قۇقىقتىق قادامدار قاجەت

قۋات راحيمبەردين – س.امانجولوۆ اتىنداعى شىعىس قازاقستان مەم­لەكەتتىك ۋنيۆەرسيتەتىنىڭ قىلمىستىق قۇقىق جانە قىلمىستىق ۇدەرىس كافەد­راسىنىڭ مەڭگەرۋشىسى, زاڭ عىلىم­دارىنىڭ دوكتورى, شىعىس قازاق­ستان وبلىسى بويىنشا ازاپتاۋعا قارسى ۇلتتىق ساقتاندىرۋ تەتىگىنە قاتى­سۋ­شىلار توبىنىڭ جەتەكشىسى. «اق جول» پارتياسىنىڭ اتىنان وسكەمەن قالاسى ءماسليحاتىنىڭ دەپۋتاتى كانديداتتىعىنا تىركەلگەن قۋات قاجىمۇقان ۇلى ەل كەلەشەگى جەرگىلىكتى ءوزىن ءوزى باسقارۋ ورگاندارىن دامىتۋعا بايلانىستى ەكەندىگىن ايتادى. – ءماسليحات – جەرگىلىكتى ءوزىن ءوزى باسقارۋ ورگانىنا جاتادى. ەلىمىز جەرگىلىكتى ءوزىن-ءوزى باسقارۋدى دامىتا وتىرىپ, وركەندەۋى ءتيىس. «قازاقستان-2050» ستراتەگياسىندا وكىلەتتىكتەردىڭ باسىم بولىگى جەرگىلىكتى وكىلدىك ورگاندارعا بەرىلەتىندىگى كورسەتىلگەن. بۇگىندە جەرگىلىكتى مەملەكەتتىك باسقارۋ قىزمەتىن شەكتەۋ, جەرگىلىكتى ءوزىن ءوزى باسقارۋ ورگاندارىنىڭ مەنشىگى مەن بيۋدجەتىن قالىپتاستىرۋ, اۋىلدىق وكرۋگتەر دەڭگەيىندە اكىمشىلىك-اۋماقتىق بىرلىكتەردى جانداندىرۋ ماسەلەلەرى جۇرگىزىلىپ, جەرگىلىكتى ءوزىن ءوزى باسقارۋدى دامىتۋدىڭ ەكىنشى كەزەڭى جۇزەگە اسىرىلۋدا. بۇل – بىرتىندەپ دامىتۋدى قاجەت ەتەتىن وزەكتى ماسەلە. وسكەمەن قالاسىندا كوپ جىلدار بويى جەرگىلىكتى ءوزىن ءوزى باسقارۋ كوميتەتى جۇمىس ىستەپ كەلەدى, – دەدى ق.راحيمبەردين. ونىڭ ايتۋىنشا, جەرگىلىكتى ءوزىن-ءوزى باسقارۋدىڭ قازاقستاندىق مودەلىن قۇرۋدا وزىق ەلدەردىڭ تاجىريبەسىن ەسكەرگەن ءجون. بىلتىر ءبىر توپ ارىپتەستەرىمەن گەرمانيانىڭ بەرلين مەن درەزدەن قالالارىندا بولىپ, كوپتەگەن ماسەلەلەردى ءتيىمدى شەشۋ جولدارىمەن بىرگە جەرگىلىكتى ءوزىن-ءوزى باسقارۋدى ۇيىمداستىرۋ ءتاجى­ريبەسىمەن قانىعىپ قايتقانىن جەت­كىزدى. بۇگىندە نەمىس قالالارىنداعى وڭتايلى شەشىمدەر مودەلى وبلىس ورتالىعىنا دا ەنگىزىلۋدە. قۋات قاجىمۇقان ۇلى جاستار اراسىندا وتانشىلدىق تاربيەنى ارتتىرۋ, حالىقتىڭ قۇقىقتىق ساۋات­تىلىعىن كوتەرۋ سىندى ماسە­لەلەرگە دە توقتالدى. بۇل رەت­تە, وبلىس ورتالىعىندا جاس­تار اراسىندا ورىن الاتىن قىل­مىس پەن ونىڭ سەبەپتەرى, سالدار­لارى جانە قىلمىستان ساقتان­دىرۋ ماسەلەلەرىنە ناقتى زەرتتەۋ جۇرگىزگەنىن اتاپ ءوتتى. سوڭعى شيرەك عاسىردا 14-29 جاس ارالىعىنداعى جاستار اراسىندا ورىن الاتىن قىلمىستىڭ نەگىزگى سەبەپتەرىن انىقتاعان سيرەك زەرتتەۋ جۇمىس­تارىنىڭ ءبىرى بولعاندىقتان, ونىڭ قورىتىندىلارى وڭىردەگى ىشكى ىستەر مەن پروكۋراتۋرا ورگاندارىنىڭ نازارىنا الىندى. دۋمان اناش, «ەگەمەن قازاقستان». وسكەمەن.