڭگەيى ءارتۇرلى ەلدى مەكەندەر قامتىلماق. سونىمەن قاتار, ينستيتۋت ديرەكتورى سايلاۋ كۇنى مالىمەتتەردى جيناۋ بەس ۋاقىت ارالىعىندا جەكە الەۋمەتتىك-دەموگرافيالىق توپتاردىڭ ەلەكتوراتتى بەل­سەن­دىلىگىن ەسەپكە الا وتىرىپ ىسكە اساتىنىن مالىمدەدى. «بۇل ءتاسىل حالىقتىڭ ءتۇرلى توپتارىن قامتۋعا مۇمكىندىك بەرەدى», – دەدى يۋ.كۋچينسكايا. «قولدانىلاتىن ساۋالداما ادىستەرى رەپرەزەنتاتيۆتى, سەنىمدى مالىمەتتەر الۋعا جانە ىقتيمال اۋىتقۋلاردىڭ ۇلەسىن ەسەپتەپ شىعارۋ ارقىلى بولجامدىق باعا بەرۋگە ءتيىمدى. تاعى ءبىر ايتا كەتەتىن جايت, ناۋقان كەزىندە ءبىزدىڭ ينستيتۋت ەلىمىزدە سايلاۋدى ۇيىمداستىرۋ جانە وتكىزۋ اسپەكتىلەرى بويىنشا دا ەكسپرەسس-ساۋالدامالار جۇرگىزەدى. سونداي-اق, بىلىكتى ساراپشىلاردىڭ پىكىرلەرى دە نازارعا الىنادى», – دەگەن ول ادەتتەگىدەي, exit-poll-دىڭ زەرتتەۋ ناتيجەسى 20 ناۋرىز كۇنى سايلاۋ اياقتالعاننان كەيىن عانا جاريالاناتىنىن ايتتى. ەلامان قوڭىر, «ەگەمەن قازاقستان».