ەقىۇ ميسسياسىنىڭ باسشىسىمەن كەزدەستى

كەشە قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ پارلامەنت ءماجىلىسىنىڭ دەپۋتاتتارىن كەزەكتەن تىس سايلاۋدى بايقاۋ جونىندەگى ەقىۇ/دياقب ميسسياسىنىڭ باسشىسى بوريس فرلەكپەن كەزدەستى. ورتالىق سايلاۋ كوميس­سياسىنىڭ باسشىسى ق.تۇرعانقۇلوۆ ب.فرلەكتى پارلامەنت ءماجىلىسىنىڭ جانە جەرگىلىكتى ءماسليحاتتاردىڭ دەپۋتاتتارىن سايلاۋعا دايىندىق جونىندەگى جۇمىسىمەن تانىستىردى. سونداي-اق, ول ورتالىق سايلاۋ كوميسسياسىنىڭ جانە سايلاۋ ورگاندارىنىڭ جالپى اعىمداعى ءىس-شارالارى تۋرالى ايتىپ بەردى. «قازىرگى ۋاقىتتا ورتسايلاۋكوم بارلىق قاجەتتى كادرلىق, ماتە­ريالدىق جانە قارجىلىق رەس­ۋرس­تارمەن قامتىلعان جانە سايلاۋ­دى وتكىزۋگە دايىن. بارلىق دەڭ­گەيدەگى سايلاۋ كوميسسيالارى تولىقتىرىلعان جانە ول جۇمىسقا ءازىر وتىر. سونىمەن قاتار, ءبىز سايلاۋدى ۇيىمداستىرۋشىلار مەن سايلاۋ ۇدەرىسىنە قاتىسۋشىلاردى وقىتۋ, سايلاۋشىلار تىزىمدەرىن جانداندىرۋ جانە تۇزەتۋ جونىندەگى جۇمىستى جالعاستىرۋدامىز. ورتسايلاۋكوم تومەن تۇرعان سايلاۋ كوميسسيالارىن ءتيىستى قۇرالدارمەن, سونداي-اق, باسپا, دىبىس جانە بەينەماتەريالدارمەن قامتاماسىز ەتە وتىرىپ, ولارعا قاجەتتى ۇيىمداستىرۋشىلىق, ادىستەمەلىك جانە اقپاراتتىق قولداۋ كورسەتۋدە», – دەپ اتاپ ءوتتى ق. تۇرعانقۇلوۆ. ەقىۇ/دياقب ميسسياسىنىڭ باسشىسى ءوز كەزەگىندە كەزدەسۋدى ۇيىمداستىرعانى ءۇشىن, قر وسك تاراپىنان كورسەتىلگەن كومەك پەن ىنتىماقتاستىق ءۇشىن ريزاشىلىعىن ءبىلدىردى جانە ميسسيا ساراپشىلارى جۇمىسىنىڭ ۇيىمداستىرىلۋى تۋرالى ايتىپ بەردى. كەزدەسۋ بارىسىندا, سونداي-اق, پارتيالىق تىزىمدەردى ۇسىنۋعا جانە تىركەۋگە, ۇگىت ناۋقانىن وتكىزۋ شارتتارىنا, داۋىس بەرۋ كۇنىنىڭ سايلاۋ راسىمدەرى مەن سايلاۋ قورىتىندىلارىن شىعارۋعا بايلانىستى ماسەلەلەر تالقىلاندى. ورتسايلاۋكوم باسشىسى ەقىۇ/دياقب ميسسياسىنىڭ ساراپ­شىلارىنا سايلاۋدى باي­قاۋدا تابىس تىلەدى. «ءبىز ىنتىماق­تاستىققا دايىنبىز جانە بايقاۋ ميسسيالارىنىڭ قاتىسۋىن ال­داعى سايلاۋدا جاريالىلىق, ترانس­پارەنتتىك, اشىقتىق احۋالىن قامتاماسىز ەتۋگە, سايلاۋ ۇدەرى­سىنىڭ بارلىق قاتىسۋشىلارى تاراپىنان سايلاۋعا سەنىمىن ارتتىرۋعا ىقپال ەتەدى دەپ قاراستىرامىز», – دەدى ول. كەزدەسۋگە ەقىۇ/دياقب ميسسياسى باسشىسىنىڭ ورىنباسارى پولين ماريا لەموس, قر وسك مۇشەلەرى, ەقىۇ/دياقب-نىڭ سايلاۋ جانە قۇقىق ماسەلەلەرى جونىندەگى ماماندارى قاتىستى. سۋرەتتى تۇسىرگەن ەرلان وماروۆ.